ខេត្តកំពង់ស្ពឺ៖ នៅថ្ងៃអង្គារ ៧រោច ខែអស្សុជ ឆ្នាំម្សាញ់ សប្តស័ក ព.ស. ២៥៦៩ ត្រូវនឹង ថ្ងៃទី១៤ ខែតុលា ឆ្នាំ២០២៥ លើផ្លូវជាតិលេខ ៥១ ត្រង់ចំណុចផ្លូវបំបែកជា៤ ភូមិអង្គទន្លាប់ ឃុំសំរោងទង ស្រុកសំរោងទង ខេត្តកំពង់ស្ពឺ រថយន្ត១គ្រឿង ម៉ាក HYUNDAI ពណ៌ ស គ្មានផ្លាកលេខ អ្នកបើកបរមិនស្គាល់អត្តសញ្ញាណអ្នកបេីកបរ សមត្ថកិច្ចបន្ដការស្រាវជ្រាវ (ក្រោយកេីតហេតុចុះគេចខ្លួន) មានដឹកកម្មករ-កម្មការិនីចំនួន ៥០នាក់ ស្រី៣៥នាក់ បើកបរពីទិសខាងលិចទៅទិសខាងកើត មកដល់ចំណុចខាងលើបានរថយន្ដបេីកឆ្លងផ្លូវរួចបបុកជាមួយម៉ូតូចំនួន៣គ្រឿង។
គ្រោះថ្នាក់នេះ ជាការមិនគោរពច្បាប់សិទ្ធិអត្ថិភាព៖ បង្កឱ្យម៉ូតូខូចខាត ទី១-ម៉ាក HONDA DREAM 125CC ពណ៍ខ្មៅ ពាក់ផ្លាកលេខកំពង់ស្ពឺ 1G-0112 អ្នកបើកបរឈ្មោះ ប៉ុល ស៊ុយ ភេទប្រុស អាយុ៤៦ឆ្នាំ នៅភូមិព្រៃសំបុក ឃុំព្នាយ ស្រុកសំរោងទងបើកបរពីទិសខាងត្បូងទៅទិសខាងជើងរួចបត់ឆ្លងផ្លូវទៅទិសខាងលិច,ម៉ូតូទី២- ម៉ាក HONDA DREAM 125CC ពណ៍ខ្មៅ ពាក់ផ្លាកលេខកំពង់ស្ពឺ 1X-6868 អ្នកបើកបរឈ្មោះ ឃីម ចាន់លី ភេទប្រុស អាយុ៣៤ឆ្នាំ ឌុបប្រពន្ធឈ្មោះ ស៊ុន ខ្នា អាយុ៣០ឆ្នាំ រស់នៅភូមិអាយាន ឃុំពាំងល្វា ស្រុកសាមគ្គីមុនីជ័យ ខេត្តកំពង់ស្ពឺ បើកបរពីទិសខាងជើងទៅទិសខាងត្បូងរួចបត់ទៅទិសខាងកើត។
ម៉ូតូទី៣- ម៉ាក HONDA DREAM 125CC ពណ៌ខ្មៅ ពាក់ផ្លាកលេខភ្នំពេញ 1CO-5875 អ្នកបើកបរឈ្មោះ ហេង ស៊ុន ភេទស្រី អាយុ២៥ឆ្នាំ នៅភូមិពាំងកំផ្លង ឃុំពាំងល្វា ស្រុកសាមគ្គីមុនីជ័យ ខេត្តកំពង់ស្ពឺ បើកបរពីទិសខាងជើងទៅខាងត្បូងរួចបត់ទៅទិសខាងកើត។
ករណីខាងលើបណ្ដាលឱ្យគ្រោះថ្នាក់មនុស្ស និងខូចខាតសម្ភាររបួសមនុស្ស ៤នាក់ ស្រី២ (ភាគីម៉ូតូ) ខូចម៉ូតូ៣គ្រឿង ខូចរថយន្ត ១គ្រឿង។
សមត្ថកិច្ចនគរបាលចរាចរណ៍បានចុះដល់ទីតាំងកេីតហេតុនិងបានចាប់យកវត្ថុតាង ម៉ូតូចំនួន៣គ្រឿង និងរថយន្ត១គ្រឿង យកមករក្សាទុកនៅប៉ុស្តិ៍នគរបាលរដ្ឋបាលសំរោងទង នៃអធិការដ្ឋាននគរបាលស្រុកសំរោងទង បន្តស្រាវជ្រាវរកអ្នកបើកបររថយន្ត ដើម្បីដោះស្រាយតាមនីតិវិធី និងចំណាត់ការផ្លូវច្បាប់៕
