ភ្នំពេញ៖ កាលពីល្ងាចថ្ងៃទី២ខែមិថុនាឆ្នាំ២០១៥កន្លងទៅ លោក វ៉ាត់ ចំរើន ប្រធានសហព័ន្ធកីឡាចំបាប់កម្ពុជា និង លោក ធិន វិចិត្រ អគ្គលេខាធិកាសហព័ន្ធ បានទទួលស្វាគមន៍ គ្រូបង្វឹកជនជាតិកូរ៉េ ឈ្មោះ Kim soo Gil ជំនួសតំ ណែង លោកKim Song Tae ក្រោមជំនួយឧបត្ថម្ភទាំងស្រុង ពីក្រសួងអប់រំយុវជនកីឡា ដែលមានសុពលភាព រយៈពេល១ឆ្នាំ នៅទីស្នាក់ការគណៈកម្មាធិការជាតិ អូឡាំពិកកម្ពុជា។
លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជាបានឲ្យដឹងថា លោក KIM Soo Gil បានចុះកុងត្រាជាមួយក្រសួងអប់រំយុវជននិងកីឡា ដើម្បីចូលមកហ្វឹកហាត់ក្រុមកីឡាករកីឡាការិនីចំបាប់ ជម្រើសជាតិកម្ពុជា មានរយៈពេល១ឆ្នាំប៉ុណ្ណោះ ។
នៅក្នុងអំឡុងពេលហ្វឹកហាត់របស់លោក KIM Soo Gilនេះដែរ ប្រសិនបើ លោកអាចបង្កើត ស្នាដៃល្អក្នុង ការបង្ហាត់ក្រុមកីឡាករកីឡាការិនីចំបាប់ ទទួលបាននូវលទ្ធផលល្អសហព័ន្ធនឹងស្នើទៅក្រសួងអប់រំយុវជន និង កីឡា ដើម្បីសុំបន្តកុងត្រាប៉ុន្តែគ្មានស្នាដៃលេចធ្លោទេនោះ សហព័ន្ធមិនបន្តកុងត្រាទៀតឡើយ ។
លោកវ៉ាត់ ចំរើន អគ្គលេខាធិការ គណៈកម្មាធិការជាតិកម្ពុជា និងជាប្រធានសហព័ន្ធកីឡាចំបាប់បាន ឲ្យដឹងថា Kimsoo Gil គឺជាគ្រូចំបាប់ ដែលមានចំណេះដឹង ខ្ពស់ពីកីឡាចំបាប់ មានជំនាញច្បាស់លាស់ ផ្នែកហ្វឹកហាត់ចំបាប់ និងមានចំណេះដឹង ផ្នែកអប់រំកាយនិងកីឡាពិតប្រាកដ ដោយលោកKimsoo Gil មានការយល់ដឹងពីកាយសម្បទាកីឡាចំបាប់ត្រឹមត្រូវអាចទទួលយកធ្វើជាគ្រូហ្វឹកហាត់ចំបាប់បស់កម្ពុជា តាមលក្ខណៈបច្ចេកទេស។
គួររំលឹកថា លោក Kimsoo Gil ជាអតីតជាកីឡាករចំបាប់ឆ្នើមប្រចាំនៅប្រទេសកូរ៉េខាងត្បូង នេះបើតាម ប្រវត្តិសង្ខេបមុនពេលចូលខ្លួនធ្វើជាគ្រូបង្ហាត់ក្រុមកីឡាកកីឡាការិនីចំបាប់នៅកម្ពុជានោះ នៅក្នុងឆ្នាំ១៩៧៨ក្នុងព្រឹត្តិការណ៍ប្រកួតកីឡា 59th National Sports Festival លោកធ្លាប់ដណ្ដើមបានចំណាត់ថ្នាក់លេខ ១ក្នុងប្រភេទទម្ងន់៥៦គីឡូក្រាម ។ នៅឆ្នាំ១៩៧៩ ក្នុងព្រឹត្តិការណ័ប្រកួតកីលា 2nd Qualifying for World Championship ធ្លាប់ដណ្ដើមបានចំណាត់ថ្នាក់លេខ ២ក្នុងប្រភេទទម្ងន់៦២គីឡូក្រាមទៀត ។នៅខែកញ្ញាឆ្នាំ១៩៧៩ដដែលលោក Kim Soo Gil បានចូលរួមក្នុងព្រឹត្តិការណ៍ប្រកួតកីឡាចំបាប់ 3rd University Championship ប្រភេទទម្ងន់៦២គីឡូក្រាម ដណ្ដើមបានចំណាត់ថ្នាក់លេខ ១។
លោកKim Soo Gil ប្រកួតចុងក្រោយ នៅខែមិនាឆ្នាំ១៩៨៤ក្នុងព្រឹត្តិការណ៍កីឡាចំបាប់ 2nd Qualifying Tournament for LA Olympic Games ដណ្ដើមបានចំណាត់ថ្នាក់លេខ ២ក្នុងប្រភេទទម្ងន់៦២គីឡូក្រាមទៀត ។
បច្ចុប្បន្ន KIM Soo-Gil មានអាយុ៥០ឆ្នាំ ចូលមកហ្វឹកហាត់បន្ត ពីគ្រូបង្វឹកជនជាតិកូរ៉េខាងត្បូងម្នាក់ ឈ្មោះ Kim Song Tae ទើបផុតកុងត្រាកាលពីថ្មីៗនេះ។
ជាអតីតកីឡាករដែលមានស្នាដៃល្អបែបនេះគេជឿថាលោក Kim Soo Gil នឹងស្ពាយយកមកជាមួយនូវបទពិសោធន៍ល្អៗ និង ក្បួនសម្រាប់ឈ្នះមកចែករំលែកដល់អ្នកចំបាប់កម្ពុជាមិនខាន ។
