ភ្នំពេញ៖ កាលពីវេលាម៉ោង២រសៀល ថ្ងៃទី៣ខែសីហាឆ្នាំ២០១៥ កម្លាំង នគរបាលការិយាល័យប្រឆាំងការជួញដូរមនុស្ស និង ការពារអនីតិជន ដឹកនាំដោយ លោក កែវ ធាប្រធានការិយាល័យ បានចុះ ឃាត់ខ្លួនជនសង្ស័យប្រុស-ស្រី ២នាក់ នៅកន្លែងពីរផ្សេងគ្នា ក្នុងខណ្ឌឬស្សីកែវ និង ខណ្ឌជ្រោយចង្វា ពាក់ពន្ធករណីជួញដូរមនុស្ស(លក់ក្មួយស្រីអាយុ១៣ឆ្នាំតម្លៃ១៥០០ដុល្លារឲ្យបុរសម្នាក់សេពសន្ថវៈ)។
លោកកែវ ធា បានប្រាប់ឲ្យដឹងថា កុមាររងគ្រោះឈ្មោះ ជណវ អាយុ ១៣ឆ្នាំ។ ចំណែកស្ត្រីជាជនសង្ស័យដែលត្រូវជាម្តាយមីងរបស់ក្មេងរងគ្រោះនោះ មានឈ្មោះ ជា ស្រស់ អាយុ៣២ឆ្នាំ មុខរបរមេផ្ទះ ស្នាក់នៅផ្ទះលេខ៦៧EC0 ផ្លូវជាតិលេខ៥ ភូមិ៣ ក្រុម៥ សង្កាត់ច្រាំងចំរេះ១ ខណ្ឌឬស្សីកែវ ត្រូវបានសមត្ថកិច្ចរបស់លោកឃាត់ខ្លួនកាលពីវេលាម៉ោង២រសៀលថ្ងៃទី ៣ សីហា ឆ្នាំ២០១៥។ ដោយឡែកជនសង្ស័យម្នាក់ទៀតដែលជាអ្នករំលោភសេពសន្ថវៈលើកុមារីរងគ្រោះមានឈ្មោះ ឈិន ឆៃលី ភេទប្រុស អាយុ៣៦ឆ្នាំ មុខរបរជាមេការសំណង់ ត្រូវបានសមត្ថកិច្ចចាប់ឃាត់ខ្លួនបានកាលពីវេលាម៉ោង៥ និង១០នាទីល្ងាចថ្ងៃទី៣ សីហា នេះដែរ នៅចំណុចការដ្ឋានសំណង់ស្ថិតនៅភូមិចាម សង្កាត់-ខណ្ឌជ្រោយចង្វា។
ជនសង្ស័យឈ្មោះ ជាស្រស់ បានសារភាពថានាងបានទទួលប្រាក់ចំនួន១៥០០ដុល្លារពីឈ្មោះឈិនឆៃលី ជាថ្លៃលក់ព្រហ្មចារីក្មួយស្រីហើយការដាក់ច្រវ៉ាក់នាងព្រោះមិនឲ្យនាងចេញពីផ្ទះទៅរាយការណ៍ក្នុងករណីនេះប្រាប់សមត្ថកិច្ច ។
លោក កែវ ធា បានបន្តថា មុននឹងឈានទៅដល់ការបង្ក្រាប និងចាប់ឃាត់ខ្លួនជនប្រុសស្រីទាំងពីរនាក់ខាងលើនេះ គឺកុមារីរងគ្រោះបានមកដាក់ពាក្យបណ្តឹងនៅការិយាល័យ របស់លោកថាខ្លូនគេត្រូវបានម្តាយមីងបង្កើតយកទៅលក់ឱ្យបុរសចំណាស់ម្នាក់រំលោភសេពសន្ថវៈ និងបានចាប់នាងចងច្រវាក់មិនឱ្យទៅណាឡើយ ។ ប៉ុន្តែនាងបានខំព្យាយាមស្រាយច្រវ៉ាក់នោះទាល់តែបានទើបមកប្តឹងសមត្ថកិច្ចលោកឱ្យជួយ។ក្មេងស្រីរងគ្រោះរូបនេះត្រូវបានកម្លាំងរបស់លោកយកទៅប្រគល់ឲ្យមន្ទីរសង្គមកិច្ចរាជធានីភ្នំពេញទទួលយកទៅអប់រំ និងបណ្តុះបណ្តាលដើម្បីមានអនាគត។
ចំណែកជនសង្ស័យទាំង២នាក់កំពុងត្រូវបានឃុំខ្លួនជាបណ្តោះអាសន្ននៅការិយាល័យប្រឆាំងការជួញដូរមនុស្ស និងការពារអនីតិជនដើម្បីធ្វើការសាកសួរបន្ថែម និងឈានទៅរកចាប់ខ្លួនអ្នកសមគំនិតដើម្បីផ្តន្ទាទោសច្បាប់ជាបន្តទៀត៕
ដោយ៖ ប្រាថ្នា
