ខេត្តស្វាយរៀង៖ មានគ្រោះថ្នាក់ចរាចរណ៍ដ៏រន្ធត់មួយបានកើតឡើងបណ្តាលឲ្យបុរស់២នាក់រងរបួសធ្ងន់សន្លប់នៅនិងកន្លែងកាលពីវេលាម៉ោង១០និង៤៥នាទីយប់ថ្ងៃទី១៦ ខែសីហា ឆ្នាំ២០១៦ នៅលើកំណាត់ផ្លូវជាតិលេខ១ត្រង់ចំណុចខាងមុខផែស្ងួតសូងួន ស្ថិតក្នុងភូមិបាវិតកណ្ដាល សង្កាត់បាវិត ក្រុងបាវិត រវាងម៉ូតូនិងម៉ូតូ។

បើតាមមន្ត្រីនគបាលប៉ុស្ត៍រដ្ឋបាលសង្កាត់បាវិតបានឲ្យដឹងថា ជនរងគ្រោះទី១-ឈ្មោះ ប៉ែន សារ៉ាក់ ភេទប្រុសអាយុ២៩ឆ្នាំ មុខរបរជាបុគ្គលិកធនាគារ មានទីលំនៅភូមិជ្រៃធំ សង្កាត់ព្រៃអង្គុញ ក្រុងបាវិត រងរបួសធ្ងន់បែកមុខបែកមាត់បែកក្បាលត្រូវក្រុមគ្រសារយកទៅគ្លីនិកក្រុងបាវិត។ ទី២-ឈ្មោះ វ៉ន ភារុណ ភេទប្រុស អាយុ២៧ឆ្នាំ មុខរបរជាបុគ្គលិកកាស៊ីណូឡាសវីហ្គាសាន់ មានទីលំនៅភូមិកណ្តាលក្រោមឃុំបន្ទាយដែកស្រុកកៀនស្វាយ ខេត្តកណ្តាល រងរបួសធ្ងន់ធ្ងរបែកចិញ្ចើមខាងឆ្វេងបាក់ខ្ទង់ច្រមុះនិងបាក់.កដៃខាងឆ្វេងបច្ចុប្បន្នជនរងគ្រោះក្រុមគ្រួសាយកទៅសម្រាកព្យាបាលនៅមន្ទីរពេទ្យខេត្តស្វាយរៀង។

ប្រភពដ៏ដែលបន្តទៀតថា មុនពេលកើតហេតុគេឃើញជនបង្កឈ្មោះ ប៉ែន សារ៉ាក់ ជិះម៉ូតូមួយគ្រឿងម៉ាកហុងដាសេ១២៥ ពាក់ផ្លាកលេខ ភ្នំពេញ 1FB-4762 ក្នុងទិសដៅពីកើតទៅលិចយ៉ាងលឿនក្នុងស្ថានភាពស្រវឹងស្រាជោក  លុះមកដល់ចំណុចកើតហេតុខាងលើក៏ប៉ះនិងម៉ូតូមួយគ្រឿងទៀតម៉ាកហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ 1FF-6530 បើកបរដោយឈ្មោះ វ៉ន ភារុណ បើកមកពីលិចទៅកើតបញ្រ្ចាស់ទិសគ្នា ក៏បុកគ្នាពេញទំហឹងលាន់សូរដូចរន្ទះ ដួលបោកទៅលើថ្នល់ជាតិរៀងៗខ្លួនបណ្ដាលឲ្យរងរបួសធ្ងន់សន្លប់ទាំងសងខាងតែម្តង។ មូលហេតុដែលបង្កឲ្យបានគ្រោះថ្នាក់ខាងលើនេះគឺបណ្ដាលមកពីអ្នកបើកបរក្នុងស្ថានភាពស្រវឹងស្រា។

ក្រោយកើតហេតុម៉ូតូទាំងពីរគ្រឿងសមត្ថកិច្ចយកទៅរក្សាទុកនៅប៉ុស្តិ៍នគរបាលរដ្ឋបាលសង្កាត់បាវិត ដើម្បីបំពេញសំណុំរឿងដោះស្រាយតាមនីតិវិធីច្បាប់៕

ដោយ៖ យឹម សុថាន