ភ្នំពេញ៖ លោក ឃួង ស្រេង បានបន្ដទទួលអំណោយពីសប្បុរសជន ជាច្រើនសម្រាប់ឧបត្ថម្ភវីរៈកងទ័ពជួរមុខ និងជនភៀសសឹក ពីសង្គ្រាមឈ្លានពានទាហានថៃលើទឹកដីកម្ពុជា ក្រោយពីផ្ទុះសង្គ្រាមជាថ្មី ក្រុមទាហានថៃឈ្លានពានចូលបូរណៈភាពទឹកដីកម្ពុជា ក្នុងស្មារតីខ្មែរជួយខ្មែរ មាន សប្បុរសជន,ក្រុមហ៊ុនឯកជន និងស្ថាប័នរដ្ឋជាង១០០ហើយ បានសម្រុកយកអំណោយជាថវិកា គ្រឿងឧបភោគ បរិភោគ និងសម្ភារៈប្រើប្រាស់ចាំបាច់ជាច្រើនមុខទៀត មកប្រគល់ជូនរដ្ឋបាលរាជធានីភ្នំពេញ ដើម្បីត្រៀមរៀបចំបែងចែក ជូន បងប្អូនវីរៈកងទ័ពជួរមុខ និងជនភៀសសឹកទៅរកកន្លែងសុវត្ថិភាពនានា ។
សំរាប់ថ្ងៃអាទិត្យទី១៤ ខែធ្នូ ឆ្នាំ២០២៥ ក៏មិនខុសពីថ្ងៃម្សិលម៉ិញដែរ ឯកឧត្តម ឃួង ស្រេង អភិបាលរាជធានីភ្នំពេញ និងលោកជំទាវ អមដោយអភិបាលរងជាច្រើនរូបបានអញ្ជើញ ទទួលអំណោយពីសប្បុរសជន នៅក្នុងបរិវេណសាលារាជធានីភ្នំពេញ ដែលមានសប្បុរសជននានា, ក្រុមហ៊ុនឯកជននិងស្ថាប័នរដ្ឋជាច្រើនបានសម្រុកយកអំណោយមកប្រគល់ជូនរដ្ឋបាលរាជធានីភ្នំពេញ ដែលមានដូចជា៖ អំណោយអាជ្ញាធរខណ្ឌព្រែព្នៅថវិកាចំនួន៣០លានរៀលសំភារនិងស្បៀងអាហារផ្សេងចំនួន៧ឡាន គណកម្មការគ្រប់គ្រងផ្សារធំថ្មី, គណកម្មការផ្សារទួលទំពូង, បងប្អូនប្រជាពលរដ្ឋ មន្ត្រីរាជការ និងសប្បុរសជនជាច្រើនទៀត។សម្រាប់នៅល្ងាចថ្ងៃទី១៣ធ្នូម្សិលម៉ិញ មន្ទីរសាធារណការនិងដឹកជញ្ជូនរាជធានីភ្នំពេញ,គណកម្មការផ្សារ,អាជ្ញាធរខណ្ឌចំការមន,ខណ្ឌ៧មករា និងសប្បុរសជនជាច្រើនទៀតក៏បានយកអំណោយមកប្រគល់ជូនរដ្ឋបាលរាជធានីភ្នំពេញរហូតដល់ពេលយប់ផងដែរ។
អំណោយដែលទទួលបាននាព្រឹកថ្ងៃអាទិត្យទី១៤ធ្នូនេះ ក៏មិនខុសពីថ្ងៃមុនៗដែរ គឺមានដូចជា៖ថវិកា ត្រីខ មី ពងទាប្រៃ ទឹកបរិសុទ្ធ អង្ក អំបុក ត្រីងៀត ទឹកត្រី ទឹកស៊ីអ៊ីវ ស្ពៃក្តោប ប្រែងឆា ខ្សែចង មួក កន្ទេល នំក្រៀម ឆ្នាំង ភួយ,ទឹកផ្លែឈើនិងទឹកក្រូច ក្រម៉ា ខោ អាវនិង ថ្នាំពេទ្យជាដើម។
លោកឃួង ស្រេង អភិបាលរាជធានីភ្នំពេញ ក្នុងឱកាសនោះ បានថ្លែង អរគុណចំពោះបងប្អូនប្រជាពលរដ្ឋជាសប្បុរសជនទាំងអស់ដែលបានចំណាយធនធានចូលរួមឧបត្ថម្ភ តាមរយៈ រដ្ឋបាល រាជធានីភ្នំពេញ ដេីម្បីត្រៀមរៀបចំ បែងចែកជូនបងប្អូនកងទ័ពជួរមុខកម្ពុជានិងបងប្អូនប្រជាពលរដ្ឋជម្លៀសខ្លួន ទៅតាមមណ្ឌលសុវត្ថិភាពនានា ។រដ្ឋបាលរាជធានីភ្នំពេញ នៅតែបន្តទទួលអំណោយពីសប្បុរសជនតទៅទៀត នៅសាលារាជធានីភ្នំពេញ។ ទឹកចិត្តបងប្អូនប្រជាពលរដ្ឋកំពុងផុសផុលមកចូលរួមឧបត្ថម្ភដល់វីរកងទ័ពជួរមុខនិង ក្រុមគ្រួសារប្រជាពលរដ្ឋ ដែលកំពុងជម្លៀសចេញមកទីកន្លែង សុវត្ថិភាព ដែលនេះពិតជាបានបង្ហាញពីសាមគ្គីភាពជាធ្លុងមួយ ខ្មែរស្រលាញ់ខ្មែរ ។
លោកស្រីដោ សម្ផស្ស នាយិការរងរដ្ឋបាលរាជធានីភ្នំពេញ និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា៖ គិត ត្រឹម ម៉ោង ១៨:០០នាទី ថ្ងៃទី១៣ ខែធ្នូ ឆ្នាំ២០២៥ រដ្ឋបាល រាជធានី ភ្នំពេញ បានទទួល អំណោយសរុបចំនួន៣៦៨.៤៧០.៣២៥រៀលប្រាក់ដុល្លារចំនួន៧៥.៤៦៤ ដុល្លារ អាមេរិកនិងសម្ភារគ្រឿង ឧបភោគ បរិភោគថ្នាំពេទ្យ សម្ភារ ផ្សេងៗ ជាច្រេីនមុខ ទៀត។ សូមគោរពអរគុណនូវ ទឹកចិត្តសប្បុរសធម៌របស់បងប្អូន ប្រជាពលរដ្ឋ ក្នុង ស្មារតី ខ្មែរ ជួយ ជាតិខ្មែរ៕
ដោយ៖ សំរិត
