ប្រទេសឥណ្ឌូនេស៊ីបានបន្តការនាំចេញបង្គាទៅកាន់សហរដ្ឋអាមេរិកជាមួយនឹងការដឹកជញ្ជូន 182 តោនដែលមានតម្លៃ 1.5 លានដុល្លារអាមេរិក បន្ទាប់ពីទទួលបានវិញ្ញាបនប័ត្រថាពួកគេមិនមានការចម្លងរោគ Cesium-137 ។

រដ្ឋមន្ត្រីក្រសួងកិច្ចការសមុទ្រ និងនេសាទលោក Wahyu Sakti Trenggono បាននិយាយនៅក្នុងព្រឹត្តិការណ៍មួយកាលពីថ្ងៃពុធនៅឯកំពង់ផែ Tanjung Priok ភាគខាងជើងទីក្រុងហ្សាកាតាថា នេះជាការដឹកជញ្ជូនលើកទីពីរចាប់តាំងពីរដ្ឋាភិបាលបានធានាថាផលិតផលបង្គាឥណ្ឌូនេស៊ីបំពេញតាមស្តង់ដារសុវត្ថិភាពវិទ្យុសកម្មអន្តរជាតិ។

លោកបានបន្ថែមថា វាបង្ហាញថាការជឿទុកចិត្តលើទីផ្សារសហរដ្ឋអាមេរិកកំពុងចាប់ផ្តើមងើបឡើងវិញ នេះបើយោងតាមការដកស្រង់ដោយទស្សនាវដ្តីប្រចាំសប្តាហ៍របស់ឥណ្ឌូនេស៊ី Tempo ។

លោក Trenggono បានបញ្ចាក់ថា វិញ្ញាបនប័ត្រនៃការគ្មានសារធាតុ Cesium-137 ដែលជាអ៊ីសូតូបវិទ្យុសកម្មត្រូវបានចេញតាមរយៈកិច្ចសហប្រតិបត្តិការឆ្លងស្ថាប័នរវាងក្រសួងជលផល ទីភ្នាក់ងារស្រាវជ្រាវ និងនវានុវត្តន៍ជាតិ និងទីភ្នាក់ងារគ្រប់គ្រងថាមពលនុយក្លេអ៊ែរ។

ប្រធានទីភ្នាក់ងារធានាគុណភាព MMAF លោក Ishartini បានពន្យល់ថា ទីភ្នាក់ងារនេះត្រូវបានចាត់តាំងជាភ្នាក់ងារបញ្ជាក់ដោយរដ្ឋបាលចំណីអាហារ និងឱសថសហរដ្ឋអាមេរិក (USFDA) ចាប់តាំងពីថ្ងៃទី 31 ខែតុលាឆ្នាំនេះ។ មានតែផលិតផលជលផលដែលឆ្លងកាត់វិញ្ញាបនបត្រគុណភាព និងសុវត្ថិភាពនៃផលិតផលជលផល (SMKHP) និងការធ្វើតេស្តវិទ្យុសកម្មប៉ុណ្ណោះដែលអាចនាំចេញបានជាមួយនឹងស្ថានភាពនេះ។ មុននេះ ប្រទេសឥណ្ឌូណេស៊ីបាននាំចេញបង្គាចំនួន 121 កុងតឺន័រក្នុងខែតុលា បន្ទាប់ពីក្រសួងជលផលបានធ្វើការស្កែនវិទ្យុសកម្មនៃកុងតឺន័រចំនួន 920 ដែលភ្ជាប់ទៅនឹងសហរដ្ឋអាមេរិក៕