ភ្នំពេញ ៖ បុរសអ្នករត់ម៉ូតូឌុបម្នាក់ បានចាញ់ល្បិចជនខិលខូចម្នាក់ដោយប្រើវិធីធ្វើជាសុំបើកម៉ូតូហើយធ្វើជាជ្រុះលុយមួយម៉ឺនរៀលសុំឲ្យជនរងគ្រោះជួយចុះរើសមានឧ៌កាសល្អក៏ជិះម៉ូតូជនរងគ្រោះគេចខ្លួនបាត់ ។
ហេតុការណ៍នេះកើតឡើងកាលពីវេលាម៉ោង១១និង៣០នាទី ថ្ងៃទី៣១ ខែកក្កដា ឆ្នាំ២០១៥ ស្ថិតនៅ វាលខាងកើតភូមិកំបូល សង្កាត់កំបូល ខណ្ឌពោធិ៍សែនជ័យ ។
ជនរងគ្រោះត្រូវបានគេស្គាល់ឈ្មោះ ឌឹម លួន ភេទប្រុស អាយុ២៧ឆ្នាំ មុខរបរ រត់ម៉ូតូឌុប មានប្រពន្ធ ជាកម្មការនីរោងចក្រ និងមានកូនប្រុសម្នាក់ក្នុងបន្ទុក ស្នាក់នៅផ្ទះជួល ភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ និងមានស្រុកកំណើតនៅភូមិ – ឃុំកំពង់ត្របែក ស្រុកកំពង់ត្របែក ខេត្តព្រៃវែង ហើយម៉ូតូដែលជនសង្ស័យ ជិះយកទៅបាត់នោះម៉ាកហុងដា សេ១២៥ ស៊េរី២០១២ ពណ៌ខ្មៅ ពាក់ស្លាកលេខ ភ្នំពេញ 1BA-4343 ។
ជនរងគ្រោះ បានរៀបរាប់ឱ្យដឹងថា មុនពេលកើតហេតុគាត់បានឈប់ម៉ូតូ រង់ចាំឌុបម៉ូយនៅមុខផ្សារត្រពាំងល្វា ដូចសព្វដង ហើយកំពុងតែអង្គុយលើម៉ូតូ ស្រាប់តែមាន បុរសម្នាក់ជាជនសង្ស័យបានហៅឱ្យគាត់ឲ្យឌុបជូនទៅកន្លែង លក់ដីមួយកន្លែង នៅក្នុងភូមិកំបូល សង្កាត់កំបូល ក្នុងតម្លៃព្រមព្រៀងគ្នា ចំនួន២ម៉ឺនរៀល ទាំងទៅទាំងមក។ លុះពេលឌុបដល់ក្នុងភូមិកំបូលស្រាប់តែជនសង្ស័យបានស្នើសុំគាត់ឌុបវិញ ពិព្រោះកែមានជំងឺលើសឈាម ជិះម៉ូតូ លឿនចេះតែវិលមុខ ។
ពេលនោះគាត់យល់ព្រមឱ្យជនសង្ស័យឌុបហើយពេលឌុបទៅដល់វាលដាច់ស្រយាលមួយនៅខាងកើភូមិកំបូល ដាច់ឆ្ងាយពី ផ្ទះ ពីភូមិ ជនសង្ស័យប្រើល្បិចធ្វើជាជ្រុះលុយ១ម៉ឺនរៀល ហើយប្រាប់ឲ្យគាត់ ជួយចុះរើស។ គ្រាន់តែរត់ទៅរើសលុយ ដែលជ្រុះនោះបានបន្តិចជនសង្ស័យមានឱកាសល្អក៏ បើកម៉ូតូរបស់គាត់រត់គេចទៅបាត់ស្រមោល ហើយទោះបីជាគាត់ស្រែកឲ្យគេជួយ ក៏គ្មានអ្នកណាឮដែរ ព្រោះកន្លែងនោះស្ងាត់ដាច់ឆ្ងាយពីផ្ទះ ប្រជាពលរដ្ឋ។
ក្រោយមកទើបគាត់ទៅដាក់ពាក្យបណ្តឹងនៅនគរបាលប៉ុស្តិ៍កំបូលឲ្យជួយតាមវែកមុខជនសង្ស័យរូបនេះ តែហាក់ដូចជាមិនសង្ឃឹមរកឃើញឡើយព្រោះមិនស្គាល់ជនសង្ស័យមានទីលំនៅកន្លែងណា៕ លុះដល់ជនរងគ្រោះ ដើរដល់ភូមិ ទើបប្រាប់អ្នកភូមិ នាំគ្នាផ្អើលតែហួសពេលទៅហើយ ៕ប្រាថ្នា
