ភ្នំពេញ ៖ បុរសជាកម្មករកាត់ដេរម្នាក់ បានបាត់ខ្លួនរយៈពេល៤ថ្ងៃ មិនឃើញទៅធ្វើការ ហើយបងប្អូនទាក់ទងមកអ្នកស្គាល់គ្នា ឲ្យជួយឡើងទៅមើលនៅបន្ទប់ជួល ដោយធុំក្លិនស្អុយ ក៏ទៅប្រាប់ម្ចាស់ផ្ទះ នាំគ្នាគាស់បង្អួចមើល ប្រទះឃើញដេកស្លាប់ទៅហើយ ។
ហេតុការណ៍នេះ បង្កឲ្យមានការភ្ញាក់ផ្អើលកាលពីវេលាម៉ោង២រសៀលថ្ងៃទី២៨ ខែវិច្ឆិកា ឆ្នាំ២០២៥ នៅចំណុចបន្ទប់ជួលលេខ២៥ ជាន់ទី២ ភូមិចំការឪឡឹក២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
ជនរងគ្រោះរូបនោះ ឈ្មោះ ភិន សុភ័ន ហៅមួង ប្រុសអាយុ៣០ឆ្នាំ មានមុខរបរកម្មកររោងចក្រ ស្នាក់នៅបន្ទប់ខាងលើ និងមានស្រុកកំណើតនៅភូមិឈើបាក់ ឃុំបឹងណាយ ស្រុកព្រៃឈរ ខេត្តកំពង់ចាម ។
ព័ត៌មានបានឲ្យដឹងថា បុរសរូបនោះបានបាត់ខ្លួន មិន ឃើញទៅធ្វើការតាំងពីថ្ងៃទី២៥ ខែវិច្ឆិកា ឆ្នាំ២០២៥។ នៅថ្ងៃទី២៨ ខែវិច្ឆិកា បងប្អូន ដែលធ្វើការជាមួយគ្នា ក៏បានទាក់ទងទៅស្រុក ដើម្បីសួរនាំអ្នកស្រុក ហើយអ្នកផ្ទះ បានទាក់ទងតាមទូរសព្ទអត់ចូល ក៏ទាក់ទងមកអ្នកស្គាល់គ្នា ធ្វើការសំណង់ ដែលស្នាក់នៅផ្ទះជួលជាមួយគ្នា ក៏នាំគ្នាឡើងទៅមើលឃើញទ្វារដាក់គន្លឹះខាងក្នុង និងធុំក្លិនស្អុយ រួចក៏ទៅប្រាប់ម្ចាស់ផ្ទះ នាំគ្នាគាស់បង្អួច មើលស្រាប់តែប្រទះឃើញសពដេកស្លាប់ ហើមស្អុយទៅហើយ ក៏រាយការណ៍ទៅសមត្ថកិច្ច ដើម្បីចុះមកត្រួត ពិនិត្យ ។
នៅវេលារសៀលនេះ សមត្ថកិច្ចក៏បានចុះទៅត្រួតពិនិត្យ។ ទោះបីជាយ៉ាងណា គេពុំទាន់ដឹងមូលហេតុ នៃការស្លាប់ឡើយ៕
