ខេត្តបន្ទាយមានជ័យ ៖ បុរសអ្នកបើកបរត្រាក់ទ័រភ្ជួរចម្ការប៉ះមីនតោនព្រលឹងចុងសក់បើកចេញយ៉ាងរហ័ស បង្កការភ្ញាក់ផ្អើលនៅរសៀលថ្ងៃទី០៥ ខែឧសភា ឆ្នាំ២០២៥ ស្ថិតនៅភូមិតេជោភ្នំឆ័ត្រ ឃុំ/ស្រុកស្វាយចេក ខេត្តបន្ទាយមានជ័យ។
អធិការនគរបាលស្រុកស្វាយចេក លោកវរៈសេនីយ៍ឯក ជា ឈ្លូញស្វាយចេក បានឱ្យដឹងថា ម្ចាស់ចម្ការឈ្មោះ ចក់ ទីន ភេទប្រុស អាយុ៦២ឆ្នាំ រស់នៅភូមិកើតហេតុខាងលើ ។
លោកអធិការបានបញ្ជាក់ថា នៅពេលដែលម្ចាស់ចម្ការឈ្មោះ ចក់ ទីន បានជួលត្រាក់ទ័រមកភ្ជួរដីចម្ការ ដើម្បីដាំដំណាំ ហើយពេលភ្ជួរជិតរួចហើយ ស្រាប់តែប្រទះឃើញមីនតោន១គ្រាប់នៅចំកណ្តាលចម្ការដែលភ្ជួររួចបណ្តាល ឲ្យអ្នកបើកបរត្រាក់ទ័រលាន់មាត់ថា ពិតជា១លានសំណាងហើយ ក៏បើកបរត្រាក់ចេញដោយមិនបានលាម្ចាស់ចម្ការ ។
លោកវរៈសេនីយ៍ឯក ជា ឈ្លូញ បានបញ្ជាក់ថា ក្រោយប្រជាពលរដ្ឋភ្ជួរដីចម្ការប្រទះឃើញមីនតោនមួយគ្រាប់ដែលមានគុណភាព ហើយបានរាយការណ៍ជូនអាជ្ញាធរមូលដ្ឋាននិងប៉ុស្តិ៍នគរបាលឃុំស្វាយចេក បានទំនាក់ ទំនងអង្គភាពកម្ចាត់មីន (ហាឡូត្រាស់)បានមកទទួល យក ដើម្បីយកទៅកម្ទេចចោល ។
មន្ត្រីកម្លាំងអង្គភាពកម្ចាត់មីនបានប្រាប់ថា មីនតោនដែលប្រជាពលរដ្ឋប្រទះឃើញនេះនៅមានគុណភាព ហើយជាមីនសេសសល់ពីសម័យសង្គ្រាម។ ពេលប្រជាពលរដ្ឋប្រទះឃើញរាយការជូនអង្គភាពកម្ចាត់មីន ហើយបានណែនាំដល់ប្រជាពលរដ្ឋ បើប្រទះឃើញគ្រាប់យុទ្ធភ័ណមិនទាន់ផ្ទុះសុំរាយការណ៍ជូនអង្គភាពបោស សំអាតមីន ដោយមិនត្រូវប៉ះពាល់ ព្រោះអាចប្រឈមគ្រោះថ្នាក់គ្រប់ពេល ៕
