ភ្នំពេញ៖ ស្ត្រីម្នាក់សង្ស័យស្រវឹងស្រា
បានបេីករថយន្តម៉ាកCRVជ្រុលទៅបុកម៉ូតូចំនួន២គ្រឿងដែលឈប់រង់ចាំភ្លេីង
ស្តុបពីក្រោយបណ្ដាលឱ្យរងការខូចខាត ហើយភាគីខាងរថយន្តមិនព្រមដោះស្រាយបែរជាមកខឹងសម្បាជេរប្រមាថមកលេីអ្នកសារព័ត៌មានដែលផ្តិតយករូបភាពទៅវិញ ។
ហេតុការណ៍នេះបានកេីតឡើងនៅវេលាម៉ោង១០និង១០នាទីយប់ថ្ងៃទី៩ ខែកក្កដា ឆ្នាំ២០២៤ ត្រង់ចំណុចភ្លើងស្តុបចំការមន ផ្លូវព្រះនរោត្តម សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ។
តាមប្រភពព័ត៌មានពីកន្លែងកើតហេតុ បានឱ្យដឹងថា មុនពេលកេីតហេតុគេបានឃើញស្ត្រីខាងលើបេីករថយន្តម៉ាកCRVពណ៌ស ពាក់ស្លាកលេខ ភ្នំពេញ BJ- 7897 ធ្វើដំណើរតាមបណ្ដោយផ្លូវព្រះនរោត្តម ក្នុងទិសដៅពីជើងទៅត្បូង លុះមកដល់ចំណុចកេីតហេតុ ក៏ជ្រុលទៅបុកពីក្រោយម៉ូតូហុងដាឌ្រីមចំនួន២គ្រឿងដែលឈប់រង់ចាំភ្លេីងស្តុបបណ្ដាលឱ្យរងការខូចខាតម៉ូតូតិចតួច និងរបួសអ្នកជិះតិចតួច តែស្រាប់តែភាគីខាងរថយន្តបាននិយាយអោយសង១០ដុល្លារ ហេីយអោយអូសម៉ូតូចេញ តែពេលនោះភាគីម៉ូតូមិនយល់ព្រមនោះទេ គឺចង់បានសំណងសមស្របណាមួយពីភាគីរថយន្ត តែស្ត្រីជាអ្នកបេីករថយន្តបែរជានិយាយថាម៉ូតូជាអ្នកជិះមកបុករថយន្តរបស់គាត់ទៅវិញ។
ក្នុងហេតុការណ៍នេះផងដែរ នៅពេលដែលបងប្អូនអ្នកសារព័ត៌មានបានចុះទៅផ្តិតយករូបភាព ស្រាប់តែស្ត្រីជាអ្នកបេីករថយន្តបានជេរប្រមាថមើលងាយជាខ្លាំង។
ក្រោយពេលកេីតហេតុ បន្តិចក្រោយមកក៏មានកម្លាំងសមត្ថកិច្ចមូលដ្ឋាននិងមន្ត្រីជំនាញចរាចរណ៍បានចុះទៅធ្វើការវាស់វែងយកមធ្យោបាយទាំងអស់រួមទាំងស្ត្រីជាបេីកបររថយន្តទៅផ្នែកជំនាញនៃអធិការដ្ឋានខណ្ឌបឹងកេងកងដេីម្បីរង់ចាំដំណោះស្រាយ ៕ សុខាសែនជ័យ
