ខេត្តពោធិ៍សាត់ ៖ តាមប្រភពរាយការណ៍មកថា នៅវេលាម៉ោងប្រមាណជាង១២ ថ្ងៃត្រង់ ថ្ងៃអង្គារ ១២កើត ខែមិគសិរ ឆ្នាំម្សាញ់ សប្គស័ក ព.ស.២៥៦៩ ត្រូវនឹងថ្ងៃទី២ ខែធ្នូ ឆ្នាំ២០២៥នេះ មានប្ដីប្រពន្ធ១គូជិះម៉ូតូឌុបគ្នាតាមបណ្ដោយផ្លូវលំក្រាលក្រួសក្រហម១ខ្សែ ក្នុងទិសដៅពីជើងឆ្ពោះទៅទិសខាងត្បូង លុះមកដល់ចំណុចកើតហេតុ មិនដឹងជាយ៉ាងម៉េចទេស្រាប់តែបើកជ្រុលចូលស្នាមភ្លោះបណ្ដាលឲ្យរងរបួសធ្ងន់និងស្រាល ។
សេចក្ដីរាយការណ៍ឱ្យដឹងទៀតថា ហេតុការណ៍ខាងលើនេះបានកើតឡើងនៅត្រង់ចំណុច(លូ)១កន្លែង ស្ថិតនៅក្នុងភូមិថ្មី ឃុំត្នោតជុំ ស្រុកក្រគរ ខេត្តពោធិ៍សាត់ ។
សេចក្ដីរាយការណ៍បញ្ជាក់ថា ប្ដីរបួសស្រាលជាអ្នកបើកបរម៉ូតូម៉ាកហុងដាឌ្រីម សេ១២៥ សេ៊រីឆ្នាំ២០២២ ពណ៌ខ្មៅ ពាក់ស្លាកលេខពោធិ៍សាត់ 1L -2365 ឈ្មោះ សួ មុំ អាយុ ៤៥ឆ្នាំ ជនជាតិខ្មែរ មុខរបរកសិករ ចំណែកប្រពន្ធរបួសធ្ងន់ ឈ្មោះ ញឹម សុផល អាយុ៤៧ឆ្នាំ ជនជាតិខ្មែរ មុខរបរ កសិករ បច្ចុប្បន្នរស់នៅភូមិត្រពាំងស្នួល ឃុំស្វាយស ស្រុកក្រគរ ខេត្តពោធិ៍សាត់។
ប្រភពដដែលបញ្ជាក់បន្ថែមទៀតថា ប្ដីប្រពន្ធរងរបួសធ្ងន់និងស្រាលខាងលើនេះ ពួកគាត់ទើបតែចេញពីព្យាបាល្ភ្នែក(បកភ្នែកប្រពន្ធ)នៅមន្ទីរពេទ្យខេត្តពោធិ៍សាត់ ជាអកុសលក៏ជួបគ្រោះថ្នាក់បែបនេះទៀត ដោយជិះម៉ូតូខុសផ្លូវធ្លាក់ចូលស្នាមភ្លោះ។ ប្ដីប្រពន្ធរងរបួសត្រូវបានប្រជាពលរដ្ឋនៅម្ដុំកើតហេតុ កម្លាំងប្រជាការពារនិងកម្លាំងប៉ុស្ដិ៍នគរបាលរដ្ឋបាលត្នោតជុំ ទំនាក់ទំនងហៅរថយន្តសង្រ្គោះ កងពលតូចអន្ដរាគមន៍លេខ១៤ ដើម្បីដឹកបញ្ជូនទៅមន្ទីរពេទ្យបង្អែកខេត្តពោធិ៍សាត់៕ ដោយៈ ប៉ឹម ពិន
