ខេត្តព្រះសីហនុ ៖ យោងតាមផេក facebook ផ្លូវការរបស់ស្នងការដ្ឋាននគរបាលខេត្តព្រះសីហនុបានឲ្យដឹងថា នៅថ្ងៃទី២៦ ខែមិថុនា ឆ្នាំ២០២៥ វេលាម៉ោង០៤និង០០នាទី នៅចំណុចរង្វង់មូលព្រះថោង ស្ថិតក្នុងភូមិគគីរ សង្កាត់បិតត្រាំង ក្រុងកំពង់សោម មានករណីហិង្សាដោយចេតនាមានស្ថានទម្ងន់ទោស (ប្រើដាវ និងដងឆ័ត្រ វាយកាប់ទៅលើជនរងគ្រោះ)មួយកើត ឡើងបង្កដោយជនសង្ស័យ១ក្រុមមិនស្គាល់អត្តសញ្ញាណ មានគ្នាប្រហែល១៧នាក់ ជិះម៉ូតូប្រហែល៨គ្រឿង ប្រើដោយ ដាវ និងដែកដងឆ័ត្រ បានវាយមកលើជនរងគ្រោះមួយក្រុម០៣ម៉ូតូ មានគ្នា០៦នាក់ស្រី០១នាក់ ដែលកំពុងហូបមីឆា នៅចំណុចកើតហេតុខាងលើ បណ្ដាលឱ្យជនរងគ្រោះ០១នាក់រងរបួសស្រាល និងខូចខាតម៉ូតូស្រាល ក្រោយធ្វើសកម្មភាពរួចបើករត់គេចចេញពីកន្លែងកើតហេតុ ។
បន្ទាប់ពីទទួលបានព័ត៌មាននេះ កម្លាំងអធិការដ្ឋាននគរបាលក្រុងកំពង់សោម សហការជាមួយកម្លាំងប៉ុស្តិ៍នគរបាលរដ្ឋបាលសង្កាត់បិតត្រាំង បានចុះអន្តរាគមន៍ ស្រាវជ្រាវឃាត់ខ្លួនជនសង្ស័យខាងលើបានចំនួន០២ នាក់ និងបន្ដឃាត់ខ្លួនបាន០៥នាក់បន្ថែមទៀត នៅបន្ទប់ជួលស្ថិតក្នុងសង្កាត់លេខ១ នៅថ្ងៃខែឆ្នាំ ដដែលវេលាម៉ោង០៦ និង៣០នាទី រួមទាំងវត្ថុតាង យកមកកាន់អធិការដ្ឋាននគរបាលក្រុងកំពង់សោម ដើម្បីធ្វើការសាកសួរ និងកសាងសំណុំរឿង បញ្ជូនមកការិយាល័យជំនាញនៃស្នងការដ្ឋាននគរបាលខេត្តព្រះសីហនុ ចាត់ ការបន្តតាមនីតិវិធី ។
វត្ថុតាងចាប់យកបានរួមមាន ៖
-ម៉ូតូ ០៣គ្រឿង
១-ម៉ាក SCOOPY ពណ៌ខ្មៅ ផលិតឆ្នាំ ២០២៤ ស្លាកលេខ ភ្នំពេញ 1KU-6376 ។
២-ម៉ាក DREAM សេ១២៥ ពណ៌ខ្មៅ ផលិតឆ្នាំ ២០២៤ ស្លាកលេខ កំពត 1V-6438 ។
៣-ម៉ាក DREAM សេ១២៥ ពណ៌ ខ្មៅ ផលិតឆ្នាំ ២០២២ ស្លាកលេខ ភ្នំពេញ 1JH-0178 ។
-ទូរស័ព្ទ០៦គ្រឿង
-ដែកដងឆ័ត្រ០១ដើម ប្រវែង១០៣សង់ទីម៉ែត្រ (ឧបករណ៍ធ្វើសកម្មភាព)
-ដាវដែកចំនួន ០២ដើម (ឧបករណ៍ធ្វើសកម្មភាព) ។
ចំពោះជនសង្ស័យទាំង៧នាក់ភេទប្រុសព្រមទាំងវត្ថុតាងខាងលើ ការិយាល័យនគរបាលព្រហ្មទណ្ឌកម្រិតស្រាល បានកសាងសុំនុំរឿងបញ្ជូនទៅសាលាដំបូងខេត្តព្រះសីហនុ ដើម្បីចាត់ការតាមនិតិវិធីច្បាប់ ៕
