ភ្នំពេញ ៖ ក្រសួងយុត្តិធម៌ សម្រេច ត្រូវបានដាក់ឱ្យដំណើរការអង្គភាពអាជ្ញាសាលានៅតាមសាលាដំបូងរាជធានី ខេត្ត ចំនួន ៨ (ប្រាំបី) ដូចខាងក្រោម៖

១. អង្គភាពអាជ្ញាសាលានៅសាលាដំបូងរាជធានីភ្នំពេញ

២. អង្គភាពអាជ្ញាសាលានៅសាលាដំបូងខេត្តកណ្តាល

៣. អង្គភាពអាជ្ញាសាលានៅសាលាដំបូងខេត្តសៀមរាប

៤. អង្គភាពអាជ្ញាសាលានៅសាលាដំបូងខេត្តបាត់ដំបង

៥. អង្គភាពអាជ្ញាសាលានៅសាលាដំបូងខេត្តព្រះសីហនុ

៦. អង្គភាពអាជ្ញាសាលានៅសាលាដំបូងខេត្តបន្ទាយមានជ័យ

៧. អង្គភាពអាជ្ញាសាលានៅសាលាដំបូងខេត្តកំពង់ចាម

៨. អង្គភាពអាជ្ញាសាលានៅសាលាដំបូងខេត្តកំពង់ស្ពឺ។

អង្គភាពអាជ្ញាសាលានៅតាមសាលាដំបូងរាជធានី ខេត្ត ខាងលើនេះ ចាប់ផ្តើមដំណើរការចាប់ពី ថ្ងៃទី២ ខែឧសភា ឆ្នាំ២០២៥ នេះតទៅ។

អង្គភាពអាជ្ញាសាលានៅតាមសាលាដំបូងនីមួយៗ មានទីតាំងស្ថិតនៅតាមសាលាដំបូងនោះ និងមាន សមត្ថកិច្ចពិនិត្យ គ្រប់គ្រង និងចាត់ចែងកិច្ចការដែលជាសមត្ថកិច្ចរបស់អាជ្ញាសាលា ដែលស្ថិតនៅក្នុងសមត្ថកិច្ច ដែនដីរបស់សាលាដំបូងរាជធានី ខេត្ត ដែលអង្គភាពអាជ្ញាសាលានោះស្ថិតនៅ ស្របតាមការកំណត់របស់ច្បាប់ និងប្រកាសលេខ ០៤៣ កយ.ប្រក/២៥ ចុះថ្ងៃទី២៥ ខែមីនា ឆ្នាំ២០២៥ ស្តីពីការរៀបចំ និងការប្រព្រឹត្តទៅ នៃអង្គភាពអាជ្ញាសាលានៅតាមសាលាដំបូងរាជធានី ខេត្ត ព្រមទាំងលិខិតបទដ្ឋានគតិយុត្តជាធរមានផ្សេងទៀត។

ចំពោះសំណុំរឿងអនុវត្តដែលកំពុងស្ថិតក្នុងចំណាត់ការរបស់មន្ត្រីអាជ្ញាសាលា ឬមន្ត្រីទទួលបន្ទុកកិច្ចការ អាជ្ញាសាលា មុនកាលបរិច្ឆេទដាក់ឱ្យដំណើរការអង្គភាពអាជ្ញាសាលាដូចមានកំណត់ក្នុងប្រការ១ នៃប្រកាសនេះ ត្រូវបន្តចាត់ការដោយមន្ត្រីអាជ្ញាសាលា ឬមន្ត្រីទទួលបន្ទុកកិច្ចការអាជ្ញាសាលានោះ ស្របតាមច្បាប់ និងនីតិវិធី ជាធរមាន។

ចំពោះសាលាដំបូងដែលមិនទាន់មានអង្គភាពអាជ្ញាសាលា ត្រូវបន្តអនុវត្តតាមប្រកាសលេខ ៣០ កយប្រក/០៧ ចុះថ្ងៃ១៩ ខែកក្កដា ឆ្នាំ២០០៧ ស្តីពីមន្ត្រីទទួលបន្ទុកកិច្ចការអាជ្ញាសាលា។

នាយកខុទ្ទកាល័យ អគ្គលេខាធិការនៃអគ្គលេខាធិការដ្ឋាន អគ្គនាយកនៃអគ្គនាយកដ្ឋានកិច្ចការរដ្ឋបាល តុលាការ អគ្គនាយកនៃគ្រប់អគ្គនាយកដ្ឋាន អគ្គាធិការនៃអគ្គាធិការដ្ឋានកិច្ចការតុលាការ សាលាជម្រះក្តី និង អង្គការអយ្យការអមសាលាជម្រះក្តីគ្រប់ជាន់ថ្នាក់ និងប្រធានគ្រប់អង្គភាពក្រោមឱវាទក្រសួងយុត្តិធម៌ ត្រូវ ទទួលបន្ទុកអនុវត្តប្រកាសនេះ តាមភារកិច្ចរៀងៗខ្លួន ចាប់ពីថ្ងៃចុះហត្ថលេខាតទៅ ៕

ដោយ ៖ សិលា