ភ្នំពេញ៖ ជនសង្ស័យចំនួន៥នាក់ត្រូវបានកម្លាំងនគរបាលជំនាញខណ្ឌពោធិ៍សែនជ័យរូមជាមួយកម្លាំងប៉ុស្តិ៍រដ្ឋបាលចោមចៅ ស្រាវជ្រាវបង្ក្រាបចាប់ឃាត់ខ្លួនបានពាក់ព័ន្ធទៅនឹងករណីជួញដូរ និងប្រើប្រាស់គ្រឿងញៀន រកឃើញថ្នាំញៀន៥កញ្ចប់ និងសម្ភារមួយចំនួនទៀត។

ក្នុងប្រតិបត្តិការនេះធ្វើឡើងនៅវេលាម៉ោង២រសៀលថ្ងៃទី៦ ខែកញ្ញា ឆ្នាំ២០១៦ ស្ថិតនៅបន្ទប់ផ្ទះជួល ខាងក្រោយរោងកុនកាណាសុីធី ភូមិចោមចៅ សង្កាត់ចោមចៅ ខណ្ឌពោធិ៍សែនជ័យ ។

ជនសង្ស័យទាំង៥នាក់ដែលកម្លាំងនគរបាលបង្ក្រាបចាប់ខ្លួនបាន ទី១ ឈ្មោះ វន តុលា ភេទប្រុស អាយុ២៧ មុខរបរ មុនពិតប្រាកដ មានទីលំនៅ ស្រុកអង្គស្នួល ខេត្តកណ្តាល ទី២ ឈ្មោះ វុន សាំងហ៊ួរ ភេទប្រុស អាយុ២៥ឆ្នាំ មុខរបរកម្មករ ស្នាក់នៅកន្លែងកើតហេតុ មានស្រុកកំណើតឃុំកំពង់លាវ ស្រុកកំពង់លាវ ខេត្តព្រៃវែង ទី៣ឈ្មោះ ណាត សុវណ្ណ ភេទប្រុស អាយុ២៥ឆ្នាំ ស្នាក់នៅកន្លែងកើតហេតុ ទី៤ ឈ្មោះ ណេង ចំណាប់ ភេទប្រុស អាយុ២៤ឆ្នាំ និងទី៥ឈ្មោះហួង សាវុធ ភេទប្រុស អាយុ២៤ឆ្នាំ ស្នាក់នៅកន្លែងកើតហេតុ នានស្រុកកំណើត ឃុំកំពង់លាវ ស្រុកកំពង់លាវ ខេត្តព្រៃវែង ។ ក្នុងកិច្ចប្រតិបត្តិការខាងលើ រកឃើញថ្នាំញៀនបាន៥កញ្ចប់ ក្នុងនោះ៣កញ្ចប់ធំ ២កញ្ចប់តូច ជញ្ជីងថ្លឹងថ្នាំញៀន និងសម្ភារមួយចំនួនទៀត ។

ក្រោយពីឃាត់ខ្លួនបានជនសង្ស័យ រួមជាមួយវត្ថុតាងត្រូវបានសមត្ថកិច្ចនាំទៅកាន់ផ្នែកជំនាញអធិការដ្ឋានខណ្ឌពោធិ៍សែនជ័យ ដើម្បីសាកសួរនិងកសាងសំណុំរឿងចាត់ការទៅតាមនីតិវិធី៕

ដោយ៖ សុខាសែនជ័យ