ភ្នំពេញ ៖ នារីកម្មការិនីរោងចក្រពីរនាក់បងប្អូនដឹកគ្នាទៅធ្វើការមិនទាន់ដល់ផងអកុសលត្រូវរថយន្តមិនស្គាល់ម៉ាកបុកពីក្រោយបណ្ដាលឲ្យស្លាប់ម្នាក់នឹងរងរបួសធ្ងន់ម្នាក់ត្រូវបានបញ្ជូនទៅកាន់មន្ទីរពេទ្យ ។
ហេតុការណ៍នេះបានកើតឡើងវេលាម៉ោង៥នឹង៤០នាទី ថ្ងៃទី១៣ខែកក្កដាឆ្នាំ២០២៤ ត្រង់ចំណុចស្តុប វិមានឈ្នះឈ្នះកែងផ្លូវហាណូយ ក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។
ជនរងគ្រោះឈ្មោះ ឃឿន សុធីម ភេទស្រី អាយុ៣៨ឆ្នាំ (រងរបួសធ្ងន់) រស់នៅភូមិតាព្រហ្ម ឃុំកំពង់អុក ស្រុកពញាឮ ខេត្តកណ្ដាល ដឹកប្អួនស្រី ឈ្មោះ ឃឿន ធីប អាយុ ២៨ឆ្នាំ ភេទស្រី (ស្លាប់ ) រស់នៅភូមិតាព្រហ្ម ឃុំកំពង់អុក ស្រុកពញាឮ ខេត្តកណ្ដាល។
បើតាមប្រភពពីក្រុមគ្រួសារសាច់ញាតិបានឲ្យដឹងថា នារីជនរងគ្រោះទាំង២នាក់តែងតែក្រោកពីព្រលឹមជិះម៉ូតូចេញពីផ្ទះនៅស្រុកពញាឮទៅធើ្វការនៅម្ដុំស្ទឹងមានជ័យដូចសព្វមួយដង ខណៈពេលនារីរងគ្រោះទាំងពីរជិះម៉ូតូមួយគ្រឿងម៉ាក Honda Dream ពណ៌ខ្មៅ ពាក់ស្លាកលេខ ភ្នំពេញ 1KG-8807 ពេលមកដល់ចំនុចកើតហេតុភាគីខាងម៉ូតូបានឈប់រងចាំភ្លើងស្តុប ក៏ត្រូវរថយន្តប្រភេទដឹកទំនិញធុនធំបើកបរក្នុងល្បឿនលឿនជ្រុលទៅបុកពីក្រោយម៉ូតូជនរងគ្រោះទាំង២នាក់បណ្ដាលឲ្យស្លាប់បាត់បង់ជីវិតម្នាក់នឹងរងរបួសធ្ងន់ម្នាក់ត្រូវបាន បញ្ចូនទៅកាន់មន្ទីរពេទ្យភ្លាម ចំណែករថយន្តបង្កបានបើករត់គេចខ្លួនចេញពីទីតាំងកើតហេតុបាត់ស្រមោល ។
ក្រោយពេលកើតហេតុសមត្ថកិច្ចជំនាញនៃអធិការនគរបាលខាងព្រែកព្នៅចុះទៅដល់ទីតាំងកើតហេតុបានធ្វើការទំនាក់ទំនងទៅក្រុមគ្រួសារសាច់ញាតិមកទទួលយកសពជនរងគ្រោះយកទៅធ្វើបុណ្យតាមប្រពៃណី ចំណែករថយន្តបង្កសមត្ថកិច្ចជំនួយកំពុងធើ្វការស្រាវជ្រាវបន្ត ៕ ដោយ៖សុខាសែនជ័យ
