ភ្នំពេញ៖ រថយន្តឡិចស៊ីស RX330 មួយគ្រឿងបេីកបរក្នុងងល្បឿនលឿនបានរេចង្កូតទៅបុកម៉ូតូហុងដាប៊ីត ដែលជិះដោយនារី២នាក់ បណ្តាលឱ្យម៉ូតូខ្ទាតហោះឡើងលើសួនច្បារពុះចែកទ្រូងផ្លូវ រងរបួសធ្ងន់ស្រាលចំនួន២នាក់ ។
ហេតុការណ៍នេះបានកេីតឡើងនៅវេលាម៉ោង១១និង៤០នាទីយប់ ថ្ងៃទី១០ ខែមិថុនា ឆ្នាំ២០២៤ នៅទល់មុខច្រកចូល ណាហ្គាវើល២ ផ្លូវរដ្ឋសភា សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកេីតហេតុ គេបានឃើញនារីវ័យក្មេង២នាក់ជិះម៉ូតូម៉ាក ហុងដាប៊ីត ពណ៌ស ពាក់ស្លាកលេខ ភ្នំពេញ 1JN-4375 ធ្វើដំណើរតាមបណ្ដោយផ្លូវរដ្ឋសភាក្នុងទិសដៅពីជើងទៅត្បូង លុះមកដល់ចំណុចកេីតហេតុក៏ស្រាប់តែមានជនជាតិចិនមួយក្រុមមានគ្នា៣នាក់ក្នុងនោះមានស្រីម្នាក់ បានបេីករថយន្តម៉ាកឡិចស៊ីស RX 330 ពណ៌ស ពាក់ស្លាកលេខ ភ្នំពេញ 2BW-0494 ធ្វើដំណើរក្នុងទិសដៅស្របទិសគ្នា ហើយជ្រុលទៅបុកម៉ូតូពីក្រោយ បណ្ដាលឱ្យម៉ូតូខ្ទាតហោះឡើងលើសួនច្បារពុះចែកទ្រូងផ្លូវរងការខូចខាត និងធ្វើឱ្យអ្នកជិះម៉ូតូទាំង២នាក់រងរបួសធ្ងន់ម្នាក់និងស្រាលម្នាក់ អ្នកទាំង២ត្រូវបានបញ្ជួនយកទៅសង្គ្រោះនៅមន្ទីរពេទ្យភ្លាមៗផងដែរ ។
ដោយឡែកខាងរថយន្តវិញ បានធ្លាក់កាងនៅកន្លែងកេីតហេតុ ហេីយភា្លមៗនោះអ្នកបេីកបរមិនព្រមឈប់ទទួលខុសត្រូវនោះទេ គឺបេីករថយន្តរត់គេចរហូតមកដល់ក្នុងតំបន់អភិវឌ្ឍន៍បឹងកក់ ខណ្ឌដូនពេញ ក៏ត្រូវបងប្អូនប្រជាពលរដ្ឋជួយដេញឃាត់រថយន្ដបាននិងអ្នកបេីកបរប្រគល់អោយសមត្ថកិច្ចតែម្ដង ។
ក្រោយកេីតហេតុ រថយន្ដនិងម៉ូតូរួមទាំងអ្នកបេីកបរត្រូវបានសមត្ថកិច្ចធ្វើការវាស់វែងយកទៅរក្សាទុកនៅការិយាល័យនគរបាលចរាចរណ៍ផ្លូវគោក រង់ចាំដំណោះស្រាយនៅពេលក្រោយ៕ដោយ៖សុខាសែនជ័យ
