ភ្នំពេញ : ក្នុងចំណោមសាលាបណ្ដុះបណ្ដាលនគរបាលជាតិ ដែលក្រសួងមហាផ្ទៃ បានដាក់ពង្រាយ នៅទូទាំងប្រទេស ក៏មានដែរ សាលានគរបាលជាតិមិត្តភាពកម្ពុជា-វៀតណាម។ ក្នុងរយៈពេល៩ខែដើមឆ្នាំ២០២៥នេះ លោកនាយឧត្តមសេនីយ៍ សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា បានឱ្យដឹងថា សាលានគរបាលជាតិមិត្តភាពកម្ពុជា-វៀតណាម បានបណ្ដុះបណ្ដាលសិក្ខាកាមជាមន្ត្រីនគរបាលជាតិ មកពីបណ្ដាអង្គភាពទូទាំងប្រទេស បានចំនួន៥៣៥រូប ក្នុងវគ្គសិក្សាចំនួន៦ ក្នុងនោះមានមន្ត្រីនគរបាលជាស្ត្រីចំនួន១៨រូប។

បើតាម លោកនាយឧត្តមសេនីយ៍សាស្ត្រាចារ្យ លទ្ធផលនេះ គឺជាមនុញ្ញផលមួយផ្នែកធំ កើតចេញពីការផ្ដួចផ្ដើម និងដឹកនាំតម្រង់ទិស របស់សម្ដេចក្រឡាហោម ស ខេង អតីតឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៃរាជរដ្ឋាភិបាលនីតិកាលកន្លងមក ក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនៃកម្ពុជា។ បើក្រឡេកថយក្រោយ គិតចាប់ពីពេលបង្កើតឡើងកាលពីឆ្នាំ២០១០ ឯកឧត្តមអះអាងថា សាលាមួយនេះ បានបណ្ដុះបណ្ដាលមន្ត្រីនគរបាលជាតិសរុបជិត៥ពាន់នាក់ ក្នុងវគ្គសិក្សាជាង៤០។

តើសិក្ខាកាមទាំងនោះ ទទួលបានការបណ្ដុះបណ្ដាលជំនាញអ្វីខ្លះ? ឯកឧត្តមនាយឧត្តមសេនីយ៍សាស្រ្តាចារ្យ មានប្រសាសន៍ថា មានជំនាញពិសេសចំនួន១៤ឯណោះ គឺ១.ជំនាញការពារថ្នាក់ដឹកនាំជាន់ខ្ពស់ជាតិ-អន្តរជាតិ ២.ជំនាញបង្ការពន្លត់អគ្គិភ័យនិងសង្គ្រោះ ៣.ជំនាញការពារគោលដៅ ៤.ជំនាញអន្តរាគមន៍ពិសេស ៥.ជំនាញអន្តរាគមន៍រំដោះចំណាប់ខ្មាំង ៦.ជំនាញបង្ការនិងបង្ក្រាបសកម្មភាពចលាចល ៧.ជំនាញការពារទប់ទល់បាតុកម្ម ៨.ជំនាញសន្តិសុខផ្ទៃក្នុង ៩.ជំនាញកសាងបណ្តាញមូលដ្ឋានសម្ងាត់របស់កងកម្លាំងសន្តិសុខ ១០.ជំនាញបច្ចេកទេសព្រហ្មទណ្ឌ ១១.ជំនាញបច្ចេកទេសស្រាវជ្រាវសួរចម្លើយ ១២.ជំនាញប្រឆាំងភេរវកម្ម ១៣.ជំនាញចរាចរណ៍ផ្លូវគោក និង ១៤.បណ្តុះបណ្តាលមន្ត្រីនគរបាលយុត្តិធម៌។

យោងតាមរបាយការណ៍បណ្ឌិត្យសភានគរបាលកម្ពុជា វគ្គបណ្ដុះបណ្ដាលទាំងនោះ គឺសម្រាប់មន្ត្រីនគរបាលជាតិដែលបាននិងកំពុងបំពេញការងារនៅតាមអង្គភាពជំនាញ ចំណុះក្រសួងមហាផ្ទៃ និងតាមរយៈការចាត់បញ្ជូនឱ្យចូលសិក្សាស្របតាមផែនការបណ្ដុះបណ្ដាលរបស់បណ្ឌិត្យសភានគរបាលកម្ពុជា និងតម្រូវការរបស់អង្គភាពប្រើប្រាស់កងកម្លាំង។ មន្ត្រីនគរបាលដែលអាចទទួលបានការបណ្ដុះបណ្ដាលត្រូវមានលក្ខខណ្ឌ៦ចំណុច រួមមាន ១.មានអាយុមិនលើសពី៥០ឆ្នាំសម្រាប់ថ្នាក់វរសេនីយ៍ទោចុះ និង៥៥ឆ្នាំសម្រាប់ថ្នាក់វរសេនីយ៍ឯកឡើង ២.មានសុខភាពមាំមួន-កាយសម្បទាល្អ ៣.មានកម្រិតវប្បធម៌សញ្ញាបត្រមធ្យមសិក្សាបឋមភូមិឡើងទៅ ឬសញ្ញាបត្រដែលមានតម្លៃស្មើ ៤.មានឋានៈចាប់ពីនាយរងផ្នែក ដល់នាយការិយាល័យ នៃការិយាល័យជំនាញដែលពុំទាន់ឆ្លងវគ្គបំប៉នជំនាញមកពីនាយកដ្ឋាន អង្គភាព និងស្នងការដ្ឋាននគរបាលរាជធានី-ខេត្ត ៥.បានឆ្លងកាត់វគ្គបណ្តុះបណ្តាលកម្រិតបឋមវិជ្ជាជីវៈនគរបាល និង៦. មន្ត្រីនគរបាល ដែលគ្រប់តាមលក្ខខណ្ឌនេះ នឹងត្រូវបានលើកទឹកចិត្តក្នុងការអភិវឌ្ឍសមត្ថភាព។

លោកនាយឧត្តមសេនីយ៍សាស្រ្តាចារ្យ ឯក មនោសែន បញ្ជាក់ថា ” ឆ្លងកាត់វគ្គបណ្ដុះបណ្ដាលជំនាញនីមួយៗដោយផ្អែកតាមផែនការយុទ្ធសាស្ត្រ និងសមត្ថភាពគ្រូនគរបាលជាតិ អន្តរជាតិមានបទពិសោធបណ្ដុះបណ្ដាល និងឈរលើគុណភាពអប់រំជាចម្បង យើងជឿជាក់ថាមន្ត្រីទាំងនោះនឹងមានចំណេះដឹង ជំនាញវិជ្ជាជីវៈនគរបាល មានសមត្ថភាព មានមនសិការស្នេហាជាតិ មានឆន្ទៈមោះមុត មានគុណធម៌ មានសីលធម៌ស្អាតស្អំ  និងការទទួលខុសត្រូវលើការងារ គោរពវិន័យ គោរពប្រតិបត្តិច្បាប់ និងគោរពសិទ្ធិមនុស្ស ដើម្បីអនុវត្តយ៉ាងសកម្មលើការងារបង្ការ ទប់ស្កាត់ និងបង្រ្កាបបទល្មើស ក្នុងទិសដៅរក្សាសន្តិសុខ សណ្ដាប់ធ្នាប់ សុវត្ថិភាពសង្គម និងផ្ដល់សេវានគរបាលជូនប្រជាពលរដ្ឋប្រកបដោយប្រសិទ្ធភាព”។

សូមបញ្ជាក់ថា សាលានគរបាលជាតិមិត្តភាពកម្ពុជា-វៀតណាម មានទីតាំងស្ថិតនៅស្រុកភ្នំស្រួច ខេត្តកំពង់ស្ពឺ ចម្ងាយ៨៥គីឡូម៉ែត្រ ពីរាជធានី ភ្នំពេញ និងមានផ្ទៃដីទំហំជាង២៦ហិកតា។ ហេដ្ឋារចនាសម្ព័ន្ធ និងធនធានរូបវន្តបម្រើដល់ការបណ្ដុះបណ្ដាលនិងហ្វឹកហាត់ ត្រូវបានសម្ពោធដាក់ឱ្យប្រើប្រាស់ជាផ្លូវការនៅថ្ងៃទី១៧ ខែមករា ឆ្នាំ២០១៥ ក្រោមអធិបតីភាពដ៏ខ្ពង់ខ្ពស់ សម្ដេចក្រឡាហោម ស ខេង អតីតឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ និងឯកឧត្តម ត្រឹង ដាយក្វាង (Tran Dai Quang) រដ្ឋមន្ត្រីក្រសួងនគរបាលវៀតណាម។

នៅនីតិកាលទី៧នេះ ក្រសួងមហាផ្ទៃ ក្រោមការដឹកនាំប្រកបដោយប្រាជ្ញាអភិវឌ្ឍន៍របស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងឈរលើស្មារតីប្រមូលផ្ដុំនៃការអប់រំបណ្ដុះបណ្ដាលនិងហ្វឹកហាត់ សាលានគរបាលជាតិមិត្តភាពកម្ពុជា-វៀតណាម ត្រូវបានផ្ទេរមកចំណុះផ្ទាល់បណ្ឌិត្យសភានគរបាលកម្ពុជា កាលខែកញ្ញា ឆ្នាំ២០២៣ ដោយមានតួនាទីធ្វើជាសេនាធិការជូនបណ្ឌិត្យសភានគរបាលកម្ពុជា លើការងារបណ្ដុះបណ្ដាលបំប៉នជំនាញពិសេស រយៈពេលវែងនិងខ្លី ដល់មន្រ្តីនគរបាលជាតិទូទាំងប្រទេស។ ការកែសម្រួលនេះ គឺដើម្បីឆ្លើយតបគោលនយោបាយរាជរដ្ឋាភិបាល ក្រោមការដឹកនាំប្រកបដោយប្រតិភាណសម្ដេចមហាបវរធិបតី ហ៊ុន ម៉ាណែត

នាយករដ្ឋមន្ត្រីនៃកម្ពុជា ពិសេសយុទ្ធសាស្ត្របញ្ចកោណ ដែលកំណត់អំពីការពង្រឹងគុណភាពធនធានមនុស្ស៕

ដោយ : កញ្ញា សេង សុខហ៊ុន មន្ត្រីអ្នកនាំពាក្យក្រសួងមហាផ្ទៃ