ខេត្តកំពង់ធំ ៖ លោក នួន ផារ័ត្ន អភិបាលខេត្តកំពង់ធំ និងលោកជំទាវ អញ្ជើញចូលរួមក្នុងពិធីបញ្ចុះខណ្ឌសីមាព្រះវិហាថ្មីក្នុងវត្តគិរីវណ្ណារាម (វត្តគិរីអណ្តែត) ស្ថិតក្នុងភូមិគិរីអណ្តែត ឃុំទ្រៀល ស្រុកតាំងគោក ខេត្តកំពង់ធំ នាព្រឹកថ្ងៃទី១៦ ខែកុម្ភៈឆ្នាំ២០២៥។

លោក នួន ផារ័ត្ន បានរំលឹកពីអតីតកាលដែលប្រជាជនកម្ពុជាមិនអាចបំភ្លេចបានកាលពីទសវត្សរ៍ឆ្នាំ៧០ វិស័យព្រះពុទ្ធសាសនាត្រូវបានអាប់ឱនដោយសារសង្រ្គាមរបបប្រល័យពូជសាសន៍ប៉ុលពត។ បច្ចុប្បន្នវិស័យព្រះពុទ្ធសាសនានៅកម្ពុជា ត្រូវបានរស់ឡើងវិញនិងអភិវឌ្ឍយ៉ាងឆាប់រហ័សទាំងបរិមាណ និងគុណភាព ក្រោមម្លប់ នៃសុខសន្តិភាព ក្រោមការដឹកនាំដ៏ត្រឹមត្រូវសម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងការបន្តដឹកនាំលើមាគ៌ាដ៏ត្រឹមត្រូវនេះ របស់សម្ដេចមហាបវរធិបតី ហ៊ុនម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ វត្តអារាមកំពុងក្លាយជាកម្លាំងស្នូលនៃសុខដុមនីយកម្មរវាងអ្នកកាន់ព្រះពុទ្ធសាសនា ជាមួយអ្នកកាន់ជំនឿ និង សាសនាសផ្សេងៗទៀតដែលកំពុងមានវត្តមាននៅកម្ពុជាបច្ចុប្បន្ន។ ព្រះពុទ្ធសាសនាបានចាក់ឫសយ៉ាងជ្រៅទៅក្នុងក្រអៅបេះដូងរបស់ប្រជាជនកម្ពុជា ដែលប្រជាពុទ្ធបរិស័ទយកព្រះពុទ្ធសាសនាជាទីពឹងដើម្បីស្វែងរកសេចក្តីសុខសេចក្តីចម្រើនទាំងក្នុងបច្ចុប្បន្នជាតិ និងក្នុងអនាគតជាតិ។

លោកបានបន្ថែមទៀតថា វត្តអារាមគឺជាថ្នាលបណ្តុះបណ្តាលធនធានមនុស្ស ធនធានព្រះសង្ឃប្រកបដោយចំណេះដឹងជំនាញ និងគុណធម៌ ប្រកាន់ក្រឹត្យវិន័យតាមពុទ្ធប្បញ្ញត្តិ និងពុទ្ធានុញ្ញាត។ សូមព្រះចៅអធិការវត្ត និងគណៈកម្មការវត្ត ព្រមទាំងពុទ្ធបរិស័ទចំណុះជើងវត្តទាំងអស់ចូលរួមថែរក្សាសមិទ្ធផលនានាដែលបានកសាងនៅក្នុងវត្តឱ្យបានគង់វង្ស ជាទីកន្លែងសម្រាប់គោរពបូជាពុទ្ធបរិស័ទរៀងរាល់ថ្ងៃសីលផងដែរ។

សូមបញ្ជាក់ផងដែរថា ក្រោមការដឹកនាំរបស់ព្រះតេជគុណ ហេង សុភ័ក្រ បានកសាងលេចចេញជាសមិទ្ធ ផលផ្សេងៗជាក់ស្តែងនាឱកាសនេះនឹងត្រូវរៀបចំពិធីបុណ្យបញ្ចុះខណ្ឌសីមាព្រះវិហារ ទំហំ២៤ម៉ែត្រx២៣ម៉ែត្រ កំពល់១៨ម៉ែត្រ ដែលបានកសាងឡើងវិញចាប់ពីឆ្នាំ២០១៤ និងបានចំណាយថវិកាកសាងសរុបចំនួន៤០០.០០០ ដុល្លារអាមេរិកគត់៕

ដោយ ៖ សិលា