ភ្នំពេញ៖ បើតាមរបាយការណ៍មន្ទីរទេសចរណ៍ខេត្តសៀមរាប បានឱ្យដឹងនៅថ្ងៃទី០១ ខែមករា ឆ្នាំ២០២៦នេះថា៖ ភ្ញៀវទេសចរប្រមាណជិត ៣០ ម៉ឺននាក់ បានទៅកម្សាន្តនៅខេត្តសៀមរាប ក្នុងឱកាសឆ្លងឆ្នាំសកល ឆ្នាំ ២០២៥ ចូល ២០២៦។
មន្ទីរទេសចរណ៍ខេត្តសៀមរាប បង្ហាញថា ស្ថានភាពទេសចរ និងប្រជាពលរដ្ឋ ដើរកម្សាន្តនៅខេត្តសៀមរាប ពីថ្ងៃទី ៣០ និងទី ៣១ ខែធ្នូ ឆ្នាំ២០២៥ ក្នុងឱកាសថ្ងៃឆ្លងឆ្នាំ ២០២៥ ចូល ២០២៦ មានចំនួនប្រមាណ ២៨៦ ៧៥១ នាក់។ ក្នុងនោះ ភ្ញៀវទេសចរជាតិ និងប្រជាពលរដ្ឋក្នុងខេត្ត មានចំនួនប្រមាណ ២៧៩ ២១០ នាក់ និង ភ្ញៀវទេសចរអន្តរជាតិ មានចំនួន ៧ ៥៤១ នាក់។
ជាមួយនេះ អាជ្ញាធរខេត្តសៀមរាប បានរៀបចំកម្មវិធីមួយចំនួន ដើម្បីអបអរសាទរឆ្លងឆ្នាំថ្មី ឆ្នាំសកល ២០២៦ នៅតាមសួនច្បារមុខព្រះរាជដំណាក់ និងតំបន់កម្សាន្តផប់ស្ទ្រីត ដោយមានការសម្ដែងទស្សនីយភាពសិល្បៈទាំងបុរាណ និងប្រពៃណី និងការច្រៀងរួមគ្នាបង្ហាញភាពសាមគ្គី ស្មារតីខ្មែរតែមួយ ខ្មែរជួយខ្មែរ ជាពិសេសរំលឹកដល់គុណរបស់វីរកងទ័ពនូវការការពារបូរណភាពទឹកដី ព្រមទាំងមានការតាំងបង្ហាញលក់ម្ហូបអាហារ និងផលិតផលប្រើប្រាស់ផ្សេងៗ ជាច្រើនទៀតផងដែរ។
ការរៀបចំកម្មវិធីមួយចំនួននេះ ដើម្បីជំរុញកំណើនសេដ្ឋកិច្ច ជាពិសេសលើកកម្ពស់វិស័យទេសចរណ៍ក្នុងខេត្ត ក៏ដូចជាផ្សព្វផ្សាយអំពីសិល្បៈវប្បធម៌ប្រពៃណី និងវិស័យផ្សេងៗ ទៀត ជូនដល់ភ្ញៀវជាតិ-អន្តរជាតិ ព្រមទាំងផ្ញើសារទៅកាន់ពិភពលោកឲ្យបានដឹងថា សៀមរាប ជាខេត្តដែលមានសុខសុវត្ថិភាពពេញលេញសម្រាប់ភ្ញៀវទេសចរមកកម្សាន្តសប្បាយ។
លើសពីនេះ រដ្ឋបាលខេត្ត ក្រោមការដឹកនាំរបស់ លោក ប្រាក់ សោភ័ណ អភិបាល នៃគណៈអភិបាលខេត្តសៀមរាប បានណែនាំដល់ អង្គភាពមន្ទីរពាក់ព័ន្ធ រៀបចំការពារសន្តិសុខ សណ្ដាប់ធ្នាប់ គ្រោះថ្នាក់ចរាចរណ៍ និងបញ្ហាក្មេងទំនើង ព្រមទាំងអំពាវនាវដល់ភ្ញៀវ និងអ្នកមកទស្សនាកម្សាន្តក្នុងខេត្តសៀមរាប សូមថែរក្សាសម្អាតអនាម័យបរិស្ថានឲ្យបានល្អ៕
ដោយ៖តារា
