ខេត្តពោធិ៍សាត់៖ ក្រុមចោរកំពុងយាយីប្រជាពលរដ្ឋទៀតហើយបន្ទាប់ពីស្ងប់ស្ងាត់អស់មួយរយៈមកនៅស្រុកបាកាន ខេត្ត ពោធិ៍សាត់ ។ ជាក់ស្ដែងសត្វគោចំនួន៣ ក្បាលត្រូវបានចោរលួចស្រាយចំណង នៅ ក្នុងក្រោលដឹកយកទៅបាត់ដោយសុវត្ថិភាព ហើយម្ចាស់គោបានអំពាវនាវដល់ សមត្ថកិច្ចពាក់ព័ន្ធមេត្តាជួយរករកគោពួក គាត់ផង ។

ហេតុការណ៍ខាងលើនេះបានធ្វើឲ្យភ្ញាក់ផ្អើលឡើងកាលពីវេលាម៉ោង២និង៣០នាទីរំលងអធ្រាត្រឈានចូលថ្ងៃទី១១ ខែសីហា ឆ្នាំ២០១៦ នៅចំណុចក្រោលគោស្ថិតក្នុងភូមិដូងជ្រំ ឃុំបឹងបត់កណ្តោល ស្រុក បាកាន ខេត្តពោធិ៍សាត់ ។

លោក កែវ លន់ នាយប៉ុស្តិ៍នគរបាល រដ្ឋបាលបឹងបត់កណ្ដោលបានឲ្យដឹងថា ម្ចាស់គោឈ្មោះ ម៉ាត់ ឡុង ភេទប្រុស អាយុ ៤៥ឆ្នាំ មានទីលំនៅស្ថិតក្នុងភូមិ-ឃុំកើត ហេតុ ។ លោកនាយប៉ុស្តិ៍បន្តថា សត្វគោទាំងនោះជាគោមេនិងកូន(ញី)ទាំងអស់ ហើយតាមការបញ្ជាក់ពីម្ចាស់គោ បានឲ្យដឹងថា មិនដឹងបាត់គោទាំងនេះតាំងពីពេលណានោះទេ ខណៈគាត់ក្រោកពី ដំណេកបត់ជើងតូចស្រាប់តែមិនឃើញ គោតែម្តង ។

លោកបន្តទៀតថា ករណីបាត់គោចំនួន៣ក្បាលនេះមិនទាន់ឃើញម្ចាស់មកដាក់ពាក្យបណ្ដឹងនៅឡើយទេ គ្រាន់តែប្តឹងផ្ទាល់មាត់ឲ្យសមត្ថកិច្ចជួយរកប៉ុណ្ណោះតែយ៉ាងណាសមត្ថកិច្ចនឹងឃ្លាំមើល ៕

ដោយ៖ ប៉ឹម ពិន