ភ្នំពេញ៖ មានហេតុការណ៍អគ្គិភ័យមួយបង្កឲ្យមានការភ្ញាក់ផ្អើលដល់ប្រជាពលរដ្ឋយ៉ាងខ្លាំង ខណៈដែលម៉ូតូស្ទេបមួយគ្រឿងត្រូវបានអណ្ដាតភ្លើងឆាបឆេះយ៉ាងសន្ធោសន្ធៅ ។
ហេតុការណ៍នេះដែរបានកើតឡើងកាលពីវេលាម៉ោង៨និង៣០នាទីយប់ថ្ងៃទី២៥ ខែសីហា ឆ្នាំ២០១៥ នៅចំណុចផ្លូវលេខ១៥៤កែងនិងផ្លូវលេខ៦៣ ស្ថិតក្នុងសង្កាត់ ផ្សាថ្មី៣ ខណ្ឌដូនពេញ រាជធានីភ្នំពេញ។
ប្រភពព័ត៌មានពីប្រជាពលរដ្ឋដែលបានឃើញហេតុការណ៍ខាងលើបាននិយាយប្រាប់ឲ្យដឹងថា នៅមុនពេលមានអគ្គិភ័យឆាបឆេះម៉ូតូខាងលើ គេបានឃើញយុវជនម្នាក់ជិះម៉ូតូម៉ាកស្ទេប ពណ៌ខ្មៅ គ្មានស្លាកលេខ ធ្វើដំណើរតាមបណ្ដោយផ្លូវលេខ៦៣ ទិសដៅពីត្បូងទៅជើង ពេលមកដល់ចំណុចកើតហេតុម៉ូតូរបស់គេក៏បានឆ្លងចរន្ដភ្លើងឆាបឆេះចេញជាអណ្ដាតភ្លើងយ៉ាងសន្ធោសន្ធៅតែម្ដង តែមិនបណ្ដាលឲ្យម្ចាស់ម៉ូតូរងរបួស។
ប្រភពដដែលបានប្រាប់បន្តថា ពេលដែលអណ្ដាតភ្លើងកំពុងតែឆាបឆេះ ប្រជាពលរដ្ឋដែលនៅជិតកន្លែងកើតហេតុបាននាំគ្នាជួយយកបំពង់ពន្លត់អគ្គិភ័យនិងយកទឹកទៅជះពន្លត់ទើបរលត់ទៅវិញចំណែកម្ចាស់ម៉ូតូគេចខ្លួនបាត់។
ក្រោយពីកើតហេតុសមត្ថកិច្ចមូលដ្ឋានបានចុះដល់កន្លែងកើតហេតុ ហើយបានយកម៉ូតូដែលឆេះអស់សល់តែគ្រោងឆ្អឹងនោះយកទៅរក្សាទុកនៅប៉ុស្ដិ៍រដ្ឋបាលនគរបាលផ្សាថ្មី៣៕
ដោយ៖ ជីម ភារ៉ា ដង្កោ
...
