ភ្នំពេញ៖ បុរសម្នាក់ស្រវឹងបើករថយន្តឡងគ្រីស័រ ក្នុងល្បឿនលឿន ជ្រុលបុករះរនាំងដែកពុះចែកទ្រូងផ្លូវបណ្តាលឲ្យបាក់អស់ចំនួន៦ផ្ទាំង ហើយរថយន្តនៅមិនទាន់អស់ល្បឿន ក៏បន្តទៅបុកម៉ូតូចំនួន៣គ្រឿង ខណៈកំពុងធ្វើដំណើរនៅចុះចំណែកផ្លូវម្ខាងទៀត រួចហួសទៅបុករ៉ឺម៉កកង់បី ដែលចតស្ងៀមនៅចញ្ចើមផ្លូវ រងការខូចខាត សំណាងម្ចាស់ម៉ូតូរបួសស្រាល ។

ហេតុការណ៍នេះបានកើតឡើងកាលពីវេលាម៉ោង១១យប់ ថ្ងៃទី២៦ ខែកក្កដា ឆ្នាំ២០១៦ នៅចំណុចខាងត្បូងស្តុបពេទ្យចិន តាមបណ្តោយផ្លូវវិថីព្រះមុនីវង្ស ស្ថិតក្នុងសង្កាត់បឹកកេងកងទី២ ខណ្ឌចំការមន រាជធានីភ្នំពេញ ។

ម្ចាស់រថយន្តឈ្មោះ សំរេច កុសល ភេទប្រុស អាយុ៣៨ឆ្នាំ ស្នាក់នៅផ្ទះលេខ ១៧AB ផ្លូវលេខ៣៤៨ សង្កាត់ទួលស្វាយព្រៃទី១ ខណ្ឌចំការមន ។

តាមសាក្សីពីប្រជាពលរដ្ឋ ដែលនៅក្បែរបានអោយដឹងថា នៅមុនពេលកើតហេតុ គេបានឃើញរថយន្តម៉ាកឡង់គ្រីស័រមួយគ្រឿង ពណ៍ទឹកប្រាក់ ពាក់ស្លាកលេខ ភ្នំពេញ 2U-3989 បើកបរដោយបុរសម្នាក់ស្ថិតក្នុងស្ថានភាពស្រវឹង បានធ្វើដំណើរតាមបណ្តោយផ្លូវវិថីព្រះមុនីវង្ស ក្នុងទិសដៅពីជើងទៅត្បូង ក្នុងល្បឿនលឿន ខណៈមកដល់ចំណុចកើតហេតុ ក៏បានរ៉េចង្កូតទៅបុករះរនាំងដែកពុះចែកទ្រូងផ្លូវបាក់អស់ចំនួន៦ផ្ទាំង រៀបស្មើដល់ដី ហើយរថយន្តបង្កនៅមិនទាន់អស់ល្បឿន ក៏ជ្រុលទៅចំណែកផ្លូវម្ខាងទៀតបុកម៉ូតូចំនួន៣គ្រឿង ដោយមានម៉ាក zoomer x មួយគ្រឿង ម៉ូតូម៉ាកសង់កូរ៉េ មួយគ្រឿង និងម៉ូតូម៉ាកវេង មួយគ្រឿងទៀតដែលកំពុងធ្វើដំណើរធ្វើរងការខូចខាតតែរថយន្តនៅមិនទាន់អស់ល្បឿនទៀតបន្តទៅបុករ៉ឺម៉កកង់បីដែលចតស្ងាមគល់ជាប់ទៅមុខលែងរួច ។

សាក្សីដដែលបានបន្តថា បន្ទាប់ពីបង្កគ្រឿងថ្នាក់ភ្លាមៗនោះ ម្ចាស់រថយន្តត្រូវបានប្រជាពលរដ្ឋឃាត់ខ្លួនប្រគលអោយសមត្ថកិច្ច ។

ក្រោយពេលកើតហេតុ សមត្ថកិច្ចមូលដ្ឋានបានសហការជាមួយជុំនាញមកវាស់វែងធ្វើការវាស់វែង និងនាំខ្លួនម្ចាស់រថយន្តទៅការិយាល័យចរាចរណ៍ជើងគោករាជធានីភ្នំពេញរង់ចាំដោះស្រាយពេលក្រោយ ៕

ដោយ៖ ជីម ភារ៉ាដង្កោ