ភ្នំពេញ៖ ជនសង្ស័យ២នាក់ ត្រូវបានកម្លាំងនគរបាលបុស្ដិ៍រដ្ឋបាលឫស្សីកែវ ឃាត់ខ្លួន កាលពីយប់រំលងអធ្រាត្រ ឈានចូលថ្ងៃទី៣ ខែសីហា ឆ្នាំ២០១៥ ត្រង់ចំណុចផ្លូវបេតុង ម្ដុំផ្ទះក្រហម ក្នុងសង្កាត់ឫស្សីកែវ ខណ្ឌឫស្សីកែវ ខណៈដែលពួកគេកំពុងធ្វើសកម្មភាពដោះយកស្លាកលេខរថយន្តរបស់ប្រជាពលរដ្ឋឃើញ ហើយត្រូវបានក្រុមកម្លាំងនគរបាលល្បាតមូលដ្ឋានប្រទះឃើញ។
ប្រភពព័ត៌មានពីសមត្ថកិច្ចបានឲ្យដឹងថា ជនសង្ស័យដែលត្រូវបាននគរបាលឃាត់ខ្លួនទាំង២នាក់ ទី១ ឈ្មោះ កែវ សុភក្ដិ ភេទប្រុស អាយុ៣៤ឆ្នាំ មុខរបររើសអេតចាយ និងទី២ ឈ្មោះ ហេង សុភ័ណ្ឌ ភេទប្រុស អាយុ៣៦ឆ្នាំ មុខរបររត់ម៉ូតូឌុប ទាំង២នាក់ស្នាក់នៅផ្ទះជួលម្ដុំផ្លូវរថភ្លើង ស្ថិតក្នុង ភូមិផ្សារតូច សង្កាត់ទួលសង្កែ ខណ្ឌឫស្សីកែវ។
តាមប្រភពព័ត៌មានពីមន្រ្ដីនគរបាលមួយរូប ដែលជាអ្នកប្រទះឃើញជនសង្ស័យទាំង២នាក់បានឲ្យដឹងថា ខណៈពេលដែលគាត់កំពុងល្បាតក្នុងមូលដ្ឋាន ក៏ប្រទះឃើញជនសង្ស័យទាំង២នាក់ កំពុងធ្វើសកម្មភាពដោះយកស្លាករថយន្តដែលប្រជាពលរដ្ឋចតទុកនៅមុខផ្ទះរបស់គេ។ ពេលនោះគាត់មានការសង្ស័យថា ជនទាំង២នាក់នោះ ជាចោរលួចស្លាកលេខរថយន្ត ក៏ចាប់ឃាត់ខ្លួន ហើយឆែកឆេរកឃើញស្លាកលេខរថយន្តចំនួន៧បន្ទះបន្ថែមទៀត។
បច្ចុប្បន្នជនសង្ស័យកំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីធ្វើការសាកសួរបន្ត។ ទាក់ទិននឹងបញ្ហានេះ សមត្ថកិច្ចក៏បានអំពាវនាវឲ្យប្រជាពលរដ្ឋទាំងឡាយ មេត្តាបង្កើតការប្រុងប្រយ័ត្នក្នុងការទុកយានយន្តរបស់ខ្លួននៅមុខផ្ទះពេលយប់ ព្រោះបច្ចុប្បន្នករណីចោរលួចដោះយករថយន្តនេះ មានច្រើនណាស់ ហើយសមត្ថកិច្ចក៏មិនអាចជួយការពារបានគ្រប់ពេលវេលាដែរ ៕ ដោយ៖ វិបុល
