ខេត្ត​ព្រះសីហនុ៖ លោកឧបនាយករដ្ឋមន្រ្តី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) នៅក្នុងពិធីបើកការដ្ឋានសាងសង់រោងចក្រដំឡើងយានយន្តរបស់ ក្រុមហ៊ុន ប៊ី វ៉ាយ ឌី ខេមបូឌា ឯ.ក ( BYD CAMBODIA CO., LTD. )​ នាថ្ងៃទី២៨ ខែមេសា ឆ្នាំ២០២៥នេះ​ បានបង្ហាញនូវសុទិដ្ឋិនិយមខ្ពស់ចំពោះ វត្តមានរបស់ក្រុមហ៊ុន BYD Cambodia នឹងបន្តដើរតួនាទីយ៉ាងសំខាន់ក្នុងការដឹកនាំ ផ្សព្វផ្សាយ និងទាក់ទាញក្រុមហ៊ុនធំៗ របស់ប្រទេសចិន និងបណ្ដាប្រទេសដទៃទៀត មកបណ្តាក់ទុនវិនិយោគនៅកម្ពុជា ឱ្យកាន់តែច្រើនបន្ថែមទៀត។

នាឱកាសនោះ លោកឧបនាយករដ្ឋមន្រ្តី ស៊ុន​ ចាន់ថុល​ ក៏បានអំពាវនាវឱ្យ ក្រុមហ៊ុន BYD ពិចារណាទាក់ទាញរោងចក្រ ដែលជាខ្សែច្រវាក់ផលិតកម្មរបស់ខ្លួន មកវិនិយោគនៅកម្ពុជាបន្ថែមទៀត។ ព្រមទាំងលើកទឹកចិត្តដល់វិនិយោគិនទាំងអស់ បន្តចូលរួមផ្សព្វផ្សាយព័ត៌មានល្អៗ អំពីបរិយាកាសវិនិយោគនៅកម្ពុជា ទៅកាន់វិនិយោគិនផ្សេងៗទៀត ដើម្បីធ្វើការទាក់ទាញវិនិយោគិន មកបណ្តាក់ទុនវិនិយោគបន្ថែមទៀតនៅកម្ពុជា ដើម្បីបង្កើតការងារបន្ថែម ជូនបងប្អូនប្រជាពលរដ្ឋកម្ពុជា ក៏ដូចជាជំរុញកំណើនសេដ្ឋកិច្ចជាតិ ដើម្បីឆ្ពោះទៅសម្រេចបានចក្ខុវិស័យជាប្រទេសមានចំណូលខ្ពស់នៅឆ្នាំ២០៥០។

លោកឧបនាយករដ្ឋមន្ត្រី​ ក៏បានស្នើសុំឱ្យក្រុមហ៊ុន BYD Cambodia ជួយផ្តល់ការបណ្តុះបណ្តាលជំនាញបច្ចេកទេសថ្មីៗ ក្នុងវិស័យយានយន្តអគ្គិសនី ដល់កម្មករនិយោជិតរបស់ក្រុមហ៊ុន ដើម្បីរួមចំណែកអភិវឌ្ឍធនធានមនុស្ស និងបំពាក់បំប៉នជំនាញបច្ចេកទេសរថយន្ត ដល់ប្រជាពលរដ្ឋកម្ពុជាផងដែរ។

លោកឧបនាយករដ្ឋមន្រ្តី មានប្រសាសន៍បន្ថែមថា «ខ្ញុំជឿជាក់យ៉ាងមុតមាំថា ការវិនិយោគសាងសង់រោងចក្រប្រភេទ CKD របស់ក្រុមហ៊ុន BYD នៅដំណាក់កាលទី១ នៅកម្ពុជានឹងទទួលបានជោគជ័យយ៉ាងត្រចះត្រចង់ ហើយក៏សង្ឃឹមថាក្រុមហ៊ុននឹងពិចារណាពង្រីកការវិនិយោគរបស់ខ្លួន លើដំណាក់កាលបន្ទាប់ទៀត សម្រាប់រោងចក្រដំឡើងរថយន្តជាប្រភេទ IKD ដើម្បីផលិតគ្រឿងបង្គុំមួយចំនួននៅកម្ពុជា សម្រាប់នាំចេញផ្គត់ផ្គង់ខ្សែច្រវាក់ផលិតកម្មជាមួយរោងចក្រ BYD នៅប្រទេសថៃ (Thailand Plus One) នាពេលឆាប់ៗខាងមុខនេះ»។

សូមជម្រាបថា ក្រុមហ៊ុន BYD នឹងបណ្ដាក់ទុនប្រមាណ ៣២លានដុល្លារអាម៉េរិក សម្រាប់ដំណាក់កាលទី១ លើការបង្កើតរោងចក្រផ្គុំដំឡើងយានយន្តប្រភេទ CKD សម្រាប់ដំឡើងរថយន្តអគ្គិសនីសុទ្ធ (EV) និងអគ្គិសនីលាយសាំង (PHEV) ដែលរោងចក្រនេះមានសមត្ថភាពដំឡើងរថយន្តប្រមាណ ១០ ០០០គ្រឿង ក្នុងមួយឆ្នាំ ទៅតាមដំណាក់កាល ហើយសាងសង់លើផ្ទៃដីប្រមាណ ១២ហិកតា មានទីតាំងស្ថិតនៅតំបន់សេដ្ឋកិច្ចពិសេសក្រុងព្រះសីហនុ។ រោងចក្រដំឡើងរថយន្ត BYD Cambodia គ្រោងនឹងបញ្ចប់ការសាងសង់នៅខែតុលា និងចាប់ផ្តើមដំណើរការផលិតកម្មដំឡើងរថយន្តអគ្គិសនីជាលើកដំបូងនៅ កម្ពុជា នាដើមខែវិច្ឆិកា ឆ្នាំ២០២៥ ខាងមុខនេះ៕ ដោយ​៖តារា​