លោក David Moyesត្រូវបានតែងតាំងជាគ្រូបង្វឹករបស់ក្រុមឆ្មាខ្មៅ Sunderland ដើម្បីជំនួសតំណែងរបស់លោក Sam Alla- rdyce ដែលបានចាកចេញទៅដឹកនាំក្រុម ជម្រើសជាតិអង់គ្លេស ។

អតីតគ្រូបង្វឹករបស់ក្រុម Evertonនិង Manchester United រូបនេះត្រូវបានក្រុម Real Socieded របស់ប្រទេសអេស្បាញបណ្តេញចេញពីតំណែងកាលពីថ្ងៃទី១៥ ខែវិច្ឆិកាបន្ទាប់ពីដឹកនាំបានមួយខែ។ តែពេលនេះគាត់បានចុះហត្ថលេខាមកដឹកនាំក្រុមឆ្មាខ្មៅរយៈពេល៤ឆ្នាំនៅក្នុងប្រទេសអង់គ្លេសវិញ។

លោក Moyes បានដឹកនាំក្រុមEvertonឈរលំដាប់ពាក់កណ្តាលតារាងអង់គ្លេស Premier League រយៈពេល១១ឆ្នាំ ។ គាត់ បាននិយាយថា “ខ្ញុំរីករាយណាស់ដែលបាន មកចូលរួមជាមួយនឹងក្រុម Sunderland ហើយរំភើបចំពោះឱកាសដ៏ល្អនេះ។ ខ្ញុំបាន មកកាន់ក្លិបអង់គ្លេសដ៏ធំមួយដែលមានអ្នកគាំទ្រដ៏អស្ចារ្យនៅក្នុងក្របខ័ណ្ឌអង់គ្លេស Premier Leagueសាជាថ្មីម្តងទៀត”។

លោក Ellis Short ប្រធានក្លិបឆ្មាខ្មៅ Sunderland បានថ្លែងថា “យើងពិតជារីក រាយខ្លាំងណាស់ដែលបានស្វាគមន៍លោកDavid Moyes មកកាន់ក្លិបSunderland។ គាត់គឺជាជម្រើសទី១ក្នុងចំណោមគ្រូបង្វឹកជាច្រើនដែលក្លិបយើងសម្លឹងឃើញ”៕

ដោយ៖ ដេវីត