ភ្នំពេញ៖ យុវជនម្នាក់ជាសិស្សសាលាជិះម៉ូតូលឿនជ្រុលបុករថយន្តពីក្រោយបណ្តាលឲ្យរងរបួសបាក់ជេីងត្រូវបាន
កងសង្គ្រោះបន្ទាន់៧១១កងពលតូចលេខ៧០ដឹកទៅមន្ទីរពេទ្យកាលពីវេលាម៉ោង០៧និង៣២នាទីព្រឹក ថ្ងៃទី០៦ ខែមករាឆ្នាំ២០២៦ នៅតាមបណ្តោយផ្លូវបេតុងភូមិតាំងរនាម សង្កាត់ប្រទះឡាង ខណ្ឌកំបូល រាជធានីភ្នំពេញ ។
ជនរងគ្រោះមានឈ្មោះបណ្ឌិត សុវណ្ណដា ភេទប្រុស អាយុ១៣ឆ្នាំ របួស(បាក់ជេីងខាងស្តាំនិងរបួសចង្កា)មានអាស័យដ្ឋាននៅភូមិតាំងរនាម សង្កាត់ប្រទះឡាង ខណ្ឌកំបូល រាជធានីភ្នំពេញ។
តាមប្រភពព័ត៌មានបានឲ្យដឹងថា មុនពេលកេីតហេតុរថយន្តម៉ាកតូយូតា មួយគ្រឿងពាក់ស្លាកលេខភ្នំពេញ2P 0716 ធ្វេីដំណេីរតាមបណ្តោយផ្លូវបេតុងក្នុងល្បឿនល្មមខណៈមកដល់ចំណុចកេីតហេតុស្រាប់តែមានយុវជនម្នាក់ពាក់ខោអាវសិស្សសាលាជិះម៉ូតូហុងដាក្នុងល្បឿនលឿនមិនប្រយ័ត្នក៏ជ្រុលបុកពីក្រោយពេញទំហឹងបណ្តាលឲ្យដួលបាក់ជេីងខាងស្តាំ។
ក្រោយកេីតហេតុជនរងគ្រោះត្រូវបានរថយន្តសង្គ្រោះរបស់អង្គភាព៧១១ កងពលតូចលេខ៧០ ដឹកបញ្ជូនទៅមន្ទីរពេទ្យកុមារជាតិ ចំណែករថយន្តនិងម៉ូតូត្រូវបានសមត្ថកិច្ចធ្វេីការវាស់វែងយកទៅរក្សាទុករងចាំដោះស្រាយពេលក្រោយ៕
ដោយ៖សុខាសែនជ័យ
