ខេត្តត្បូងឃ្មុំ៖ ជនសង្ស័យម្នាក់ រួមជាមួយវត្ថុតាងថ្នាំញៀនចំនួន២ កញ្ចប់តូច ត្រូវបាន កម្លាំងនគរបាលចុះចាប់ឃាត់ខ្លួន បាននៅវេលាម៉ោង ១និង៣០ នាទីរសៀល ថ្ងៃទី០៦ខែ កញ្ញា ឆ្នាំ២០១៦ នៅនឹងផ្ទះជនសង្ស័យ ក្នុងភូមិជ្រួយ សង្កាត់វិហារលួង ក្រុងសួងខេត្តត្បូងឃ្មុំ។
លោកវរសេនីយ៍ទោ ឈន សុធន អធិការនគរបាលក្រុងសួង បានបញ្ជាក់ឱ្យដឹងថា កម្លាំងនគរបាលបានចុះចាប់ឃាត់ខ្លួន ជនសង្ស័យឈ្មោះ យឿន វ៉ៃ ហៅ ខ្វៃ ភេទប្រុសអាយុ ២៦ ឆ្នាំមានទីលំនៅក្នុងភូមិ ជ្រួយ សង្កាត់វិហារលួង ក្រុងសួង រួមជាមួយវត្ថុតាង ថ្នាំញៀន ចំនួន២ កញ្ចប់តូច នៅជាប់នឹងខ្លួន និងចំនួន៣កញ្ចប់ តូចទៀត ដែលកម្លាំងញុះញង់ទិញបានហើយនឹងសម្ភារ មួយចំនួនទៀត។
លោកអធិការនគរបាលក្រុងសួង បានបញ្ជាក់បន្តថា កម្លាំងបានប្រើវិធានញុះញង់ ការប្រើប្រាស់កម្លាំងភ្នាក់ងារឱ្យទៅទិញថ្នាំញៀន ពីជនសង្ស័យ យឿន វ៉ៃ ចំនួន២ លើកបានចំនួន៣ កញ្ចប់តូច តម្លៃ៨៥.០០០៛ ភ្លាមនោះកម្លាំង ក៏ បានចាប់ឃាត់ ខ្លួន នៅចំណុចក្រោមផ្ទះ របស់ជនសង្ស័យ និងធ្វើការឆែកឆេរ រកឃើញ វត្ថុតាង ម្សៅក្រាមពណ៌ ស សង្ស័យជាថ្នាំញៀន ចំនួន២ កញ្ចប់តូច និងសម្ភារ ពាក់ព័ន្ធគ្រឿងញៀន មួយចំនួនទៀត។
បច្ចុប្បន្ន ជនសង្ស័យ រួមនឹង វត្ថុតាងថ្នាំញៀន ចំនួន៥ កញ្ចប់ និងសម្ភារពាក់ព័ន្ធ គ្រឿងញៀនមួយចំនួនទៀត ត្រូវបានកម្លាំងជំនាញអធិការដ្ឋាន នគរបាលក្រុងសួង កសាងសំណុំរឿង តាមនីតិវិធី បញ្ជូនទៅតុលាការ ចាត់ការតាមនីតិវិធីនៃច្បាប់៕
ដោយ៖វណ្ណះ
