ភ្នំពេញ៖ ទំហំពាណិជ្ជកម្មកម្ពុជា-អាស៊ាន ក្នុងរយៈពេល១១ខែ ឆ្នាំ២០២៥នេះ ពោលគឺគិតចាប់ពីខែមករា-វិច្ឆិកា សម្រេចបានក្នុងទំហំទឹកប្រាក់ប្រមាណជាង ១៤,៩ពាន់លានដុល្លារ កើនឡើង ៣.៧៦% បើធៀបរយៈពេលដូចគ្នាក្នុងឆ្នាំ២០២៤។
ក្នុងរយៈពេល១១ខែកន្លងទៅនេះ ទីផ្សារសំខាន់ៗប្រចាំអាស៊ានដែលកម្ពុជានាំចេញទំនិញច្រើនជាងគេគឺ វៀតណាម ក្នុងទឹកប្រាក់ប្រមាណ ៣,៣ ពាន់លានដុល្លារ កើនឡើង ០.៣៧% បើធៀបរយៈពេលដូចគ្នាក្នុងឆ្នាំ២០២៤។ បន្ទាប់មកមាន សិង្ហបុរី ថៃ ម៉ាឡេស៊ី ឥណ្ឌូនេស៊ី ហ្វីលីពីន ព្រុយណេ ឡាវ មីយ៉ាន់ម៉ា និងទីម័រ។
សូមបញ្ជាក់ថា ចំពោះមុខទំនិញសំខាន់ៗដែលកម្ពុជានាំចេញមានដូចជា សម្លៀកបំពាក់ វាយនភ័ណ្ឌ ស្បែកជើង ទំនិញធ្វើដំណើរ ផលិតផលកសិកម្ម (ដូចជា ស្រូវ អង្ករ គ្រាប់ស្វាយចន្ទី និងដំឡូងមី និងកៅស៊ូ) គ្រឿងសង្ហារឹម សំបកកង់រថយន្ត បន្ទះសូឡា កង់ សម្ភារៈអគ្គិសនី គ្រឿងបង្គុំអេឡិចត្រូនិក គ្រឿងបង្គុំយានយន្ត និងផលិតផលជលផលជាដើម៕ដោយ៖តារា
