ខេត្តស្វាយរៀង: សមត្ថកិច្ចតាមប្រមាញ់ ជនសង្ស័យបានហើយក្នុងករណីឃាតកម្មវាយសម្លាប់មនុស្សម្នាក់ជាស្ត្រីពិការគរថ្លង់ រួចទម្លាក់ចូលក្នុងទឹកប្រឡាយនៅឃុំសំបួរ ស្រុកស្វាយទាប។
យោងតាមលោក សោម សារ៉ន អធិការនគរបាលស្រុកស្វាយទាបបានអោយដឹងនៅរសៀលថ្ងៃទី២៧ខែធ្នូឆ្នាំ២០២៤នេះថា ជនរងគ្រោះមានឈ្មោះ ឡ.រ.ន ភេទស្រី អាយុ២៨ឆ្នាំ ជាមនុស្សគរ រស់នៅទីតាំងកើតហេតុ។ ចំណែកជនសង្ស័យមានឈ្មោះ ប.ស.រ ភេទប្រុស អាយុ ២៥ឆ្នាំ ខណៈសមត្ថកិច្ចឃាត់ខ្លួននៅថ្ងៃទី២៥ខែធ្នូ ឆ្នាំ២០២៤នៅត្រង់ចំណុចភូមិអារ័ក្សស្វាយ ឃុំអណ្តូងពោធិ៍ ស្រុករមាសហែក។
ប្រភពដដែលបន្តថា កាលពីថ្ងៃទី២៣ ខែធ្នូ ឆ្នាំ២០២៤ វេលាម៉ោង០៨:៣០នាទី ក្រោយពីបានទទួលព័ត៌មានពីអាជ្ញាធរភូមិថា មានករណីមនុស្សលង់ទឹកប្រឡាយស្លាប់ ស្ថិតនៅភូមិព្រៃទទឹង ឃុំសំបួរ ស្រុកស្វាយទាប ខេត្តស្វាយរៀង រួចមក កម្លាំងអធិការដ្ឋាននគរបាលស្រុកស្វាយទាប ដឹកនាំដោយរូបលោកអធិការនគរបាលស្រុក សហការជាមួយកម្លាំងការិយាល័យជំនាញចំណុះស្នងការដ្ឋាននគរបាលខេត្ត ដឹកដោយលោកវរសេនីយ៍ឯក គឹម ឡៃ ស្នងការរងទទួលផែនការងារព្រហ្មទណ្ឌ និងក្រុមគ្រូពេទ្យធ្វើកោសល្យវិច័យលើសាកសពជនរងគ្រោះ។ ក្រោយធ្វើកោសល្យវិច័យរួចមក ក្រុមការងារសន្និដ្ឋានថា ជាករណីឃាតកម្ម។
ដោយអនុវត្តតាមបទបញ្ជាដ៏ម៉ឹងម៉ាត់របស់លោកឧត្ដមសេនីយ៍ទោ ពេជ្រ វីរ: ស្នងការនគរបាលខេត្តស្វាយរៀង ដឹកនាំផ្ទាល់ដោយលោកវរសេនីយ៍ឯក គឹម ឡៃ ស្នងការរងទទួលផែនការងារព្រហ្មទណ្ឌ កម្លាំងការិយាល័យជំនាញ សហការជាមួយកម្លាំងអធិការដ្ឋាននគរបាលក្រុង/ស្រុកទាំង០៨ ធ្វើការស្រាវជ្រាវនិងកំណត់អត្តសញ្ញាណជនសង្ស័យនិងឈានទៅធ្វើការឃាត់ខ្លួនជនសង្ស័យនៅត្រង់ចំណុចភូមិអារ័ក្សស្វាយ ឃុំអណ្តូងពោធិ៍ ស្រុករមាសហែក ព្រមទាំងដកហូតម៉ូតូ ០១គ្រឿង, ទូរស័ព្ទដៃ០១គ្រឿង, ប្រាក់រៀល ៧,១០០,០០០រៀល និងដំបង ០២ដើម។
នៅចំពោះមុខកម្លាំងសមត្ថកិច្ច ជនសង្ស័យបានឆ្លើយសារភាពថា ខ្លួនពិតជាបានយកដំបងវាយលើជនរងគ្រោះ បណ្តាលអោយស្លាប់ រួចហើយយកទៅទម្លាក់ចូលក្នុងទឹកប្រឡាយពិតប្រាកដមែន៕ ដោយសុថាន
