ខេត្តកំពង់ស្ពឺ៖ អនុវត្ដតាមបញ្ជាលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ កំលាំងអធិការដ្ឋាននគរបាលស្រុកបសេដ្ឋ ដឹកនាំដោយលោកវរសេនីយ៍ឯក ចន សុភីត អធិការនគរបាលស្រុក បញ្ជាឱ្យកំលាំងផ្នែកព្រហ្មទណ្ឌឃាត់ខ្លួន មុខសញ្ញាសង្ស័យពាក់ព័ន្ធនិងសកម្មភាពកាប់ប្លន់យកម៉ូតូ កាលពីថៃ្ងទី៦ ខែ តុលា ឆ្នាំ២០២៥ នៅចំណុចភូមិព្រៃស្លែង ឃុំកុមារាជា ស្រុកបាទី ខេត្ដតាកែវ ដោយក្រុមបក្ខពួកជនសង្ស័យបានរត់មកលាក់ខ្លួនពួនសម្ងំនៅចំណុចទឹកដីភូមិសាស្រ្ដស្រុកបសេដ្ឋ ជាមុខសញ្ញាមានការគ្រប់គ្រងជាប្រចាំរបស់ជំនាញ។
ជាក់ស្ដែងសមត្ថកិច្ចនគរបាលឃាត់បាន ២នាក់,ម៉ូតូ១ គ្រឿងម៉ាកហុងដា C125 ពណ៌ខ្មៅ ឆ្នាំ២០២៥ គ្មានការបាំងមុខក្រោយ គ្មានស្លាកលេខ គ្មានឯកសារសម្គាល់ត្រឹមត្រូវ លេខតួ-ម៉ាសុីន ND125 NE-0332719 នៅភូមិនរាណ៍ ឃុំនិទាន ស្រុកបសេដ្ឋ ខេត្តកំពង់ស្ពឺ÷១/- ឈ្មោះ ស៊ន រដ្ឋា ភេទប្រុស អាយុ២២ឆ្នាំ រស់នៅភូមិព្រៃជ័រ ឃុំខ្វាវ ស្រុកសំរោង ខេត្តតាកែវ និង ,២/-ឈ្មោះ ជួន សាវិន ភេទប្រុស អាយុ២៧ឆ្នាំ រស់នៅភូមិសេរីភ័ត្ត ឃុំពោធិអង្រ្កង ស្រុកបសេដ្ឋ ខេត្តកំពង់ស្ពឺ ។
ក្រោយឃាត់ខ្លួននគរបាលបាននាំយកជនសង្ស័យមក កាន់អធិការដ្ឋានស្រុកបសេដ្ឋ ដដើម្បីធ្វើការស្រាវជ្រាវ។តាមចម្លើយជនសង្ស័យ ជួន សាវិនបានឆ្លើយសារភាពថា ម៉ូតូដែលខ្លួនកំពុងតែកាន់កាប់នេះពិតជាបានវាយប្លន់យក ពីជនរងគ្រោះនៅភូមិព្រៃស្លែង ឃុំកុមារាជា ស្រុកបាទី ខេត្តតាកែវ នៅត្រង់ចំណុចភូមិត្រពាំងឈូក ឃុំកុមារាជា ស្រុកបាទី ខេត្តតាកែវ កាលពីថ្ងៃទី៦ខែ តុលា ឆ្នាំ២០២៥ វេលាម៉ោង១៦និង៤០ នាទី រសៀល ប្រាកដមែន ។
ដោយបានគោលការណ៍ឯកភាពពីតំណាងអយ្យការនិងជំនាញខេត្ដ អធិការដ្ឋាននគរបាលស្រុកបានប្រគល់ជន សង្ស័យ និងវត្ថុតាងម៉ូតូ ជូនអធិការដ្ឋាននគរបាលស្រុកបាទី ដើម្បីចាត់ការបន្តតាមនីតិវិធីច្បាប់៕
