ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅព្រឹកថ្ងៃពុធ ១០រោច ខែពិសាខ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២១ ខែឧសភា ឆ្នាំ២០២៥នេះ អញ្ជើញសម្ពោធសមិទ្ធផលកំណែទម្រង់វិទ្យាស្ថានជាតិអប់រំ និងប្រគល់សញ្ញាបត្រជូននិស្សិត និងគរុនិស្សិត នៃវិទ្យាស្ថានជាតិអប់រំ។

វិទ្យាស្ថានជាតិអប់រំ គឺជាគ្រឹះស្ថានបណ្តុះបណ្តាលគ្រូបង្រៀន ដែលមានអាយុកាល១១១ឆ្នាំមកហើយ និងបានដើរតួនាទីជាប្រវត្តិសាស្ត្រក្នុងការ បណ្តុះបណ្តាល​គ្រូបង្រៀននៅក្នុងប្រទេសកម្ពុជា។ ស្ថិតនៅចំកណ្តាល​រាជធានីភ្នំពេញ វិទ្យាស្ថានជាតិអប់រំ គឺជាអង្គភាពមួយក្រោមឱវាទ ក្រសួងអប់រំ យុវជន និងកីឡា ដែលផ្តល់ការបណ្តុះបណ្តាលដំបូង និងការបណ្តុះបណ្តាលបន្តដល់គ្រូបង្រៀន កម្រិតមធ្យមសិក្សា និងការអភិវឌ្ឍវិជ្ជាជីវៈជាប្រចាំ សម្រាប់គ្រូបង្រៀន អ្នកដឹកនាំសាលារៀន អធិការអប់រំ និងមន្ត្រីអប់រំ នៅថ្នាក់ជាតិនិងថ្នាក់ក្រោមជាតិ។

វិទ្យាស្ថាននេះត្រូវបាន ផ្លាស់ប្ដូរឈ្មោះ និងភារកិច្ចជាបន្តបន្ទាប់ទៅ​តាមការវិវត្តនៃដំណាក់កាលសង្គម និងនយោបាយរបស់កម្ពុជា។

នៅឆ្នាំ២០០៤ រាជរដ្ឋាភិបាល បានសម្រេចប្រែក្លាយសាលា​បណ្តុះបណ្តាលគ្រូនេះទៅវិទ្យាស្ថានជាតិអប់រំមានឋានៈស្មើអគ្គនាយកដ្ឋាន និងមានបេសកកម្ម បណ្តុះបណ្តាលជាច្រើនកម្មវិធី រួមមាន៖ ១). បណ្តុះបណ្តាល គ្រូ​បង្រៀន​កម្រិតឧត្តមតាមរូបមន្ត (បរិញ្ញាបត្រ+១ និងបរិញ្ញាបត្រ+២), ២). បណ្តុះបណ្តាលគ្រូបង្រៀនកម្រិតមូលដ្ឋានភាសាបារាំងតាមរូបមន្ត (១២+២), ៣). បណ្តុះបណ្តាលថ្នាក់បរិញ្ញាបត្រជាន់ខ្ពស់គ្រប់គ្រងអប់រំ, ៤). បណ្តុះបណ្តាលថ្នាក់បណ្ឌិតគ្រប់គ្រងអប់រំ និងបណ្ឌិតអប់រំឯកទេសកម្ម​វិធីសិក្សានិងវិធីសាស្ត្របង្រៀន, ៥). បណ្តុះបណ្តាលអធិការកិច្ចអប់រំ, ៦). បណ្តុះបណ្តាលវិជ្ជាជីវៈនាយកសាលាមធ្យមសិក្សាទុតិយភូមិ, ៧). បណ្តុះបណ្តាលថ្នាក់បរិញ្ញាបត្រជាន់ខ្ពស់ជំនាញប្រឹក្សាគរុកោសល្យ និង ៨). បណ្តុះ​បណ្តាលថ្នាក់បរិញ្ញាបត្រជាន់ខ្ពស់ជំនាញវិធីសាស្ត្រ​បង្រៀនភាសាបារាំង។

នៅឆ្នាំ២០២២ វិទ្យាស្ថានជាតិអប់រំបានប្រែក្លាយ​ទៅជាគ្រឹះស្ថានឧត្តមសិក្សាពេញលេញចែកចេញជាបួនអង្គភាព (ឋានៈស្មើនាយកដ្ឋាន) រួមមាន៖ មហាវិទ្យាល័យគរុកោសល្យ សាលាក្រោយបរិញ្ញាបត្រ មជ្ឈមណ្ឌល​ស្រាវជ្រាវអប់រំ និងនវានុវត្តន៍ និងអង្គភាពកិច្ចការទូទៅ និងចែកចេញជា ១៤ការិយាល័យ/ដេប៉ាតឺម៉ង់។

នៅក្នុងអាណត្តិទី៦ នៃរាជរដ្ឋាភិបាលកម្ពុជា (២០១៨-២០២៣) ក្រសួងអប់រំ យុវជន និងកីឡាបានផ្តល់អាទិភាពលើកំណែទម្រង់គ្រូបង្រៀន និង​កំណែទម្រង់គ្រឹះស្ថានបណ្តុះបណ្តាលគ្រូបង្រៀន។

ក្រសួងបានបង្កើតគណៈកម្មាធិការកំណែទម្រង់វិទ្យាស្ថានជាតិអប់រំ ដើម្បីធ្វើកំណែទម្រង់ស៊ីជម្រៅ និងគ្រប់ជ្រុងជ្រោយ ទាំងហេដ្ឋារចនាសម្ព័ន្ធរូបវន្ត (ផ្នែករឹង) និងកម្មវិធីសិក្សា។ មកទល់បច្ចុប្បន្ន វិទ្យាស្ថានជាតិអប់រំបានប្រែប្រួលមុខមាត់យ៉ាងខ្លាំង។ នាពេលអនាគត វិទ្យាស្ថានក៏មានសក្តានុពល ក្នុងការក្លាយខ្លួនទៅជាគ្រឹះស្ថានរដ្ឋបាលសាធារណៈ។ វិទ្យាស្ថានជាតិ​អប់រំមានចក្ខុវិស័យជាមជ្ឈមណ្ឌលឧត្តមភាពក្នុងការអប់រំគ្រូបង្រៀន ការអភិវឌ្ឍវិជ្ជាជីវៈ និងការស្រាវជ្រាវ។

នៅក្នុងបរិវេណនៃវិទ្យាស្ថានជាតិអប់រំទាំងមូល ដែលមានផ្ទៃក្រឡាសរុប ២៧,១៩៨ម៉ែត្រក្រឡា ទទួលបានការកែលម្អទាំងស្រុងទាំងក្នុង និង​ក្រៅបរិវេណ ដូចខាងក្រោម៖

ទី១៖ ការសាងសង់អគារសិក្សាមហាវិទ្យាល័យគរុកោសល្យមួយខ្នង ដែល​ជាអំណោយរបស់សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។ អគារសិក្សានេះរួមមាន បន្ទប់សិក្សា៣៦, បន្ទប់ ពិសោធន៍វិទ្យាសាស្ត្រ ៤, បន្ទប់កុំព្យូទ័រ ២ មានកុំព្យូរទ័រ៦០គ្រឿង, មជ្ឈ​មណ្ឌលសិក្សា អេឡិចត្រូនិក, បន្ទប់សាស្ត្រាចារ្យ, បន្ទប់គណៈ​គ្រប់​គ្រង​មហា​វិទ្យាល័យគរុកោសល្យ និងដេប៉ាតឺម៉ង់ទាំង៣, បណ្ណាគារ, គរុកាហ្វេ, និងអាហារដ្ឋាន។ គ្រប់បន្ទប់រៀនទាំង អស់ត្រូវបានបំពាក់សម្ភារៈ​ថ្នាក់រៀន​វៃ​ឆ្លាត និងឧបករណ៍បច្ចេកវិទ្យា ដើម្បីគាំទ្រដល់ការបណ្តុះបណ្តាលសតវត្សរ៍​ទី២១។ អគារនេះមានចំណតរថយន្តក្រោមដីមួយជាន់។ អគារសិក្សានេះដើរតួនាទីស្នូល ក្នុងការបណ្តុះបណ្តាលគ្រូបង្រៀនកម្រិតឧត្តម បរិញ្ញាបត្រ​បូក ២ (BA+2)។

ទី២៖ ការសាងសង់បណ្ណាល័យសម្តេចព្រះសង្ឃរាជ ជួន ណាត មួយខ្នង មានកម្ពស់ ៥ជាន់ ស្មើនឹង ៣៧បន្ទប់ ក្រោមហិរញ្ញប្បទានកម្ចីពី​ធនាគារ​អភិ​វឌ្ឍន៍អាស៊ី (ADB)។ បណ្ណាល័យសម្តេចព្រះសង្ឃរាជ ជួន ណាត ត្រូវ​បានរចនាឡើង ដោយឈរលើទស្សនាទានបីរួមគ្នាគឺ អប់រំ វប្បធម៌ និង​សាស​នា។ អគារនេះមានទម្រង់ ជាអក្សរ «រ» នៅពីលើអក្សរ «អ» ដែលតំណាងឱ្យការអប់រំ ដោយប្រើប្រាស់ខឿន និងផ្កាភ្ញីប្រាសាទអង្គរ ដែល​តំណាង​ឱ្យវប្បធម៌ជាតិ និងមានដំបូលលើមាត់ទ្វាររាងដូច ដំបូលព្រះវិហារ ដែលតំណាងឱ្យព្រះពុទ្ធសាសនា។

បណ្ណាល័យបានប្រមូលផ្តុំឯកសារ ស្តីពីការអប់រំរបស់កម្ពុជា ចាប់តាំង​ពី​មុន​សម័យអណានិគមបារាំង រហូតដល់ពេលបច្ចុប្បន្ន និងរួមទាំង​បណ្ណាល័យ​ទូរនិម្មិត ដែលសិស្ស និស្សិត គ្រូបង្រៀន និងអ្នកស្រាវជ្រាវអាចចូលមើល និង​ស្រាវជ្រាវបានដោយសេរី បណ្ណាល័យមានបំពាក់សៀវភៅពាក់​ព័ន្ធ​នឹង​ការអប់រំជាង ២ម៉ឺនក្បាល សាលអានដែលមានច្រើនទម្រង់ បន្ទប់ស្វ័យ​សិក្សា និងធ្វើការជាក្រុម បន្ទប់ស្ទីឌីយ៉ូសម្រាប់ស្តាប់ និងមើលវីដេអូ បន្ទប់ កុំព្យូទ័រសម្រាប់ស្រាវជ្រាវឯកសារ បន្ទប់ប្រជុំ ការិយាល័យធ្វើការរបស់​បណ្ណា​រក្ស បន្ទប់ រក្សាឯកសារក្រោមដី បន្ទប់ថែទាំទារកសម្រាប់ស្ត្រីមានកូន​តូច។ បណ្ណាល័យនេះ នឹងក្លាយទៅជាបណ្ណាល័យឯកទេសអប់រំ សតវត្សទី​២១ ដំបូងបង្អស់នៅកម្ពុជា។

ទី៣៖ ជួសជុលអគារបេតិកភណ្ឌ អគារសិក្សា និងអគារការិយាល័យចំនួន ១៦ ដែលរួមទាំងអគារសិក្សានៃវិទ្យាល័យអនុវត្ត និងបឋមសិក្សាអនុវត្ត​ផង​ដែរ។ អគារបេតិកភណ្ឌ ដែលមានអាយុកាលជាង១០០ឆ្នាំ ត្រូវបានស្ដារ និង​ជួសជុលឡើងវិញ តាមរចនាបថ ដើមទាំងស្រុង។

ទី៤៖ សាងសង់ខ្លោងទ្វារ របងព័ទ្ធជុំវិញប្រវែង ៦៤២ម៉ែត្រ និងខឿនព័ទ្ធ​ជុំវិញ​ទំហំ ២,៥០០ម៉ែត្រការ៉េ ដោយរក្សារចនាបទដើម និងដើមឈើ​ទាំង​អស់នៅលើខឿន។

ទី៥៖ រៀបចំសួនច្បារ ទីលានកីឡា ចំណតយានជំនិះ អាហារដ្ឋាន ប្រព័ន្ធ​ផ្លូវ ប្រព័ន្ធភ្លើង ប្រព័ន្ធទឹក ប្រព័ន្ធលូ ប្រព័ន្ធសុវត្ថិភាព និងប្រព័ន្ធបច្ចេក​វិទ្យា ដើម្បីគាំទ្រដល់ការរៀន និងបង្រៀនក្នុងបរិបទឌីជីថល។

ទី៦៖ បំពាក់សម្ភារពិសោធន៍មុខវិជ្ជាវិទ្យាសាស្ត្រ (រូបវិទ្យា គីមីវិទ្យា ជីវវិទ្យា និងផែនដីនិង បរិស្ថានវិទ្យា) នៅក្នុងបន្ទប់ពិសោធន៍ រៀបចំបន្ទប់កុំព្យូរទ័រ​ចំនួន ៤បន្ទប់ និងកុំព្យូទ័រ ១២០គ្រឿង បំពាក់ម៉ាស៊ីនមេ (Server) មួយ​ឈុតសម្រាប់រក្សាទិន្នន័យរបស់វិទ្យាស្ថាន និងសម្រាប់ការគ្រប់គ្រង​វិទ្យា​ស្ថានតាមបែបឌីជីថល ផ្តល់កុំព្យូរទ័រយួរដៃមួយគ្រឿងជូនដល់គ្រប់​គ្រូ​ឧទ្ទេស និងបុគ្គលិក និងទិញសៀវភៅសម្រាប់តម្កល់នៅក្នុងបណ្ណាល័យ។

សូមបញ្ជាក់ថា គិតមកត្រឹមឆ្នាំសិក្សា ២០២៤-២០២៥ នេះ វិទ្យាស្ថាន​ជាតិ​អប់រំ​ បានបញ្ចប់ការបណ្តុះបណ្តាលគរុនិស្សិតកម្រិតឧត្តម តាមរូប​មន្ត​បរិ​ញ្ញាបត្រ បូក១ និងបរិញ្ញាបត្របូក២ បានប្រមាណ ២៥,០២១នាក់ ដែល​​ក្នុងនោះស្រី ៨០៥៩ នាក់។

នៅថ្ងៃនេះ និស្សិត និងគរុនិស្សិត ដែលបានបញ្ចប់ការសិក្សាដោយជោគ​ជ័យ​មាន​ចំនួន សរុប ២៧៥នាក់ ស្រី១១៩នាក់។ ក្នុងនោះ និស្សិតបណ្ឌិត ឯកទេសគ្រប់គ្រងអប់រំ ជំនាន់ទី១ ចំនួន ៤នាក់, និស្សិតឯកទេសអធិការ​កិច្ច​អប់រំជំនាន់ទី៧ ចំនួន១៩នាក់, និស្សិតបរិញ្ញាបត្រ ជាន់ខ្ពស់អប់រំ ឯក​ទេស​វិជ្ជាជីវៈនាយកសាលាមធ្យមសិក្សាទុតិយភូមិ ជំនាន់ទី៦ ចំនួន១៥​នាក់ ជំនាន់ទី៧ ចំនួន១៦នាក់, និស្សិតបរិញ្ញាបត្រជាន់ខ្ពស់ ឯកទេសគ្រប់​គ្រង​អប់រំ ជំនាន់ទី១០ ចំនួន៣៤នាក់ ជំនាន់ទី១១ ចំនួន៤២នាក់, និស្សិត​បរិញ្ញាបត្រជាន់ខ្ពស់ ឯកទេសវិធីសាស្ត បង្រៀនភាសាបារាំង ជំនាន់ទី៣ ចំនួន១៤នាក់ ជំនាន់ទី៤ ចំនួន៩នាក់, និស្សិតបរិញ្ញាបត្រជាន់ខ្ពស់ឯក​ទេស​ប្រឹក្សាគរុកោសល្យជំនាន់ទី៤ ចំនួន២៤នាក់ និងគរុនិស្សិត​បរិញ្ញា​បត្រជាន់ខ្ពស់ អប់រំវិជ្ជាជីវៈគ្រូបង្រៀនកម្រិតឧត្តម (បរិញ្ញាបត្រ+២) ជំនាន់ទី១ ចំនួន៩៨នាក់។

សមិទ្ធផលទាំងអស់ដូចបានរៀបរាប់ខាងលើ បានបង្ហាញឱ្យឃើញ​ពីការ​ខិតខំប្រឹងប្រែង ប្រកបដោយផ្លែផ្ការបស់ថ្នាក់ដឹកនាំ​នៃរាជរដ្ឋាភិបាល​កម្ពុជា ក្រោមការដឹកនាំរបស់ សម្ដេចតេជោអតីតនាយករដ្ឋមន្ត្រី និង សម្តេចមហាបវរធិបតីនាយករដ្ឋមន្ត្រី ដែលជានិច្ចជាកាលតែងយកចិត្ត​ទុកដាក់លើវិស័យអប់រំ និងចាត់ទុក វិស័យអប់រំជាយុទ្ធសាស្ត្រ​ដើម្បី​កំណើនសេដ្ឋកិច្ច និងអភិវឌ្ឍធនធានមនុស្សសម្រាប់សង្គមជាតិ
កម្ពុជា៕ ដោយ​៖តារា​