1.ខ្សែការពារប្រេស៊ីល David Luiz វិលត្រឡប់មកកាន់ក្រុមតោខៀវវិញក្នុងតម្លៃ ខ្លួន៣៤លានផោន។ ខណៈ Marcos Alonso ថ្លៃ២៣លានផោន ក្លិបតោខៀវ Chelsea បានទិញយកខ្សែការពារអន្តរជាតិប្រេស៊ីល David Luiz ពីក្លិប Paris St-Germain ក្នុងតម្លៃ៣៤លានផោនហើយក៏បានទិញខ្សែការពារស្លាបឆ្វេង Marcos Alonso ពីក្រុម Fiorentina របស់អុីតាលីដោយតម្លៃ២៣លានផោននៅថ្ងៃជាមួយគ្នានោះដែរ ។

ខ្សែការពារកណ្តាលវ័យ២៩ឆ្នាំ David Luiz បានចុះហត្ថលេខាមកលេងឲ្យក្លិបតោខៀវវិញ ក្នុងរយៈពេល៣ឆ្នាំ។ កាលពី ខែមករា ឆ្នាំ២០១១គាត់បានផ្លាស់ចេញពី ក្រុម Benfica របស់ព័រទុយហ្គាល់មកកាន់តោខៀវក្នុងតម្លៃខ្លួន២១,៣លានផោន ហើយលេងបាន១៤៣ប្រកួតមុនផ្លាស់ ចេញទៅកាន់ Paris St-Germain ក្នុងតម្លៃ ៤០លានផោនក្នុងឆ្នាំ២០១៤ ។

David Luizធ្លាប់លេងឲ្យក្រុមជម្រើសជាតិអង់គ្លេសចំនួន៥៦ប្រកួត ។ គាត់ធ្លាប់ ជួយក្រុមតោខៀវ ឈ្នះជើងឯក Champions League និង FA Cup ក្នុងឆ្នាំ២០១២ ។

ចំណែកកីឡាករ Marcos Alonso បាន វិលត្រឡប់មកកាន់ប្រទេសអង់គ្លេសវិញជាលើកទី៣ដោយគាត់ធ្លាប់លេងឲ្យក្លិប Bolton និង Sunderland។ កីឡាករសញ្ជាតិអេស្ប៉ាញដែលមិនធ្លាប់ជាប់ជម្រើសជាតិនេះបាននិយាយថា “ដល់ពេលខ្ញុំត្រូវឈ្នះ ជើងឯកហើយ។ នេះគឺជាជំហានអភិវឌ្ឍន៍ បន្ទាប់ទៀតសម្រាប់អាជីពរបស់ខ្ញុំ។ គ្រួសារ ខ្ញុំនិងមិត្តភក្តិស្គាល់ក្លិបតោខៀវច្បាស់ណាស់ ហើយវាអាចជាសុបិនក្លាយទៅជាការពិតផងដែរសម្រាប់ខ្ញុំដែលមានឱកាសមកលេងឲ្យ Chelsea”។

2.ឆ្មាខ្មៅ Sunderland ចំណាយទឹកប្រាក់ច្រើនសន្ធឹកសន្ធាប់មិនធ្លាប់មានក្នុងប្រវត្តិសា្រស្តរបស់ក្លិប ដើម្បីទិញខ្សែបម្រើអន្តរជាតិហ្គាបង់ Didier Ndong ពីក្រុម Lorient របស់បារាំងក្នុងតម្លៃ13,6លានផោន។ កីឡាករវ័យ២២ឆ្នាំនេះបានចុះហត្ថលេខា រយៈពេល៥ឆ្នាំលេងឲ្យក្រុមឆ្មាខ្មៅ ។

3.ក្រុមការពារតំណែងជើងឯកអង់គ្លេសPremier leagueទិញខ្សែប្រយុទ្ធអន្តរជាតិអាល់ហ្ស៊េរី Islam Slimani ពីក្លិប Sporting Lisbon របស់ប្រទេសព័រទុយហ្គាល់ក្នុង តម្លៃខ្លួន២៩លានផោន។ ក្រុមLeicester City ទទួលបានកីឡាករវ័យ២៩ឆ្នាំនេះមករួមក្រុមរយៈពេល៥ឆ្នាំ។ Islam Slimani ស៊ុតបាល់បាន២៧គ្រាប់ចាប់តាំងពីលេងឲ្យក្រុម Sportingក្នុងឆ្នាំ២០១៣។

4.មាន់ខ្នាយមាស Tottenham ទទួល បានកីឡាករ Moussa Sissoko ពីក្រុម Newcastleក្នុងតម្លៃ៣០លានផោន។ ក្លិប បាល់ទាត់មាន់ខ្នាយមាស Tottenham បាន ទទួលជោគជ័យក្នុងការទិញកីឡាករ Moussa Sissoko ពីក្រុម Newcastle។ កីឡាករវ័យ២៧ឆ្នាំនេះបាននិយាយទៅកាន់អ្នកគាំទ្រក្លិបថា “ខ្ញុំផ្តល់អ្វីៗទាំងអស់ឲ្យអ្នកនិងក្រុមទាំងមូល។ ខ្ញុំសង្ឃឹមថាយើងនឹងឈ្នះការប្រកួតជាច្រើននិងជើងឯកផងដែរ”។ នៅ ថ្ងៃជាមួយគ្នានោះក្លិបមាន់ខ្នាយមាសក៏បានទិញកីឡាករបារាំង Georges-Kevin N’K-oudou ពីក្រុម Marseilleក្នុងតម្លៃ៩,៩លានផោនផងដែរ ។

5.Burnleyចំណាយទឹកប្រាក់១០,៥លានផោនទិញខ្សែបម្រើអន្តរជាតិអៀរឡង់ Jeff Hendrickមកពង្រឹងក្រុម ៕

ដោយ៖ ដេវីត