ភ្នំពេញ៖ករណីជជែកគ្នាឡើងតឹងសសៃរករៀងៗខ្លួនស្ទើតែក្លាយជាហឹង្សាទៅហើយនោះ បាន បង្កការភ្ញាក់ផ្អើលដល់អ្នកខាង និងអ្នកដំណើរកាលពីវេលាម៉ោង៦ព្រឹកថ្ងៃទី៣១ ខែកក្កដា ឆ្នាំ២០១៥នៅ ចំណុចបុរីសំណង់សូនី ផ្លូវលេខ៤៥សូនី ក្បែរផ្សារលឹមឈាងហាក់ សង្កាត់ស្ទឹងមានជ័យ ខណ្ឌ មានជ័យ ដែលទំនាស់ផ្តើមចេញពីរឿងឆ្កែស្ទុះមកខាំក្មេងស្រីម្នាក់ដើរចេញពីក្នុងផ្ទះសំដៅមក ឡើងជិះរ៉ឺម៉កកង់បីឪពុកទៅសាលារៀន។
ប្រភពពីកន្លែងកើតហេតុ បុរសម្នាក់បានឲ្យដឹងថា ឆ្កែផ្ទះដែលមានរថយន្តឡិចស៊ិសចត មុខផ្ទះនោះបានស្ទុះមកខាំជើងក្មេងស្រីម្នាក់ឲ្យរងរបួសត្រង់កំភួនជើង ហើយឪពុកក្មេងស្រីនោះ គាត់ឃើញឆ្កែខាំកូនស្រី គាត់ក៏ស្ទុះទាញដំបងមួយប្រវែងមួយក្នាំងដៃគប់ទៅលើឆ្កែនោះ។ គប់ មិនត្រូវឆ្កែក៏ទៅត្រូវទ្វារផ្ទះ ហើយស្ត្រីយួនពាក់អាវសនោះក៏ស្ទុះចេញពីក្នុងផ្ទះមកចោទថាគេគប់ ទ្វារផ្ទះគាត់។
ប្រភពដដែលបន្តថា តាមឆ្កែនោះម្ចាស់ត្រូវចងឲ្យជាប់មិនត្រូវព្រលែងឲ្យឆ្កែស្ទុះហេរមក ខាំគេឯងនៅផ្លូវសាធារណៈនោះទេ ឆ្កែខ្លួនខាំគេហើយរករឿងគេទៀត។ ប្រជាពលរដ្ឋដែលឈរ មើលសកម្មភាពជជែកគ្នានោះម្នាក់ៗបាននិយាយថា ម្ចាស់ឆ្កែត្រូវតែទទួលខុសត្រូវ។
ដោយឡែកបុរសជាឪពុកបាននិយាយថា គាត់អត់បានគប់ទ្វារផ្ទះគេទេ គាត់គ្រាន់តែដើរ ទៅហៅម្ចាស់ឆ្កែនៅក្នុងផ្ទះឲ្យចេញមកនិយាយគ្នា តែគេអត់និយាយជាមួយទេបែរជាចោទថារូប គាត់យកដំបងគប់ទ្វារផ្ទះ ចុះរឿងឆ្កែគាត់នោះខាំកូនស្រីរបួសកំភួនជើងគិតយ៉ាងម៉េចវិញ។បុរស ជាឪពុកក្មេងស្រីរងគ្រោះថា គាត់មានបំណងឲ្យចេញមកនិយាយគ្នាទទួលខុសត្រូវដើម្បីនាំកូន គាត់ទៅចាក់ថ្នាំបង្កាវាជាការស្រេច តែបែរជាមកទាស់ជាមួយប្រគាត់ទៅវិញ។
ប្រជាពលរដ្ឋហួសចិត្តគ្រប់ៗគ្នា ហើយបានឲ្យដឹងទៀតថា ម្ចាស់ឆ្កែយល់ព្រមចាក់ថ្នាំឲ្យ ក្មេងស្រីនោះ តែគេឲ្យឪពុកក្មេងស្រីរងគ្រោះនោះសុំទោសគេរឿងគប់ទ្វារផ្ទះ៕ តាឡឹម
