ក្លិបបាល់ទាត់ញញួរធំ West Ham បាន ប្រកាសថា ខ្លួនបានចុះកុងត្រាទិញខ្សែប្រយុទ្ធ Ashley Fletcher ពីក្រុមបិសាចក្រហម Manchester United នៅក្របខ័ណ្ឌអង់គ្លេស Premier League ដូចគ្នា ។

កីឡាករវ័យ២០ឆ្នាំរូបនេះត្រូវបានក្លិបBarnsley នៅក្របខ័ណ្ឌអង់គ្លេស League One ខ្ចីជើងកាលពីរដូវកាលមុន។ ស្របពេល ដែលកិច្ចសន្យារបស់គេបានចប់ជាមួយ នឹងក្រុមបិសាចក្រហមផងដែរ នោះលោក Slaven Bilic គ្រូបង្វឹករបស់ West Ham បានសម្រេចចិត្តទិញ Ashley Fletcher តែ ម្តង ។

Ashley Fletcher បាននិយាយថា “ខ្ញុំ រំភើបណាស់ដែលបានមកដល់ទីនេះ។ ក្លិប West Ham គឺជាក្លិបធំមួយហើយខ្ញុំ សប្បាយចិត្តដែលបានមកចូលរួមជាមួយពួកគាត់។ ពួកគេគឺជាក្លិបដែលមានមហិច្ឆតា ខ្ពស់ហើយមានកីឡាករល្អៗជាច្រើន ពិសេសបានបញ្ចប់រដូវកាលដោយចំណាត់ ថ្នាក់ល្អផងដែរ”។

ចំណែកក្លិបបិសាចក្រហមក៏បានចេញសេចក្តីថ្លែងការណ៍មួយថា “អ្នកទាំងអស់ គ្នានៅក្នុងក្លិប Manchester United បាន ជូនពរដល់ Ashley Fletcher ឲ្យទទួល បានជោគជ័យ និងសំណាងល្អនៅក្នុងអាជីពនាថ្ងៃអនាគត” ៕

ដោយ៖ ដេវីត