ទឹកជំនន់ដ៏អាក្រក់បំផុតរបស់ប្រទេសថៃក្នុងរយៈពេលជាច្រើនទសវត្សរ៍បានសម្លាប់មនុស្សចំនួន ២២៤ នាក់ និងបានប៉ះពាល់ដល់បីភាគបួននៃប្រទេស។

យោងតាមទីភ្នាក់ងារសារព័ត៌មាន AFP បានឱ្យដឹងថា ទឹកជំនន់ក្នុងរយៈពេលពីរខែកន្លងមកនេះបានបំផ្លាញខេត្តចំនួន ៥៨ ក្នុងចំណោមខេត្តចំនួន ៧៧ របស់ប្រទេសថៃ ដែលក្នុងនោះខេត្តចំនួន ២៥ ត្រូវបានលិចទឹកទាំងស្រុង ដោយបំផ្លាញផ្ទះសម្បែង និងតំបន់លំនៅដ្ឋាន។
ប៉ុន្តែតាមតួលេខរបស់រដ្ឋាភិបាលថៃ នៅថ្ងៃសៅរ៍ ទី២៩ ខែវិច្ឆិកា បានឱ្យដឹងថាចំនួនអ្នកស្លាប់ដោយសារគ្រោះទឹកជំនន់នៅភាគខាងត្បូងនៃប្រទេសបានកើនឡើងច្រើនជាង ១៦០នាក់ ក្នុងនោះខេត្តមួយដែលស្ថិតនៅជាប់ព្រំដែនជាមួយម៉ាឡេស៊ីមានអ្នកស្លាប់ច្រើនជាងគេ។
ថ្លែងប្រាប់ទៅកាន់ក្រុមអ្នកសារព័ត៌មាន អ្នកនាំពាក្យរដ្ឋាភិបាលថៃ លោក Siripong Angkasakulkiat បានគូសបញ្ជាក់ដូច្នេះថា «ចំនួនអ្នកស្លាប់សរុបនៅទូទាំងខេត្ត ចំនួន៧ មាន១៦២នាក់ ក្នុងនោះរួមមាន ១២៦នាក់ដែលបានស្លាប់នៅក្នុងខេត្ត Songkhla»។
គួរបញ្ជាក់ថា អាជ្ញាធរថៃនៅថ្ងៃសៅរ៍នេះដែរបានចាប់ផ្ដើមប្រតិបត្តិការបោសម្អាតទ្រង់ទ្រាយធំនៅតំបន់ភាគខាងត្បូងនៃប្រទេស បន្ទាប់ពីលោកនាយករដ្ឋមន្ត្រី Anutin Charnvirakul បានសូមទោសដល់ប្រជាជនរងគ្រោះ អំឡុងធ្វើដំណើរទស្សនកិច្ចទៅកាន់ជំរំស្នាក់នៅបណ្ដោះអាសន្នមួយសម្រាប់ជនភៀសខ្លួនដោយសារទឹកជំនន់ នៅក្នុងស្រុក Hat Yai ដែលរងគ្រោះធ្ងន់ធ្ងរជាងគេកាលពីថ្ងៃសុក្រ។
រដ្ឋាភិបាលថៃក៏បានប្រកាសផងដែរពីការផ្ដល់ជំនួយបន្ទាន់សម្រាប់តំបន់រងផលប៉ះពាល់ដោយសារទឹកជំនន់ ក្នុងនោះរួមមានទាំងការផ្ដល់សំណងជាទឹកប្រាក់ ២លានបាត ឬស្មើនឹង ៦២០០០ដុល្លារសម្រាប់ក្រុមគ្រួសារដែលមានជាសមាជិករបស់ខ្លួនបានស្លាប់៕

រូប​ថត​: AFP