ខេត្តសៀមរាប ៖ ផ្សារក្រឡាញ់ ស្ថិតនៅក្រឡាញ់ ខេត្តសៀមរាប បានរងការឆាបឆេះនៅវេលាទៀបភ្លឺ ឈានចូលព្រឹកនាថ្ងៃទី១៦ ខែកុម្ភៈ ឆ្នាំ២០២៥ នេះ។

អភិបាលស្រុកក្រឡាញ់ លោកសុខ ណារ៉េត បានបង្ហោះព័ត៌មាននៅលើទំព័រផេក facebook ផ្លូវការរបស់លោកថា៖ ទទួលបានដំណឹងភ្លាម (បងភ្លើងឆេះផ្សារក្រឡាញ់…) យើងចេញជួយអន្តរាគមន៍ភ្លាម។

អភិបាលស្រុកបន្ថែមថា៖ សូមអរគុណដល់កម្លាំងអធិការដ្ឋាននគរបាលស្រុកក្រឡាញ់យើង និងកិច្ចសហការល្អរបស់អធិការដ្ឋាននគរបាលស្រុកពួក ស្រុកស្រីស្នំ និងស្រុកព្រះនេត្រព្រះ បានចេញកម្លាំងនិងរថយន្តពន្លត់អគ្គីភ័យ មកជួយអន្តរាគមន៍ពន្លត់ ព្រមទាំងកម្លាំងសាមគ្គី របស់បងប្អូនអាជីវករជុំវិញផ្សារ បានចូលរួមនិងផ្ដល់បំពង់ពន្លត់អគ្គីភ័យ រហូតយើងគ្រប់គ្រងពន្លត់បានទាំងស្រុងដោយមិនមានឆេះឆ្លងរាលដាល និងមិនមានគ្រោះថ្នាក់ដល់មនុស្ស។

ទោះជាយ៉ាងណាអភិបាលស្រុកក្រឡាញ់មិនទាន់បញ្ជាក់អំពីមូលហេតុអំពីហេតុការណ៍អគ្គីភ័យនេះនៅឡើយទេ ទាំងការខូចខាតតូប ចំនួនទឹកប្រាក់សរុប ៕

ដោយ ៖ សិលា