ភ្នំពេញ ៖ នាយឧត្តមសេនីយ៍ ស ថេត អគ្គស្នងការនគរបាលជាតិ នៅព្រឹកថ្ងៃព្រហស្បតិ៍ ទី៣ ខែមេសា ឆ្នាំ២០២៥នេះ បានអនុញ្ញាតឱ្យ លោកវរសេនីយ៍ឯក វឿង ក្វាងបាក់ ប្រធានស្ថានតំណាងក្រសួងនគរបាល អមស្ថានទូតសាធារណរដ្ឋសង្គមនិយមវៀតណាម ប្រចាំព្រះរាជាណាចក្រកម្ពុជា និងសហការី ចូលជួបសម្តែងការគួរសម និងជូនពរក្នុងឱកាសពីធីបុណ្យចូលឆ្នាំថ្មី ប្រពៃណីជាតិខ្មែរ នៅទីស្តីការក្រសួងមហាផ្ទៃ។
ជាកិច្ចចាប់ផ្តើម លោកវរសេនីយ៍ឯក ក្វាងបាក់ បានសម្តែងនូវការជូនពរ និងអបអរសាទរពីធីបុណ្យប្រពៃណីជាតិខ្មែរជូនដល់ នាយឧត្តមសេនីយ៍ ស ថេត អគ្គស្នងការនគរបាលជាតិ និងកងកម្លាំងនគរបាលជាតិនៅទូទាំងប្រទេស។ ក្នុងនាមប្រធានស្ថានតំណាងក្រសួងនគរបាល អមស្ដានទូតវៀតណាម ប្រចាំព្រះរាជាណាចក្រកម្ពុជា ក៏បាននាំនូវការផ្តាំផ្ញើសាកសួរសុខទុក្ខពីសំណាក់ លោក ឧត្តមសេនីយ៍ឯក លឿង តាមក្វាង រដ្ឋមន្ត្រីក្រសួងនគរបាលវៀតណាម ជូនដល់សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក នាយឧត្តមសេនីយ៍ អគ្គស្នងការនគរបាលជាតិ និងមន្ត្រីក្រោមឱវាទក្រសួងមហាផ្ទៃ។
ជាមួយគ្នានេះ ក្នុងនាមក្រសួងនគរបាលវៀតណាម បានធ្វើការកោតសរសើរ និងវាយតម្លៃខ្ពស់ចំពោះលទ្ធផលនៃកិច្ចសហប្រតិបត្តិការដែលកងកម្លាំងនគរបាលជាតិនៃប្រទេសទាំងពីរបានសហការគ្នាកន្លងមកប្រកបដោយភាពជិតស្និទ ស្មោះត្រង់ដោយប្រសិទ្ធភាព និងលទ្ធផលគួរជាទីមោទនៈ។ ក្នុងនាមប្រធានស្ថានតំណាងក្រសួងនគរបាលវៀតណាម សូមគោរពស្នើសុំ នាយឧត្តមសេនីយ៍ ស ថេត អគ្គស្នងការនគរបាលជាតិ មេត្តាផ្តល់កិច្ចគាំទ្រដល់ស្ថានតំណាងក្រសួងនគរបាល អមស្ថានទូតសាធាររដ្ឋសង្គមនិយមវៀតណាមប្រចាំព្រះរាជាណាចក្រកម្ពុជា បានប្រតិបត្តិការរបស់ខ្លួនដើម្បីឱ្យសម្រេចបានលទ្ធផលកាន់តែល្អប្រសើរបន្ថែមទៀត។ ជាការឆ្លើយតប នាយឧត្តមសេនីយ៍ ស ថេត អគ្គស្នងការនគរបាលជាតិ បានថ្លែងអំណរគុណចំពោះកាផ្តាំផ្ញើសាកសួរសុខទុក្ខ និងបានផ្តាំផ្ញើការថ្លែងអំណរគុណជូន លោក ឧត្តមសេនីយ៍ឯក លឿម តាមក្វាង រដ្ឋមន្ត្រីក្រសួងនគរបាលវៀតណាម សម្រាប់ការទទួលបដិសណ្ឋាកិច្ចយ៉ាងកក់ក្តៅក្នុងអំឡុងពេលការបំពេញទស្សនកិច្ចរបស់ លោកអភិសន្តិបណ្ឌិត ស សុខា នៅទីក្រុងហាណូយ ប្រទេសវៀតណាម កាលពីពេលថ្មីៗនេះ។ ជាមួយគ្នានេះ លោក នាយឧត្តម អគ្គស្នងការនគរបាលជាតិ បានឯកភាពចំពោះលទ្ធផលនៃកិច្ចសហប្រតិបត្តិការដែលនគរបាលជាតិ នៃប្រទេសទាំងពីរសម្រេចបានមានដូចជា៖ ការប្រយុទ្ធប្រឆាំងបទល្មើសលួចឆ្លងដែនគ្រប់ប្រភេទ បទល្មើសគ្រឿងញៀន បទល្មើសជួញដូរមនុស្ស អំពើឆបោកជាដើម ដែលរំពឹងថាកិច្ចសហប្រតិបត្តិការនេះកាន់តែមានដំណើរការល្អបន្ថែមទៀតនៅពេលខាងមុខ។
ជាចុងក្រោយ លោក នាយឧត្តមសេនីយ៍ ស ថេត អគ្គស្នងការនគរបាលជាតិ បានឯកភាពចំពោះការបង្កលក្ខណៈងាយស្រួលគ្រប់បែបយ៉ាងដល់ស្ថានតំណាងក្រសួងនគរបាលអមស្ថានទូតវៀតណាម ប្រចាំព្រះរាជាណាចក្រកម្ពុជា សម្រាប់ការបំពេញបេសសកម្មក្នុងប្រទេសកម្ពុជា ជាពិសេសក៏សូមអបអរសាទរចំពោះការចូលកាន់តំណែងថ្មីរបស់ លោកវរសេនីយ៍ឯក វឿង ក្វាងបាក់ និងជូនពរសូមឱ្យលោកបំពេញបេសសកម្មក្នុងអណត្តិថ្មីនៅកម្ពុជាប្រកបដោយភាពជោគជ័យបន្ថែមទៀត៕
ដោយ ៖ សិលា
