ភ្នំពេញ​៖​ គណៈបញ្ជាការដឹកនាំស្រាវជ្រាវ ស៊ើបអង្កេត និងបង្ក្រាបបទល្មើសគ្រប់ប្រភេទ នៃក្រសួងមហាផ្ទៃ នៅថ្ងៃសៅរ៍ទី​១១​ ខែតុលា​ ឆ្នាំ​២០២៥នេះ​ សូមជម្រាបជូនសាធារណជនជាតិ និងអន្តរជាតិជ្រាបថា នៅរសៀលថ្ងៃទី១០ ខែតុលា ឆ្នាំ២០២៥ សមត្ថកិច្ច ជំនាញ បានបណ្តេញចេញជនជាតិវៀតណាមសរុបចំនួន ៣០នាក់ ស្រី១៣នាក់ តាមច្រកព្រំដែនអន្តរជាតិ បាវិត ក្រោយកិច្ចសហប្រតិបត្តិការរវាងសមត្ថកិច្ចជំនាញនៃគណៈបញ្ជាការ និងអគ្គនាយកដ្ឋានអន្តោប្រវេសន៍ សហការជាមួយស្ថានទូតវៀតណាម។

ជនជាតិវៀតណាមទាំង ៣០នាក់ ត្រូវបានគណៈបញ្ជាការដឹកនាំស្រាវជ្រាវ ស៊ើបអង្កេត និងបង្ក្រាប បទល្មើសគ្រប់ប្រភេទ នៃក្រសួងមហាផ្ទៃ ឃាត់ខ្លួនក្នុងកិច្ចប្រតិបត្តិការថ្ងៃទី០៩ ខែតុលា ឆ្នាំ២០២៥ ក្នុង ចំណោមជនបរទេសសរុបចំនួន ៣៣នាក់ នៅទីតាំងមួយកន្លែងស្ថិតក្នុងភូមិសាស្ត្រក្រុងបាវិត ខេត្តស្វាយរៀង។ ការបណ្តេញចេញនេះធ្វើឡើងបន្ទាប់ពីសមត្ថកិច្ចជំនាញប្រឆាំងការជួញដូរមនុស្ស និងការពារអនីតិជន ធ្វើការសម្ភាសន៍កំណត់សញ្ញាណរងគ្រោះដោយអំពើជួញដូរមនុស្សរួចរាល់តាមនីតិវិធីជាតិ និងអន្តរជាតិ ដោយមិនមានសញ្ញាណរងគ្រោះនោះទេ។

ជនបរទេសទាំង៣៣នាក់ បានសម្ងំលួចលាក់ធ្វើសកម្មភាពឆបោកតាមប្រព័ន្ធបច្ចេកវិទ្យា ដែល មានមេខ្លោងជាជនជាតិចិនចំនួន ០៣នាក់ ក្រោមរូបភាព “Malware-Enabled Scam” ដោយប្រើប្រាស់ ទឹកដីកម្ពុជាធ្វើសកម្មភាពឆបោកប្រជាពលរដ្ឋវៀតណាម នៅប្រទេសវៀតណាម។ ក្នុងប្រតិបត្តិការនេះ សមត្ថកិច្ចបានដកហូតវត្ថុតាងសម្ភារៈបម្រើដល់ប្រតិបត្តិការឆបោកមួយចំនួនរួមទាំងប្រាក់ជាផលនៃ បទល្មើសចំនួន ២៨,៨០០ដុល្លាអាមេរិក និង១២,០០០,០០០រៀល និងបានកសាងសំណុំរឿងបញ្ជូន ជនសង្ស័យជាមេខ្លោងឆបោកជនជាតិចិនចំនួន ០៣នាក់ ទៅសាលាដំបូងខេត្តស្វាយរៀង ដើម្បីអនុវត្ត ច្បាប់ពីបទឆបោក និងសម្អាតប្រាក់។

អាស្រ័យដូចបានជម្រាបជូនខាងលើ សូមសាធារណជនជាតិ និងអន្តរជាតិជ្រាបជាព័ត៌មាន៕

ដោយ​៖តារា​

រូបភាព​៖​អគ្គស្នងការ​ដ្ឋាន​នគរបាលជាតិ​