ខេត្តស្វាយរៀង៖ បុរស២នាកបានរងរបួសធ្ងន់ធ្ងរ និងម្នាក់ទៀតស្រាល ក្នុងករណីគ្រោះថ្នាក់ចរាចរណ៍ម៉ូតូបុកម៉ូតូនៅក្នុងបាវិត។
ករណីនេះបានកើតឡើងនៅវេលាម៉ោង១០ និង៣៥នាទីយប់ថ្ងៃទី៥ ខែសីហា ឆ្នាំ២០១៦ តាមបណ្តោយផ្លូវជាតិលេខ១ ស្ថិតនៅក្នុងភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង។
សមត្ថកិច្ចបានឲ្យដឹងថា មុនពេលកើតហេតុមានម៉ូតូ១គ្រឿង ម៉ាកYAMAHA REVO ពណ៌ក្រហម ពាក់ស្លាកលេខ68-C1-22596 បើកបរដោយឈ្មោះចាន់ ទ្រី ភេទប្រុស អាយុ២៩ឆ្នាំ រស់នៅភូមិរោង ឃុំចាម ស្រុកកំពង់ត្របែក ខេត្តព្រៃវែង (របួសធ្ងន់) ឌុបគ្នាម្នាក់ឈ្មោះវ៉ាន់ ចាន់ណា ភេទប្រុស អាយុ២៥ឆ្នាំ រស់នៅភូមិឃុំជាមួយគ្នា (របួសស្រាល) បើកបរពីកើតទៅលិច។ លុះមកដល់ចំណុចកើតហេតុខាងលើ ក៏ជ្រុលទៅបុកពីក្រោយម៉ូតូម៉ាកWAVE (ចិន) ស្លាកលេខ70-C6-7901 ពណ៌ខៀវ បើកបរឈ្មោះផន បូរី ភេទប្រុស អាយុ៣៧ឆ្នាំ មុខរបរ នគរបាល រស់នៅផ្ទះលេខ450 សង្កាត់ទំនប់ទឹក ខណ្ឌចំការមន រាជធានីភ្នំពេញ បើកស្របទិសគ្នា បណ្ដាលឲ្យរងរបួសធ្ងន់ ។
បច្ចុប្បន្នជនរងគ្រោះទាំង២នាក់របួសធ្ងន់ត្រូវបានសមត្ថកិច្ចហៅរថយន្តសង្គ្រោះដឹកបញ្ជូនទៅព្យាបាលនៅភ្នំពេញ ដោយឡែកអ្នករបួសស្រាលបានព្យាបាលនៅមន្ទីរពេទ្យផាសុខភាព២បាវិត។ រីឯវត្ថុតាងទាំង២យកមករក្សាទុកនៅអធិការដ្ឋាននគរបាលក្រុងបាវិត ដើម្បីដោះស្រាយតាមនីតិវិធី។
សមត្ថកិច្ចប្រាប់ថា មូលហេតុគឺបណ្តាលមកពីម៉ូតូម៉ាកYAMAHA REVO បើកបរល្បឿនលឿនខ្វះការប្រុងប្រយ័ត្នក៏បុកពីក្រោយម៉ូតូម៉ាកWAVEតែម្តង៕
ដោយ៖ សុវណ្ណារ៉ា
