ភ្នំពេញ៖ បុរសម្នាក់សង្ស័យមានជម្ងឺផ្លូវចិត្ត បានបំរុងលោតពីផ្ទះជាន់ទី៣ សម្លាប់ខ្លួន តែត្រូវបានសមត្ថកិច្ច និងញាតិមិត្តជួយលួងលោមចុះមកវិញ ។
ហេតុនេះបង្កឲ្យមានការភ្ញាក់ផ្អើលឡេីងកាលពីម៉ោង១០យប់ ថ្ងៃទី៩ខែតុលាឆ្នាំ២០២៥ ចំនុចផ្ទះវីងយីហោ ងួន វួចនា ស្ថិតតាមបណ្ដោយ ផ្លូវ២៨៨កែងផ្លូវព្រះមុនីវង្ស សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ។
ប្រភពព័ត៌មានពីប្រជាពលរដ្ឋបានអោយដឹងថា មុនពេលកេីតហេតុ គេមិនដឹងថា បុរសខាងលើ មានរឿងឬ វិបត្តិអ្វីនោះទេ បានឡើងលើផ្ទះជាន់ទី៣បានប្លោះទៅអង្គុយលេីសំយាបផ្ទះ បំរុងលោតមកក្រោមផងដែរ ។
ដោយសារឃើញហេតុការណ៍បែបនេះ ក៏មានបងប្អូនប្រជាពលរដ្ឋ បានរាយការណ៍ជូនកម្លាំងសមត្ថកិច្ចមូលដ្ឋាន បានចុះទៅកន្លែងកើតហេតុ ដេីម្បីជួយអន្តរាគមន៍និយាយលួងលោម និងមានមិត្តភក្តិ មកជួយនិយាយលួងលោម មួយសន្ទុះ បុរសរូបនោះបានយល់ព្រម ចូលទៅក្នុងផ្ទះវិញ ។
បេីតាបេីតាមប្រភពពីអ្នកជិតខាងបានឲ្យដឹងថាបុរសខាងលើ ខំប្រឹងសិក្សារៀនសូត្រពេក រហូតដល់ប៉ះពាល់សតិអារម្មណ៍ ចំនែកក្រុមគ្រួសារវិញមិនបានផ្តល់ព័ត៌មានអ្វីនោះទេ ៕
ដោយ៖ ជ្រោយពេជ្រ
