ភ្នំពេញ៖ លោកស្រីឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងអ្នកនាំពាក្យក្រសួងការពារជាតិកម្ពុជា បានថ្លែងថា ការបាញ់ប្រហារ យ៉ាងព្រៃផ្សៃរបស់ទាហានថៃដោយប្រើប្រាស់អាវុធធុនធ្ងន់, ផ្សែងពុល, រួមទាំងយន្តហោះចម្បាំងផង ដ៏កំរោលដោយមិនរើសគោលដៅរបស់ទាហានឈ្លានពានថៃនេះ ជាការរំលោភបំពានច្បាប់មនុស្សធម៌អន្តរជាតិ ។
ការថ្លែងបែបនេះរបស់លោកស្រីឧត្តមសេនីយ៍ឯក ម៉ាលី សុជាតា ក្នុងពិធី «បច្ចុប្បន្នភាពស្តីពីស្ថានការណ៍ព្រំដែនកម្ពុជា-ថៃ បន្ទាប់ពីកងទ័ពថៃបានបើកការវាយប្រហារមុនមកលើកងទ័ពនិងជនស៊ីវិលកម្ពុជា» នៅព្រឹកថ្ងៃព្រហស្បតិ៍ ៦រោច ខែមិគសិរ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១១ ខែធ្នូ ឆ្នាំ២០២៥។
លោកស្រីអ្នកនាំពាក្យរូបនេះ បានគូសបញ្ជាក់ថា ចំពោះការបាញ់ប្រហាររបស់ទាហានឈ្លានពានថៃ អស់រយៈពេលប៉ុន្មានថ្ងៃមកនេះបានបណ្តាល ឲ្យជនស៊ីវិលកម្ពុជាបាត់បង់ជីវិតចំនួន ១០នាក់ និងរងរបួសធ្ងន់ស្រាលឡើងដល់ ៥០នាក់ ខណៈរាប់សែននាក់កំពុងភៀសសឹក។
លោកស្រីឧត្តមសេនីយ៍ឯក ម៉ាលី សុជាតា បានថ្លែងបន្តថា វីរកងទ័ពកម្ពុជាបានកំពុងបន្តឈរជើងយ៉ាងស្វិតស្វាញបំផុតក្នុងកិច្ចការពារបូរណភាពទឹកដីរបស់កម្ពុជា ដោយបានធ្វើការបាញ់តបតទៅភាគីថៃវិញគ្រប់គោលដៅទាំងអស់ ។ ប៉ុន្តែទាហានកម្ពុជាបានបាញ់ឆ្លើយតបវិញទៅលើតែទាហានឈ្លានពានថៃប៉ុណ្ណោះ មិនបាញ់សំដៅលើជនស៊ីវិល ដូចភាគីថៃបាញ់មកលើជនស៊ីវិលកម្ពុជានោះឡើយ៕
ដោយ៖តារា
