ខេត្តក្រចេះ៖ សមត្ថកិច្ចបើករថយន្តដេញប្រមាញ់ចាប់ឡានដឹកឈើដែលមិនបានចូលបង់លុយ តែខ្វះការប្រុងប្រយ័ត្នក៏ជ្រុលចង្កូតទៅបុករថយន្តយោធា បង្កអោយខូចខាតយ៉ាងដំណំ ហើយក្រោយមកខាងសមត្ថកិច្ចបង្កហេតុក៏យករថយន្តរបស់ខ្លួនទៅលាក់ទុកដើម្បីមកចចារគ្នាបញ្ចប់រឿង និងមិនអោយបែកធ្លាយទៅខាងក្រៅ។
ហេតុការណ៍ខាងលើបានកើតឡើងកាលពីវេលាម៉ោង៥និង៣០នាទីល្ងាចថ្ងៃទី២២ ខែសីហា ឆ្នាំ២០១៦ នៅចំណុចឃុំ២ធ្នូ ស្រុកស្នួល ខេត្តក្រចេះ បង្កដោយរថយន្តសមត្ថកិច្ចបើករថយន្តម៉ាកកាមរីឆ្លាម ពណ៍ត្រីឆ្លូញ របស់ឈ្មោះ ឥដ្ឋ ប៊ុនណា ហៅតោ បុករថយន្តហាយឡែនឌឺររបស់យោធានៅវរះការពារព្រំដែនលេខ២០៤។
សាក្សីនៅកន្លែងកើតហេតុបានអោយដឹងថាៈ មុនពេលបង្កហេតុគេបានឃើញរថយន្តដឹកឈើមួយគ្រឿងបានបើកឆ្លងកាត់តាមផ្លូវមុខកន្លែងធ្វើការរបស់លោក ឥដ្ឋ ប៊ុនណា ហៅតោ គាត់ក៏បានបើករថយន្តប្រដេញ តែដេញមិនទាន់ក៏ជ្រុលចង្កូតទៅបុករថយន្តយោធានោះតែម្តង។ បន្ទាប់មកយករថយន្តទៅលាក់ទុកដើម្បីមកសម្របសម្រួលជាមួយជនរងគ្រោះបញ្ចប់រឿង៕
ដោយ៖ សុខ ខេមរា
