ខេត្តតាកែវ÷ករណីហិង្សាមួយបានកើតឡើងកាលពីវេលាម៉ោងប្រមាណជា ៧យប់ ថ្ងៃទី២៨ ខែវិច្ឆិកា ឆ្នាំ ២០២៥ នៅក្នុងភូមិធន់មន់ សង្កាត់បារាយណ៍ ក្រុងដូនកែវ ខេត្តតាកែវ ដោយសារតែស្ត្រីជាប្រពន្ធចុងបានត្រៀមទុកជាមុន និងមានកិច្ចសហការគាំទ្រដោយញាតិមិត្តកូនចៅ ចុះធ្វើប្រតិបត្តិការហិង្សាដោយវ៉ៃស្ត្រី

ជាប្រពន្ធដើមឲ្យរងរបួសធ្ងន់ រួចចាប់ស្រោចសាំងហើយដុតឆេះផ្អើលអ្នកភូមិទាំងយប់។

អាជ្ញាធរមូលដ្ឋានសង្កាត់បារាយណ៍បានឲ្យដឹងថា ករណីហិង្សាឃោរឃៅនេះ ព្រោះតែមន្តស្នេហ៍របស់បុរសវ័យចំណាស់ ប៊ន បូ អាយុ៥៤ឆ្នាំ បានទៅបង្កើតទំនាក់ទំនងស្នេហាជាមួយស្ត្រីម្នាក់ឈ្មោះនាង ម៉េង រស់នៅក្នុងភូមិជាមួយគ្នា អស់រយៈពេលជាង១០ ឆ្នាំមកហើយ។ ស្ត្រីជាភរិយាដើមឈ្មោះលឹម ឡៃហុន អាយុ៤០ឆ្នាំ បន្ទាប់ពីបង្កឲ្យមានទំនាស់ជាញឹកញាប់កន្លងមក ក៏បណ្ដោយឲ្យប្ដីជិះទូក២នៅក្បែរគ្នា ក្នុងពេលតែមួយដោយការបិទភ្នែក,បិទត្រចៀក។ នៅគ្រាកន្លងមក ក៏ធ្លាប់មានការប៉ះ ពាល់ពាក្យសម្ដីនិងអំពើហិង្សាតិចតួចដែរ។ ប៉ុន្តែមិនធ្ងន់ ធ្ងរដូចលើកនេះទេ។

សាក្សីក្នុងភូមិឲ្យដឹងថា មុនពេលកើតហេតុស្ត្រីជាប្រពន្ធ ដើមបានទៅថ្លឹងស្រូវ នៅផ្ទះមួយជិតផ្ទះស្ត្រីជាប្រពន្ធចុង ហើយពេលត្រឡប់មកវិញក៏ជួបនឹងក្រុមខាងប្រពន្ធចុងដែលមានគ្នីគ្នា៥នាក់ត្រៀមបម្រុងជាស្រេច ចាប់វាយឲ្យរងរបួសធ្ងន់រួចហើយទើបស្រោចសាំងដុតជាក្រោយ។ នៅក្នុងហេតុការណ៍នោះ បើទោះបីជាក្មេងក្មាងនិងអ្នក ភូមិស្រែកសុំឲ្យបន្ធូរដៃ ឬបញ្ចប់អំពើហិង្សាយ៉ាងណា ក៏ដោយក៏ភាគីខាងប្រពន្ធចុង បែរជាស្រែកគំរាមទៅលើ ប្រជាពលរដ្ឋនិងអ្នកភូមិដែលស្រែកឃាត់នោះទៅវិញ។

អ្នកភូមិបន្តថា ភាគីខាងប្រពន្ធចុងបានត្រៀមបម្រុង រួច ជាស្រេចដូចជាព្រនង់,ដំបង…និងប្រេងសាំងជាដើម។ភាគីប្រពន្ធចុងដែលមានគ្នា៥នាក់នោះគឺនាង ម៉េង ត្រូវ ជាប្រពន្ធចុង,វី សៀវមុី ត្រូវជាកូនប្រពន្ធចុង, វី ឈុនឈី ត្រូវជាកូនប្រពន្ធចុង, នាង ផារី ត្រូវជាប្អូនស្រីប្រពន្ធចុង

និង សូត្រ ប្រុសឈ្នះ ត្រូវជាកូនប្អូនស្រីប្រពន្ធចុង។ ពួក គេទាំង៥នាក់សុទ្ធតែបានប្រើកណ្ដាប់ដៃ,ដំបង,ព្រនង់និងចាប់ស្ត្រីរងគ្រោះស្រោចសាំងហើយដុត។

បន្ទាប់ពីហេតុការណ៍ភ្លាមៗ ស្ត្រីរងគ្រោះត្រូវបានញាតិ មិត្តបញ្ជូនមកសង្គ្រោះបន្ទាន់នៅមន្ទីរពេទ្យបង្អែកខេត្ត តាកែវ ដែលរហូតមកដល់ពេលនេះបានចាកចេញពីបន្ទប់សង្គ្រោះបន្ទាន់ហើយ។ រីឯភាគីជនបង្កប៉ុនប៉ងបើករថយន្តគេចខ្លួន ប៉ុន្តែត្រូវនគរបាលឃាត់ទាំងយប់ចំនួន៣នាក់និងព្រឹកឡើងត្រូវបានដោះលែងពីរនាក់។ដូច្នេះនៅក្នុងចំណោមជនបង្កអំពើហិង្សាទាំង៥រូបមាន តែស្ត្រីជាប្រពន្ធចុងម្នាក់ប៉ុណ្ណោះដែលត្រូវបានសមត្ថកិច្ចឃាត់ខ្លួន។

ប្រជាពលរដ្ឋក្នុងភូមិរង់ចាំមើលថាតើករណីខាងលើនេះជនរងគ្រោះទទួលបានយុត្តិធម៌ដែរឬទេ?៕