ភ្នំពេញ ៖ បុរសពីរនាក់ប្ដីប្រពន្ធបានស្លាប់នៅក្នុងថ្លុកឈាម ចំណែកកូនស្រីអាយុ១០ឆ្នាំបានរងរបួសធ្ងន់ ខណៈជិះម៉ូតូទៅបុករថយន្តមួយគ្រឿងពេញទំហឹងនៅចំណុចផ្លូវបំបែក។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះបានកើតឡើងកាលពីវេលាម៉ោង ១និង២០នាទីរសៀលថ្ងៃទី០៧ ខែកញ្ញា ឆ្នាំ២០២៥ ស្ថិតនៅតាមបណ្តោយផ្លូវបេតុងក្នុងសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។
ជនរងគ្រោះពីរនាក់ប្ដីប្រពន្ធភ្លាមៗនោះពុំត្រូវបានគេស្គាល់អត្តសញ្ញាណឡើយ។ចំណែកកូនស្រីរងរបួសធ្ងន់ត្រូវបានរថយន្តសាមុយដឹកបញ្ជូនទៅសង្គ្រោះនៅមន្ទីរពេទ្យគន្ធបុប្ផា។
តាមព័ត៌មានឲ្យដឹងថា នៅមុនពេលកើតហេតុគេឃើញជនរងគ្រោះជិះម៉ូតូមួយគ្រឿង ម៉ាកហុងដាឌ្រីម សេ១២៥ ស៊េរីឆ្នាំ២០២២ ពណ៌ខ្មៅ ពាក់ស្លាកលេខ ភ្នំពេញ 1JW-6426 ជិះឌុបគ្នាក្នុងទិសដៅពីលិចមកកេីត។ ខណៈពេលបេីកបរមកដល់ចំណុចខាងលេីក៏បានបុកជាមួយរថយន្តមួយគ្រឿងម៉ាក Highlander ពណ៌ស្ករ ពាក់ផ្លាកលេខ ភ្នំពេញ 2BP-4661ដែលធ្វើដំណើរក្នុងទិសដៅពីជេីងមកត្បូង។
តាមព័ត៌មានឱ្យដឹងទៀតថា នៅក្នុងគ្រោះថ្នាក់នោះគឺម៉ូតូជនរងគ្រោះបានបុកចំកណ្ដាលរថយន្តបណ្ដាលឲ្យបោកក្បាលស្លាប់ពីរនាក់ប្តីប្រពន្ធនៅនឹងកន្លែង។ចំណែកកូនស្រីបានរងរបួសធ្ងន់ត្រូវបានរថយន្តសាមុយដឹកបញ្ជូនទៅសង្គ្រោះ។បន្ទាប់ពីកើតមានគ្រោះថ្នាក់ អ្នកបើកបររថយន្តត្រូវបានសមត្ថកិច្ចឃាត់ខ្លួនផងដែរ។
ក្រោយកេីតហេតុ មន្ត្រីមូលដ្ឋានបានចុះទៅកន្លែងកើតហេតុដើម្បីសម្រួលចរាចរណ៍និងទាក់ទងទៅនគរបាលជំនាញឱ្យមកចុះវាស់វែង រួចបញ្ជូនអ្នកបើកបរនិងរថយន្តព្រមទាំងម៉ូតូទៅកាន់ការិយាល័យចរាចរណ៍ផ្លូវគោកដើម្បីចាត់ការតាមច្បាប់៕
ដោយ ៖ ភារ៉ា ដង្កោ
