ប្រទេសថៃ ៖ នៅថ្ងៃទី៤ ខែធ្នូ ឆ្នាំ២០២៥បន្ទាប់ពីទំព័រផ្លូវការសម្រាប់ព្រឹត្តិការណ៍កីឡាស៊ីហ្គេមលើកទី៣៣ ប្រឈមមុខនឹងការរិះគន់យ៉ាងខ្លាំងតាមអ៊ីនធឺណិត ចាប់ពីទង់ជាតិមិនត្រឹមត្រូវ កាលវិភាគពិបាកអាន រហូតដល់ផ្ទាំងរូបភាពផ្សព្វផ្សាយសម្រាប់ការរត់និម្មិតដែលបង្កើតឡើងដោយប្រើ AI ទំព័រ SEA GAMES ថៃឆ្នាំ២០២៥ បានបង្ហោះសេចក្តីថ្លែងការណ៍មួយដើម្បីដោះស្រាយបញ្ហាទាំងនេះ។

សេចក្តីថ្លែងការណ៍ពីទំព័រ SEA GAMES ២០២៥៖

ភារកិច្ចចម្បងរបស់ទំព័រ SEA GAMES ថៃឆ្នាំ២០២៥ រួមមានការបង្កើតរូបភាព ការបង្ហោះព័ត៌មានផ្លូវការពីគណៈកម្មាធិការរៀបចំ និងការគាំទ្រ និងផ្សព្វផ្សាយព្រឹត្តិការណ៍កីឡាស៊ីហ្គេមលើកទី៣៣។ ទំព័រនេះទទួលបានសម្ភារៈផ្សព្វផ្សាយពីភ្នាក់ងារផ្សេងៗ ដើម្បីជួយផ្សព្វផ្សាយព័ត៌មានយ៉ាងទូលំទូលាយដល់សាធារណជន។

ទោះជាយ៉ាងណាក៏ដោយ ខ្លឹមសារ រូបភាព ឬសម្ភារៈមួយចំនួនដែលទទួលបានសម្រាប់ការផ្សព្វផ្សាយអាចមានកំហុស ឬព័ត៌មានមិនពេញលេញ ដែលហួសពីការគ្រប់គ្រងរបស់ទំព័រ។ ទោះបីជាយ៉ាងនេះក្តី ទំព័រនេះនៅតែប្តេជ្ញាចិត្តក្នុងការផ្ទៀងផ្ទាត់ព័ត៌មានប្រកួតប្រជែងសំខាន់ៗឲ្យបានត្រឹមត្រូវតាមដែលអាចធ្វើទៅបាន និងបន្តគាំទ្រការផ្សព្វផ្សាយព័ត៌មានអំពីព្រឹត្តិការណ៍កីឡាស៊ីហ្គេម។

យើងសូមអភ័យទោសដោយស្មោះចំពោះកំហុសណាមួយនៅក្នុងព័ត៌មាន ឬសម្ភារៈផ្សព្វផ្សាយដែលត្រូវបានបោះពុម្ពផ្សាយ។ យើងសូមថ្លែងអំណរគុណដល់អ្នកទាំងអស់គ្នាដែលបានជូនដំណឹងមកយើង ផ្តល់មតិយោបល់ ហើយយើងនឹងប្រើប្រាស់មតិយោបល់ទាំងអស់ដើម្បីកែលម្អការទំនាក់ទំនងរបស់យើងនាពេលអនាគត៕ 

ដោយ ៖ សិលា