ភ្នំពេញ៖ នគរបាលប៉ុស្តិ៍ចោមចៅឃាត់ខ្លួនក្រុមក្មេងទំនើងប្រដាប់ដោយដាវសាមូរ៉ៃចំនួន៤នាក់ដែលរង់ចាំកាប់គូសត្រូវ កាលពីវេលាម៉ោង ១១ និង១០នាទីយប់ ថ្ងៃទី២៦ ខែកក្កដា ឆ្នាំ២០១៦ នៅចំណុចមុខផ្សារកាណាស៊ីធី ផ្លូវវេងស្រេង សង្កាត់ចោមចៅ ខណ្ឌពោធិ៍សែនជ័យ។
ប្រភពពីសមត្ថកិច្ចបានឲ្យដឹងថា មុនកើតហេតុគេបានឃើញក្មេងទំនើងមួយក្រុមមានគ្នា៤នាក់ ឈររ៉េរ៉នៅមុខផ្សារកាណាស៊ីធី នឹងឃើញមានដាវសាមូរ៉ៃក្នុងដៃ ឃើញដូច្នេះប្រជាពលរដ្ឋបានរាយការណ៍មកសមត្ថកិច្ច ភ្លាមនោះកម្លាំងបានចុះទៅដល់ទីនោះ ក៏បានឃាត់ខ្លួនបានទាំង៤នាក់ និងដកហូតបានដាវកែច្នៃ ប្រភេទសាមូរ៉ៃចំនួន២ដើម ។
សមត្ថកិច្ចបន្តថា ក្រុមក្មេងទំនើងទាំង៤នាក់នោះ ទី១មានឈ្មោះ ប្រាក់ សុភារ៉ា ភេទប្រុស អាយុ ១៨ឆ្នាំ មុខរបរកម្មកររោងចក្រ ស្នាក់ផ្ទះជួលភូមិព្រៃទា សង្កាត់ចោមចៅ ទី២ឈ្មោះ ធឿន ភេទប្រុស អាយុ១៦ឆ្នាំ មុខរបរនៅផ្ទះ ស្នាក់នៅផ្ទះជួលភូមិចោមចៅ សង្កាត់ចោមចៅ ទី៣ឈ្មោះ ថន មករា ភេទប្រុស អាយុ ១៦ឆ្នាំ មុខរបរជាងបិតស្កុតម៉ូតូ ស្នាក់នៅភូមិជ្រៃកោង សង្កាត់ចោមចៅ ទី៤ឈ្មោះ ផូ វាសនា ភេទប្រុស អាយុ ១៧ឆ្នាំ ស្នាក់នៅភូមិចោមចៅ សង្កាត់ចោមចៅ ។
បើតាមចម្លើយសារភាពរបស់ក្រុមក្មេងទំនើងទាំងនោះបានឲ្យដឹងថា ដាវនេះគេទុកមកការពារខ្លួន ពីព្រោះកាលពីម្សិលមិញក្រុមគេនេះត្រូវក្រុមផ្សេងទៀតមកវាយម្តងរួចមកហើយ និងគំរាមមកវាយម្តងទៀត ទើបពួកគេត្រៀមដាវទុកយ៉ាងដូច្នេះ ។
ក្រោយពេលកើតហេតុ ក្រុមក្មេងទំនើងទាំង៤នាក់ ត្រូវបានឃាត់ខ្លួនរួមជាមួយវត្ថុតាងយកមកប៉ុស្តិ៍នគរបាលរដ្ឋបាលចោមចៅ ដើម្បីសួរនាំ និងកសាងសំណុំរឿងបញ្ជូនមកផ្នែកជំនាញ ព្រហ្មទណ្ឌខណ្ឌដើម្បីចាត់ការបន្ត ៕
ដោយ៖ សុខាសែនជ័យ
