ខេត្តកណ្តាល ៖ សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បញ្ជាក់ថា ៖ រយៈពេលប្រមាណពីរខែទៀត នៅពេលបញ្ហាបញ្ចប់ ខ្ញុំនឹងប្រាប់ថា រឿងនេះ (បញ្ហាព្រំដែន) យ៉ាងម៉េច ហើយកន្លែងនេះវាមានរឿងអ្វីកើតឡើង។ ប៉ុន្ដែពេលនេះ ស្នើសុំបងប្អូនបន្តអត់ធ្មត់ និងជឿជាក់លើការដោះស្រាយរបស់រាជរដ្ឋាភិបាលលើបញ្ហាជម្លោះកម្ពុជា និងថៃ។
កន្លែងណាបាត់? កន្លែងណាបាន? មេទ័ពណាស្លាប់? មេទ័ពណារស់? សម្តេចធិបតីនាយករដ្ឋមន្ត្រី ហ៊ុន ម៉ាណែត បញ្ជាក់ថា ម៉ោងនេះ ស្មើនេះ មិនមែនជាការបំបែកបំបាក់ មិនទុកចិត្តគ្នាឡើយ តែ ត្រូវជឿជាក់តែមួយគត់ថា កងទ័ព របស់យើង បាន ខិតខំ លះបង់អាយុជីវិត សាច់ស្រស់ឈាមស្រស់ដើម្បីការពារ ទឹក ដី របស់យើងហើយ។
សម្តេចធិបតី ហ៊ុន ម៉ាណែត បានបញ្ជាក់ថា កម្ពុជាស្ងាត់តែស្ងៀម។ សម្តេចថា សង្គ្រាម មិនទាន់បញ្ចប់ឡើយ ដោយ ខ្មែរត្រូវរួបរួមគ្នា និងមិនគួរមាន សំណួរ ទាក់ទងនឹង កិច្ចការយោធានោះឡើយ។
សម្ដេចធិបតី ហ៊ុន ម៉ាណែត គូសបញ្ជាក់ថា ៖ ក្នុងរយៈពេលបីខែនេះ យើងស្ងាត់តែមិនស្ងៀម ខណៈរាជរដ្ឋាភិបាលកំពុងធ្វើការគ្រប់បែបយ៉ាង ដើម្បីឈានទៅបញ្ចប់ជម្លោះព្រំដែន កម្ពុជា និងថៃ និងខិតខំដោះស្រាយបញ្ហាជួយឱ្យបងប្អូនប្រជាពលរដ្ឋត្រឡប់មកពីថៃ មានការងារធ្វើ និងជំរុញការបង្កើត ផលិតផលក្នុងស្រុក។
សម្ដេចធិបតី ហ៊ុន ម៉ាណែត ស្នើអ្នកនយោបាយគ្រប់និន្នាការ និងពលរដ្ឋកុំដេញដោលសួររឿងសមរភូមិណាខ្លះដែលបាត់ និងចំនួនកងទ័ពពលី ប៉ុន្តែត្រូវជឿជាក់លើការលះបង់បូជាសាច់ស្រស់ ឈាមស្រស់របស់វីរកងទ័ពកម្ពុជា ក្នុងការ ការពារបូរណភាពទឹកដីរបស់កម្ពុជា ៕
ដោយ ៖ សិលា
