ភ្នំពេញ៖ តារាចម្រៀងល្បីឈ្មោះលោក ខេមរៈ សិរីមន្ត បានផ្ដល់ជំនួយជាទឹកប្រាក់ចំនួន ២លានរៀលជូនទៅលោក ជា ស្រួច បន្ទាប់ពី អតីតកីឡាករប្រដាល់រូបនេះ បានចេញមុខវិញជាមួយនឹងជីវភាពត្រដាបត្រដួស។
តាមរយៈការបង្ហាញមុខក្នុងស្ថានភាពជិវភាពដ៏លំបាកតាមរយៈបណ្តាញទំនាក់ទំនងសង្គមកន្លងម បានធ្វើឲ្យអ្នកដែលធ្លាប់ស្គាល់លោក ស្រួច រតនា ហៅ ជា ស្រួច សម្តែងការអាណិតអាសូរនិងមិននឹកស្មានដល់ថា អតីតកីឡាករដ៏ល្បីឈ្មោះ និងជាអតីតតារាសម្តែងរូបនេះបានធ្លាក់ក្នុងស្ថានភាពមិនគួរឲ្យជឿគឺក្លាយជាអ្នកលក់កម្លាំងពលកម្មគឺជាកម្មករអូសរទេះនៅព្រំដែនយកប្រាក់ចិញ្ចឹមជីវិត។
ជាមួយគ្នានេះគោលបំណងនៃការចង់ជួបតារាចម្រៀង ខេមរៈ សិរីមន្ត ដែលអតីតកីឡាកររូបនេះធ្លាប់សម្តែងបទ «បេះដូងអ្នកប្រដាល់» បានសម្រេចដូចបំណង។
លោក សិរីមន្ត បានជួយលោក ជា ស្រួច ចំនួន២លានរៀល ដែលជំនួយនេះបានមកពីតារាចម្រៀងខាងលើផ្ទាល់រួមជាមួយមិត្តភ័ក្ដិមួយចំនួនទៀត។
ម្ចាស់បទ «បេះដូងអ្នកប្រដាល់» លោក ខេមរៈ សិរីមន្ត ដែលមានការចូលរួមសម្តែងដោយផ្ទាល់ផងដែរពីលោក ស្រួច រតនា ហៅ ជា ស្រួច កាលពីអំឡុងឆ្នាំ២០០៧ ហើយក៏ជាបទចម្រៀងដែលធ្វើឲ្យមហាជនចាប់ផ្តើមស្គាល់តារាចម្រៀងរូបនេះកាន់តែខ្លាំងផងដែរ។
តារាចម្រៀងប្រចាំផលិតកម្មសាន់ដេរូបនេះ គឺជាសិល្បករម្នាក់ទៀត ដែលបានឈឺឆ្អាលពីអតីតកីឡាករប្រដាល់ ជា ស្រួច កាលពីម្សិលមិញ ទឹម រដ្ឋា ខាត់ សុឃីម និងឌីជេ សាហារ៉ា ប្រកាសពីការជួយអតីតតារាសម្ដែងរូបនេះ។
ដោយឡែករសៀលនេះអ្នកនាង យុគ ចិន្តា និងឌីជេ អាចារ្យធំ ក៏បានពាំនាំជំនួយសប្បុរសទៅជួយើផល ជា ស្រួច ផងដែរ។ ការបង្ហាញពីអារម្មណ៍អាណិតស្រលាញ់ និងផ្តល់ជាថវិការដល់អតីតកីឡាកររូបនេះទទួលបានការកោតសរសើរច្រើនពីមហាជន ហើយក៏មានទស្សនិកជនមួយចំនួនស្នើឲ្យផលិតករផ្តល់តំណែងជាតារាសម្តែងណាមួយសម្រាប់លោក ជា ស្រួច ផងដែរ ដើម្បីឲ្យគាត់មានលទ្ធភាពចិញ្ចឹមជីវិតសមរម្ភនឹងគេ៕
ដោយ៖ វឌ្ឍនា
