ខេត្តកំពង់ឆ្នាំង ៖ ម្រាមដៃស្តាំចំនួន២ខាងស្តាំបានដាច់ ចំណែកឯលើផ្ទៃមុខនិងខ្លួនបានរងរបួសយ៉ាងធ្ងន់ បន្ទាប់ពីថ្មទូរស័ព្ទមួយគ្រឿងបានផ្ទុះឮសម្លេងយ៉ាងខ្លាំងចេញពីក្នុងផ្ទះ ។ ដែលហេតុការណ៍ដ៍ភ្ញាក់ផ្អើលនេះបានកើតឡើងកាលពីវេលាម៉ោងជាង១១ ថ្ងៃទី២១ ខែសីហា ឆ្នាំ២០១៦ នៅភូមិក្រាំងស្គាត្បូង ឃុំក្រាំងស្គារ ស្រុកទឹកផុស ខេត្តកំពង់ឆ្នាំង ។
ស្រ្តីឈ្មោះសុ រ៉ាន់ ដែលជាម្តាយបង្កើតជនរងគ្រោះបានអោយដឹងថា ជនរងគ្រោះមានឈ្មោះ ឡត សារ៉ុម ភេទប្រុស អាយុ១៦ឆ្នាំ រស់នៅក្នុងភូមិឃុំកើតហេតុខាងលើ ។
ស្រ្តីជាម្តាយបានប្រាប់អោយដឹងទៀតថា នៅមុនពេលកើតហេតុគាត់នៅខាងក្រោមផ្ទះ ចំណែកកូនប្រុសរបស់គាត់សម្ងំនៅលើផ្ទះ ប៉ុន្តែគាត់មិនដឹងថា កូនគាត់ធ្វើអីនោះទេ ស្រាប់តែ ដល់ពេលកើតហេតុមានសម្លេងផ្ទុះយ៉ាងខ្លាំង ចេញពីកន្លែងដែលកូនគាត់កំពុងសំងំ ហើយបានឮសម្លេងកូនរបស់គាត់ស្រែកយ៉ាងខ្លាំងក្រោយពេលផ្ទុះ ពេលនោះពួកគាត់បានឡើងទៅមើលក៍ប្រទះឃើញកូនរបស់គាត់ដេកស្តូកស្តឹង និង មានរងរបួសលើផ្ទៃមុខ ទ្រូង និង ដាច់ម្រាមដៃផងដែរ ហើយឈាមឡើងក្រហមច្រាលតែម្តង ។
ស្ត្រីរូបនេះបានអោយដឹងទៀតថា ឃើញដូចនេះរូបគាត់និងអ្នកជិតខាងប្រញាប់ដឹកកូនតាមគោយន្តមកសង្រ្គោះបឋមនៅមណ្ឌលសុខភាព ប៉ុន្តែដោយសារស្ថានភាពធ្ងន់ធ្ងរពេក ហៅរថយន្តសង្រ្គោះរបស់មន្ទីរពេទ្យខេត្តកំពង់ឆ្នាំងដឹកបញ្ជូនបន្តមកសង្រ្គោះនៅមន្ទីរពេទ្យបង្អែកខេត្តកំពង់ឆ្នាំង ។
ពាក់ព័ន្ធនិងករណីនេះសមត្ថកិច្ចមូលដ្ឋានបានប្រាប់អោយដឹងថា មូលហេតុដែល បណ្តាលអោយផ្ទុះថ្មទូរស័ព្ទនេះ គឺបន្ទាប់ពីជនរងគ្រោះបានច្នៃថ្មទូរស័ព្ទ ធ្វើជាពិលសម្រាប់បំភ្លឺ ហើយពេលដែលកំពុងតែធ្វើការកែច្នៃនេះ បណ្តាលអោយផ្ទុះ និង រងរបួសដាច់ម្រាមដៃ មុខ និង ទ្រូង តែម្តង៕
ដោយៈ ចន្ថា
