ខ្សែប្រយុទ្ធជើងចាស់របស់ស៊ុយអែត Zlatan Ibrahimovic បានបង្ហើបឲ្យដឹងថាគាត់មិនទទួលយកឱកាសទៅលេងនៅ សហរដ្ឋអាមេរិកជាមួយនឹងក្លិបរបស់អតីតកីឡាករអង់គ្លេស Beckham ដើម្បីមកលេង ឲ្យក្រុមបិសាចក្រហម Manchester United ។

ក្រោយចាកចេញពីក្រុមជើងឯកប្រទេសបារាំង Paris SG កីឡាករវ័យ៣៥ឆ្នាំ Zlatan Ibrahimovic បានសម្រេចចិត្តចុះហត្ថលេខា មកលេងនៅក្នុងទឹកដី Old Trafford រយៈ ពេល១ឆ្នាំ ។ គាត់បានបដិសេធសំណើ ទិញរបស់ David Beckhamដែលបង្កើតក្លិប បាល់ទាត់នៅក្របខ័ណ្ឌកំពូលរបស់អាមេរិក។

Ibrahimovic បាននិយាយនៅក្នុងបទសម្ភាសន៍មួយជាមួយនឹងគេហទំព័រ Goal ថា “Beckham គឺជាមិត្តភក្តិល្អមួយសម្រាប់ខ្ញុំ។ ហើយគាត់បានសុំខ្ញុំទៅលេងជាមួយនឹងក្រុមរបស់គាត់ផងដែរ។ តែពេលនេះខ្ញុំចង់សម្រេចជោគជ័យធំជាមួយនឹងក្រុម Manchester United “។

ខ្សែប្រយុទ្ធIbrahimovicបានថ្លែងបន្តទៀតថា “ក្រុមនៅក្នុងទឹកដីសហរដ្ឋអាមេរិកពិតជាគួរឲ្យចាប់អារម្មណ៍ខ្លាំងណាស់ ប៉ុន្តែ ឱកាសមកលេងជាមួយនឹងក្រុមបិសាច ក្រហមក្រោមការដឹកនាំរបស់លោក Jose Mourinho ដែលជាមិត្តភក្តិល្អរបស់ខ្ញុំពិតជាឱកាសដែលពិបាកនឹងបដិសេធណាស់”។

ទោះបីជាយ៉ាងណាក៏ដោយ Ibrahimovic បញ្ជាក់ថាគាត់សង្ឃឹមថានឹងទៅលេងនៅអាមេរិកក្នុងថ្ងៃណាមួយ ដោយគាត់គិតថាគាត់អាចលេងដល់អាយុ៤០ឆ្នាំឯណោះ ៕

ដោយ៖ ដេវីត